މާލޭގައި މީހަކު ރަހީނުކޮށް، އެ މީހާއަށް ޖިސްމާނީ ގޮތުން އެކި އަނިޔާތައް ދީ، އިނގިލި ބުރިކޮށްލި މައްސަލައިގައި ފުލުހުން ފަސް މީހުން ހައްޔަރުކޮށްފިއެވެ. މީގެ ތެރޭގައި އެމްއެންޑީއެފްގެ ދެ އޮފިސަރުން ހިމެނޭ ކަމަށް ފުލުހުން މިއަދު ހާމަކޮށްފިއެވެ.
ހައްޔަރު ކުރެވުނު ފަސް މީހުންނަކީ:
1. އަލީ ސާމީ (24އ)، ރ. ކަނދޮޅުދޫ، މިހުރާ
2. އަހުމަދު ސާއިފް ވަހީދު (18އ)، ގދ. ގައްދޫ، ހުދުވެލި
3. މުހައްމަދު ނައުޝާން ހުސައިން (21އ)، ތ. ތިމަރަފުށި، އުތުރުގެއާގެ
4. މުހައްމަދު ނަފާހް (23އ)، ކ. މާފުށި، ފުލްމޫން
5. އަހުމަދު ޒަޔާން (24އ)، ލ.ގަން / ތުނޑި، ލިންކް
މި ފަސް މީހުންގެ ތެރެއިން މުހައްމަދު ނަފާހު އާއި އަހުމަދު ޒަޔާންއަކީ އެމްއެންޑީއެފްގައި ވަޒީފާ އަދާކުރާ ދެ މީހުންނެވެ. ފުލުހުން ވަނީ މި މަޢުލޫމާތު އެމްއެންޑީއެފްއާ ހިއްސާކޮށްފައެވެ. އަދި އެކަމާ ގުޅިގެން އަޅަންޖެހޭ ފިޔަވަޅުތައް އެ އިދާރާއިން އަޅަމުން ދާނެކަމަށް ފުލުހުން ބުނެފައިވެއެވެ.
ފުލުހުން ހާމަކުރި ގޮތުގައި އަލީ ސާމީ، އަހުމަދު ސާއިފް އަދި މުހައްމަދު ނައުޝާންއަކީ މީގެ ކުރިންވެސް މަސްތުވާތަކެތި ބޭނުންކުރުމާއި އެތަކެތި ގެންގުޅުމުގެ ރެކޯޑު އޮންނަ މީހުންނެވެ.
މި ފަސް މީހުންވެސް މިހާރު ތިބީ ފުލުހުންގެ ބަންދުގައެވެ. މީގެ އިތުރުން، މި މައްސަލައިގައި އުމުރުން 18 އަހަރު ނުފުރޭ ތިން ކުއްޖަކު ހިމެނޭ ކަމަށާއި، އެކަމާ ގުޅިގެން ކުރަންޖެހޭ މަސައްކަތްތައް ފުލުހުން ދަނީ ކުރަމުންނެވެ.
މި މައްސަލައަކީ މިއަހަރުގެ މެއި 25 އިން ޖޫން 25 އަށް މާލޭގެ ގެއެއްގައި 30 އަހަރުގެ ދިވެހި ފިރިހެނަކު ރަހީނުކޮށް، އޭނާއަށް ބިރުދައްކައި، ގަދަކަމުން މަސްތުވާތަކެތީގެ ވިޔަފާރި ކުރުވައި، ޖިސްމާނީ ގޮތުން އެކި ކަހަލަ އަނިޔާތައް ދީ، އޭނާގެ ވައަތު ކުޑަވާ އިނގިލި ބުރިކޮށްލި ކަމަށް ބުނެ ހުށަހަޅާފައިވާ މައްސަލައެކެވެ. މި މައްސަލައިގެ ތަޙްޤީޤު ފުލުހުން ދަނީ ކުރިއަށް ގެންދަމުންނެވެ.