އައްޑޫސިޓީ ހުޅުދޫއިން ގެއްލިގެން ހޯދަމުންދާ "ފަރީދު" ނަމަކަށް ކިޔާ ހާލެއް ހޯދައިދޭ މީހަކަށް، އެންމެ ފަހުގެ ދިވެހި ފިލްމު "ބިބީ" ބަލާލުމުގެ ފުރުސަތު ލިބިގެންދާނެ ކަމަށް ޑާކްރެއިން ޕްރޮޑަކްޝަންގެ ވެރިޔާ މުހައްމަދު އަލީ (މޮގަ) ވަނީ ހާމަކޮށްފައެވެ.
ފަރީދު ގެއްލުނު ކަމުގެ ޚަބަރު އިއްޔެ ހަވީރު ފެތުރުނީއްސުރެ، މި މައްސަލައަކީ ސޯޝަލް މީޑިއާގައި އެންމެ ވަރުގަދައަށް ދައުރުވަމުންދާ މައުޟޫއަށް ވަނީ ވެފައެވެ. ފަރީދުގެ ވެރިފަރާތުން ދީފައިވާ މަޢުލޫމާތުގައިވާ ގޮތުން، މި ރަތް ކުލައިގެ ހާލުގެ ފައިގައި ރަން ކެވެލިފަށެއް އޮންނާނެއެވެ. އަދި ހާ ހޯދައިދޭ ފަރާތަކަށް 15,000 ރުފިޔާގެ އިނާމެއް ދޭން ހަމަޖައްސާފައިވާ ކަމަށްވެސް ބުނެފައިވެއެވެ. އަދި މި ރޫސްޓަރ ފެނިއްޖެނަމަ 7587911 އަށް ގުޅައި ހަވާލުކޮށްދިނުމަށް އޭގެ ވެރިފަރާތުން ބުނެފައިވެއެވެ.
ޑާކްރެއިނުގެ ވެރިޔާ މުހައްމަދު އަލީ (މޮގަ) ސޯޝަލް މީޑިއާގައި ކުރި ޕޯސްޓެއްގައި ބުނެފައިވަނީ، ފަރީދު ހޯދައިދޭ މީހަކަށް "ބިބީ" ބަލާލުމުގެ ފުރުސަތު ލިބިގެންދާނެ ކަމަށެވެ. "ބިބީ" އަކީ އާއިޝަތު ފުއާދު އަދި މުހައްމަދު އަލީ (މޮގަ) ޕްރޮޑިއުސް ކުރާ ހޮރޯ/ކޮމެޑީ ފިލްމެކެވެ. މި ފިލްމް ލިޔެ ޑައިރެކްޓްކޮށްފައިވަނީ ޝަހުދާ މަހުމޫދެވެ.
"ބިބީ" ގެ ޓިކެޓް ވިއްކަން ފަށާފައިވަނީ އިއްޔެއެވެ. ޓިކެޓް ގަތުމަށް އޮލިމްޕަސްގެ އިތުރުން "ބިބީ" ގެ ހޮޓްލައިން ނަންބަރު 9911229 އަށް ވައިބަރ ނުވަތަ ވަޓްސްއެޕް މެދުވެރިކޮށް މެސެޖް ކުރެވިދާނެއެވެ.
ފަރީދު ހޯދުމުގެ މަސައްކަތް ދަނީ ކުރެވެމުންނެވެ. ނަމަވެސް މި ވަގުތާ ހަމައަށްވެސް ފަރީދު ފެނިފައެއް ނުވެއެވެ. ފަރީދު ހޯދުމަށް ގިނަ ބަޔަކު ސޯޝަލް މީޑިއާގައި މަސައްކަތް ކުރަމުންދާއިރު، ޑާކްރެއިނުން ވެސް މިކަމުގައި ބައިވެރިވެ، "ބިބީ" ބަލާލުމުގެ ފުރުސަތު ހުޅުވާލުމާއެކު، މި މައްސަލައަށް އިތުރު ސަމާލުކަމެއް ލިބިގެންދާނެ ކަމަށް ބެލެވެއެވެ.
ހުވަދޫމީޑިޔާ ޓީމުން އެދެނީ ފަރީދުގެ އާއިލާއަށް ހަމަ ސަލާމަތުން ހެޔޮ ސިއްހަތެއްގައި ފަރީދު ރޫސްޓަރ އަނބުރާ ލިބުމެވެ.