މަގާމު ގެއްލިދާނެތީ ގިނަ ރައީސުންނަށް ކުރައްވަން ނުކެރުނު އެތައް ކަމެއް ރައީސް ޑރ. މުޙައްމަދު މުޢިއްޒު ތަންފީޒު ކުރައްވަން ފަށްޓަވައިފި ކަމަށް މާލޭގެ ޑެޕިއުޓީ މޭޔަރު އަޙްމަދު ނަރީޝް މިރޭ ވިދާޅުވެއްޖެއެވެ.
އެކްސްގައި ކުރެއްވި ޕޯސްޓެއްގައި ނަރީޝް ވިދާޅުވީ ވެރިއެއްގެ އެންމެ ބޮޑު ޒިިންމާތަކުގެތެރޭގައި ގައުމުގެ ޝާނާއި ޝައުކަތު އެހެން ގައުމުތަކުގެ ކުރިމަތީގައި ނެގެހެއްޓުމާއި، ގައުމުގެ މިނިވަންކަމާއި ސިޔާދަތު ބާރުތަކާއި އިސްތިގްލާލު ދެމެއްޓުމާއި، ގައުމުގެ ރައްޔިތުންނަށް ލާބަޔާއި މަންފާވާނެ ކަންކަމުގައި ޚާރިޖީ ގުޅުންތައް ދޭދޭ ގައުމުތަކުގެ މެދުގައި ބަދަހިކުރުން ހިމެނޭ ކަމަށެވެ. އަދި ގައުމުގެ އިގުތިސާދު ކޮޅަށްޖަހައި، ނަފާވެރި އުފެއްދުންތެރި ވަތަނީ އަދި ދީނަށް ލޯބިކުރާ މުޖުތަމައުއެއް ބިނާކުރުމާއި، ގައުމުގެ ހައްގުގައި އަޑުއުފުލަންޖެހޭ ކޮންމެ ތަނެއްގައި ފަސްޖެހުމެއް ނެތި ބަސްބުނަން ކެރިވަޑައިގެންނެވުން ހިމެނޭ ކަމަށެވެ.
އެގޮތުން ރައީސް ޑރ. މުޢިއްޒު ސާބިތުކަމާއެކު މިއަދު ބައިނަލްއަގުވާމީ މައިދާނުގައި އެ ހުރިހާ ކަމެއް މި ގައުމުގަައި ކަށަވަރު ކުރެއްވުމަށް މަސައްކަތް ކުރައްވަމުން ގެންދަވާ ކަމަށް ނަރީޝް ވިދާޅުވިއެވެ.
ނަރީޝް ވިދާޅުވީ ރައީސް ކުރައްވަމުން ގެންދަވާ މަސައްކަތާއި ދައްކަވަމުން ގެންދަވާ ހިއްވަރަށް އައްސަރިބަހާއި ސާބާސް ހައްގު ކަމަށެވެ.
މީގެއިތުރުން ނަރީޝް ވިދާޅުވީ ގިނަ ރައީސުން މަގާމު ގެއްލިދާނެތީ، ނޫނީ ރައްޔިތުންގެ ތާއިދު ގެެއްލިދާނެތީ ކުރައްވަން ނުކެރުނު އެތައް ކަމެއް މި ގައުމުގައި ރައީސް ޑރ.މުޢިއްޒު ތަންފީޒު ކުރައްވަން ފަށްޓަވައިފި ކަމަށެވެ. އަދި މުސްތަގުބަލު އުޖާލާކުރަން އަޅަންޖެހޭ ހުރިހާ ފިޔަވަޅުތައް ސާބިތުކަމާއެކު އަޅުއްވާން ފަށްޓަވައިފި ކަމަށް ވެސް ނަރީޝް ވިދާޅުވިއެވެ.