ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުފަދަ އިިޚުލާސްތެރި، އިސްލާމްދީންދެކެ ލޯބިފުޅުވާ ވެރިއަކު ހުންނެވީތީ ރައްޔިތުން މިއަދު އުފާކުރަންޖެހޭ ކަމުގައި ވިލިމާލޭ ދާއިރާގެ މެންބަރު މުޙައްމަދު އިސްމާޢީލް މިއަދު ވިދާޅުވެއްޖެއެވެ.
މެންބަރު މުޙައްމަދު މިހެން ވިދާޅުވީ “ބިލްޑިންގް ޕްރޮޑަކްޓިވް ކެޕޭސިޓީސް އިން ސްމޯލް އައިލެންޑް ޑިވެލޮޕިންގ ސްޓޭޓްސް” ގެ ނަމުގައި އދ. ގެ އާންމު މަޖިލީހުގެ ހަވާސާގައި ބޭއްވި ހަރަކާތުގައި ރައީސް ޑރ. މުޢިއްޒު ބައިވެރިވެވަޑައިގަންނަވާ މަންޒަރު ފެންނަ ފޮޓޯއެއް ހިއްސާ ކުރައްވައި ސޯޝަލްމީޑިއާ ޕްލެޓްފޯމް އެކްސްގައި ކުރެއްވި ޕޯސްޓެއްގައެވެ.
މެންބަރު މުޙައްމަދު ވިދާޅުވީ ގައުމެއްގެ ހަޔާތުގައި އެ ގައުމަކަށް އެންމެ މުހިންމު އެއްކަމަކީ ގައުމަށާއި އެ ގައުމެއްގެ ރައްޔިތުންގެ ކުރިއެރުމާއ ލާބަޔަށް އިޚުލާސްތެރިކަމާއި ތެދުވެރިކަމާއެކު މަސައްކަތް ކޮއްދެއްވާނެ ވެރިޔަކު ލިބުން ކަމަށެވެ. އެގޮތުން ރައީސް ޑރ. މުޢިއްޒުފަދަ ވެެރިއަކު ގައުމުގެ ހުންގާނުގައި ހުންނެވީތީ ރައްޔިތުން މިއަދު އުފާކުރަންޖެހޭ ކަމުގައި މެންބަރު ވިދާޅުވިއެވެ.
މިއަދު ދިވެހި ގައުމު ވެސް ދިވެހި ކުދިބޮޑު އެންމެހާ ރައްޔިތުން ވެސް، އުފާކޮށް ޝުކުރު ކުރަންޖެހޭ ދިވެހިރާއްޖެއަށް ރައީސް ޑޮކްޓަރު މުޢިއްޒުފަދަ އިޚުލާސްތެރި، މަޑުމައިތިރި، އިސްލާމްދީންދެކެ ލޯބިފުޅުވާ ވެރިއަކަށް ދިވެހި ގައުމުގެ ހުންގާނު ހަވާލު ކުރެވުނު ކަމަށްޓަކާ.
އެކުވެރި ދައުލަތްތަކުގެ އާންމު މަޖިލީހުގެ 79 ވަނަ ބައްދަލުވުމުގައި ބައިވެރިވެވަޑައިގެންނެވުމަށް މިހާރު އެމެރިކާއަށް ކުރައްވަމުން ގެންދަވާ ދަތުރުފުޅުގެތެރެއިން ރައީސް ވިދާޅުވެފައިވަނީ އ.ދ ގެ ބައްދަލުވުމުގައި އެންމެ އިސްކަންދެއްވާނީ ދިވެހީންގެ އަޑު، ދިވެހީންގެ ވިންދުގެ އަޑު، ދިވެހީންގެ އިހުސާސްތައް އިއްވަވަން ކަމަށެވެ.
ޚާރިޖީ ސިޔާސަތު ބައްޓަން ކުރުމުގައި އަދި ހިންގުމުގައި ވެސް އަބަދުވެސް އެންމެ އިސްކަންދެއްވާނީ، ދިވެހި ރައްޔިތުންގެ މަސްލަހަތު ހިމާޔަތްކޮށް، ދިވެހި ރައްޔިތުންގެ މިނިވަންކަމަށް ކަމަށާއި ދިވެހި ރައްޔިތުންގެ ސަލާމަތާއި ރައްކާތެރިކަމާއި ދިވެހި ރައްޔިތުންގެ ކުރިއެރުމާއި ކާމިޔާބީއަށްކަމަށް ރައީސް ވަނީ ވިދާޅުވެފައެވެ.