ފަލަސްތީނުގެ ޣައްޒާގައި ހިންގަމުންދާ ގަތުލު އާންމު ހިތްވަރާއެކު ހުއްޓުވަންޖެހޭ ކަމަށާއި، ފަލަސްތީނަކީ ވަކި ދައުލަތެއްކަމަށް ނިންމަންޖެހޭ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ވިދާޅުވެއްޖެ އެވެ.
އދ. ގެ ޕްލެނަރީ އޮފް ސަމިޓް އޮފް ދަ ފިއުޗަރގައި މިރޭ ދެއްކެވި ވާހަކަފުޅުގައި ރައީސް މުއިއްޒު ވިދާޅުވީ، ނިރުބަވެރި އިސްރާއީލުން ޣައްޒާއަށް ދެމުންދާ ހަމަލާތައް ހުއްޓުވުމަށް ހިތްވަރާއެކު ކުރިމަތިލާންޖެހޭ ކަމަށެވެ. އަދި ފަލަސްތީނަށް އދ. ގެ ފުރިހަމަ މެންބަރުކަން ލިބެންޖެހޭ ކަމަށާއި، އިންސާނިއްޔަތުކަމެއް ނެތް ގާތިލުން އިންސާފުގެ ކުރިމައްޗަށް ގެންނަން ހިތްވަރު ހުންނަންޖެހޭ ކަމަށްވެސް އެމަނިކުފާނު ފާހަގަކުރެއްވިއެވެ.
ފަލަސްތީނުގެ މައްސަލައިގައި ރައީސް މުއިއްޒަކީ އަބަދުވެސް ހަރުއަޑުން ވާހަކަފުޅު ދައްކަވާ ބޭފުޅެކެވެ. މި ސަރުކާރުން ވަނީ އިސްރާއީލު ޕާސްޕޯޓުން ރާއްޖެއަށް މީހުން އެތެރެވުން ހުއްޓުވުމުގެ މަސައްކަތްވެސް ފަށާފައެވެ. މިގޮތުން އިސްރާއީލު ޕާސްޕޯޓު މަނާކުރުމަށް ގާނޫނުތަކަށް ބަދަލު ގެނައުމަށް ވަޒީރުންގެ މަޖިލީހުން ވަނީ ނިންމަވާފައެވެ.
އިސްރާއީލުން ޣައްޒާއަށް ދެމުންދާ ހަމަލާތަކަކީ 2023 ވަނަ އަހަރުގެ އޮކްޓޯބަރު 7 ވަނަ ދުވަހުން ފެށިގެން ދެމުންދާ ހަމަލާތަކެކެވެ. މި ހަމަލާތަކުގައި މިހާތަނަށް 41,000 އަށްވުރެ ގިނަ ފަލަސްތީނު ރައްޔިތުން ޝަހީދުވެފައިވާ ކަމަށް ރިޕޯޓުތަކުން ދައްކައެވެ.