ޚާރިޖީ ސިޔާސަތު ބައްޓަން ކުރުމުގައި އަދި ހިންގުމުގައި އަބަދުވެސް އެންމެ އިސްކަން ދޭނީ ދިވެހި ރައްޔިތުންގެ މަސްލަހަތު ހިމާޔަތް ކުރުމަށް ކަމަށް ރައީސް ޑރ. މުޙައްމަދު މުޢިއްޒު ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ ދިވެހިރާއްޖެއަށް އދ. ގެ މެންބަރުކަން ލިބުނުތާ 59 އަހަރު ފުރޭ ދުވަސް ފާހަގަކުރުމުގެ ގޮތުން ދެއްވި ވީޑިއޯ މެސެޖުގައެވެ.
ރައީސްގެ ވީޑިއޯ މެސެޖުގައި ވިދާޅުވީ ގައުމެއްގެ މިނިވަންކަން ފުރިހަމައަށް ދިފާއު ކުރެވިގެންދާނީ، އެ ގައުމެއްގެ ރައްޔިތުން އެކަން ބަލައިގަތުމުން އެކަންޏެއް ނޫން ކަމަށާއި މުއާހަދާއެއްގައި ލިޔެ، ޗާޕްކޮށް، ޝާއިއުކޮށްގެން އެކަންޏެއްވެސް ނޫން ކަމަށެވެ.
ރައީސް ވިދާޅުވީ ގައުމެއްގެ މިނިވަންކަން، ބައިނަލްއަގުވާމީ މަސްރަހުގައި ދިފާއުކޮށް، ކުރިއެރުވޭނީ، އެ މިނިވަންކަން ލިބިއްޖެކަން އެހެން ގައުމުތަކަށް އަންގައިދީގެން ކަމަށާއި ކަނޑައެޅިގެންވާ ވަކި ސަރަހައްދެއްގެ މައްޗަށް އ ގައުމެއްގެ ސިޔާދަތީ ބާރު އޮތްކަމާއި، އެ ބާރު ފުރިހަމައަށް ހިނގާ ކަމުގެ މައުލޫމާތު، އެހެން ގައުމުތަކަށް ފޯރުކޮށްދީގެން ކަމަށެވެ. އަދި އެ ސިޔާދަތީ ބާރަށް އެހެން ގައުމުތަކުގެ އިހުތިރާމު ހޯދައިގެން ކަމަށެވެ.
ދިވެހިރާއްޖޭގެ މިނިވަންކަމާއި ސިޔާދަތު ދިފާއުކޮށް، ކުރިއެރުވުމުގެ މަތިވެރި މަސައްކަތް ކުރާ އެންމެ މުހިންމު މައިދާނަކީ އދ. ޖަމުއިއްޔާ ކަމަށާއި އދ. ގެ މެންބަރުކަން މުހިންމު ވަނީ އެހެންވެ ކަމަށް ރައީސް ވިދާޅުވިއެވެ. އަދި އދ. ގައި ރާއްޖެއިން ކުރަމުން މިދާ ދަތުރަކީ ދިވެހިން ފަޚުރުވެރިވާ ފަދަ ކާމިޔާބު ދަތުރެއް ކަމަށް ރައީސް ވިދާޅުވިއެވެ.
މީގެއިތުރުން ރައީސް ވިދާޅުވީ އދ. އަކީ ދުނިޔޭގެ މައި މަޖިލިސް ކަމަށާއި ދުނިޔެއަށް ދިމާވާ މައްސަލަތަކަށް ހައްލު ހޯދަން މަސައްކަތްކުރާ މައިދާން ކަމަށާއި ދެބަސްވެ، އަރައިރުން ވުމުން، ސުލްހަވާން ވާހަކަދައްކާ މައިދާން ކަމަށެވެ.
މިތަނުގައި މި ކުރެވޭ ބަހުސްތަކުގައި ބައިވެރިވާންޖެހޭ. ބަސް ބުނަންޖެހޭ. މި ތަނުގައި ބަސް ވިކެންޖެހޭ. ގައުމުގެ ތަރައްގީއަށް ބޭނުންވާ މަގުތައް ކޮށޭނީ، އަޅުގަނޑުމެންގެ ގައުމަކީ މުޅި ދުނިޔޭގައިވެސް އިހުތިރާމު ލިބިފައިވާ ގައުމަކަށްވެގެން. އިހުތިރާމު ކުރާ، އިހުތިރާމު ލިބޭ، ބަޔަކަށްވެގެން.
އދ. ގެ އާންމު މަޖިލީހުގެ 79 ވަނަ ސެޝަނުގައި ބައިވެރިވެވަޑައިގަތުމަށް ރައީސް މިހާރު އެމެރިކާގައި ހުންނެވިއިރު، އެމަނިކުފާނު ވިދާޅުވީ އެންމެ އިސްކަންދެއްވާނީ
ދިވެހިރާއްޖެއާމެދު ދެކެވަޑައިގަންނަވާ ތަސައްވުރު ހާމަކުރައްވަން ކަމަށާއި ”ދިވެހިންގެ އަޑު، ދިވެހިންގެ ވިންދުގެ އަޑު، ދިވެހިންގެ އިހުސާސްތައް” އިއްވަވަން ކަމަށެވެ.
ރައީސްގެ ވާހަކަފުޅު ނިންމަވައިލައްވަމުން ވަނީ ޚާރިޖީ ސިޔާސަތު ބައްޓަން ކުރުމުގައި އަދި ހިންގުމުގައި އަބަދުވެސް އެންމެ އިސްކަން ދެއްވާނީ ދިވެހި ރައްޔިތުންގެ މަސްލަހަތު ހިމާޔަތް ކުރުމަށް ކަމަށާއި ދިވެހި ރައްޔިތުންގެ މިނިވަންކަމަށް ކަމާއި ދިވެހި ރައްޔިތުންގެ ސަލާމަތާއި ރައްކާތެރިކަމަށްޓަކައި ކަމުގެ ޔަގީންކަން ދެއްވައިފައެވެ.
އާދެ، ޕްރޯ މޯލްޑިވްސް ޕޮލިސީ ކުރިއަށް ގެންދަންކަން. އަދި ދިވެހި ރައްޔިތުންގެ ކުރިއެރުމާއި ކާމިޔާބީއަށްކަން. ރައީސް ވިދާޅުވިއެވެ.