ދިވެހިރާއްޖެއާއެކު އޮތް ޒަމާންވީ ގުޅުން އިތުރަށް ބަދަހިކުރުމަށް މަސައްކަތް ކުރައްވާނެ ކަމަށް، ސްރީލަންކާގެ އައު ރައީސް އަނުރާ ކުމާރަ ޑިސަނާޔަކަ ވަނީ ވިދާޅުވެއްޖެއެވެ. ޑިސަނާޔަކަ މިހެން ވިދާޅުވީ، ސްރީލަންކާގެ ރިޔާސީ އިންތިޚާބު ކާމިޔާބު ކުރެއްވުމާ ގުޅިގެން ދިވެހިރާއްޖޭގެ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ފޮނުއްވި ތަހުނިޔާގެ މެސެޖަށް ޖަވާބު ދެއްވަމުންނެވެ.
ރައީސް ޑރ. މުޢިއްޒު “އެކްސް” (ކުރީގެ ޓްވިޓަރ) ގައި ކުރެއްވި ޕޯސްޓެއްގައި، ސްރީލަންކާގެ އާ ރައީސްގެ ލީޑަޝިޕްގެ ދަށުން ދެ ޤައުމުގެ ދެމެދުގައި އޮތް ޒަމާންވީ ގުޅުން އިތުރަށް ބަދަހިވާނެ ކަމަށް އުންމީދުކުރައްވާ ކަމަށް ވިދާޅުވިއެވެ. މީގެ އިތުރުން، ރައީސް ޑިސަނާޔަކަގެ ކުރިއަށް އޮތް ރިޔާސީ ދައުރުގައި ކާމިޔާބީއަށް އެދިވަޑައިގެންފައިވެއެވެ.
މި މެސެޖަށް ޖަވާބު ދެއްވަމުން ރައީސް ޑިސަނާޔަކަ ވިދާޅުވެފައިވަނީ ދެ ޤައުމުގެ ގުޅުމާއި އަދި ސަރަހައްދީ ގުޅުން އިތުރަށް ރަނގަޅު ކުރުމަށް ގުޅިގެން މަސައްކަތްޕުޅު ކުރައްވާނެ ކަމަށެވެ.
ސްރީލަންކާގެ ރައީސްކަމުގެ ހުވާ ކުރެއްވުމަށްފަހު ދެއްވި ޚިޠާބުގައި، ރައީސް ޑިސަނާޔަކަ ވަނީ ސްރީލަންކާއަށް ކުރިމަތިވެފައިވާ ބޮޑު އިޤްތިޞާދީ ދަތިކަމުން އަރައިގަނެ، ޤައުމުގެ ތާރީޚު އަލުން ބަދަލު ކުރައްވާނެ ކަމުގެ ޔަޤީންކަން ދެއްވާފައެވެ. އޭގެ ތެރޭގައި ހެޔޮވެރިކަމާއި ކޮރަޕްޝަނާ ދެކޮޅަށް ހަރުކަށި ފިޔަވަޅުތައް އެޅުމާއި، ސްރީލަންކާގެ އުފެއްދުންތެރިކަމާއި ދަނޑުވެރިކަމާއި އައިޓީ ދާއިރާތައް ތަރައްޤީކުރުމަށް ވައުދުވެވަޑައިގެންނެވިއެވެ.
މީގެ އިތުރުން، އިޤްތިޞާދީ ދަތިކަމުން ޤައުމު ސަލާމަތް ކުރުމަށް އިންޓަނޭޝަނަލް މަނިޓަރީ ފަންޑާ އެކު ވެފައިވާ އެއްބަސްވުން ކުރިއަށް ގެންދިއުމަށާއި، ޚަރަދު ކުޑަކުރުމުގެ ފިޔަވަޅުތަކުގެ އަސަރު އެންމެ ފަޤީރުންނަށް ކުޑަކުރުމަށްވެސް ވަނީ ވައުދުވެވަޑައިގެންފައެވެ.
ސްރީލަންކާގެ އިޤްތިޞާދީ ޙާލަތަށް ބަލާއިރު، އެ ޤައުމުގެ ބޭރުގެ ދަރަނި 36 ބިލިއަން ޑޮލަރަށް އަރާފައިވާއިރު، އޭގެ ތެރެއިން ޗައިނާއަށް އެކަނި ހަތް ބިލިއަން ޑޮލަރު ދައްކަން ޖެހެއެވެ. މި ދަރަނިތައް އަދާކުރުމަށްޓަކައި ބޭރުގެ އަދި އެތެރޭގެ ލޯނު ދޫކުރާ ފަރާތްތަކާއެކު ދަރަނި ދެއްކުމުގެ ކަންކަން އަލުން އެކުލަވާލަމުންދާ ކަމަށް ރައީސް ޑިސަނާޔަކަ ވަނީ ފާހަގަކުރައްވާފައެވެ.
ރައީސް ޑިސަނާޔަކަގެ މި ބަސްފުޅުތަކުން ދޭހަވަނީ ސްރީލަންކާގެ އިޤްތިޞާދީ އަދި ސިޔާސީ ޙާލަތު ރަނގަޅުކުރުމަށް އަވަސް ފިޔަވަޅުތަކެއް އަޅުއްވަން ގަސްދުކުރައްވާ ކަމެވެ. އަދި މި މަސައްކަތުގައި ދިވެހިރާއްޖެ ފަދަ އަވައްޓެރި ޤައުމުތަކާއެކު އޮތް ގުޅުން ބަދަހިކުރުމަށް އިސްކަންދެއްވާ ކަމެވެ.
ދެ ޤައުމުގެ ވެރިންގެ މި ބަދަލުކުރެއްވި މެސެޖުތަކުން ދޭހަވަނީ ކުރިއަށް އޮތް ތަނުގައި ދިވެހިރާއްޖެއާއި ސްރީލަންކާއާ ދެމެދު އޮތް ގުޅުން އިތުރަށް ވަރުގަދަވެ، ދެ ޤައުމަށް ފައިދާހުރި ގޮތެއްގައި އެކުގައި މަސައްކަތްކުރުމުގެ ފުރުޞަތު އިތުރުވެގެންދާނެ ކަމެވެ. ޚާއްޞަކޮށް އިޤްތިޞާދީ އަދި ސަރަޙައްދީ ކަންކަމުގައި ދެ ޤައުމުގެ ގުޅުން އިތުރަށް ބަދަހިވެގެންދާނެ ކަމަށް ބެލެވެއެވެ.