ދިވެހި ޑޮކްޓަރުންގެ ޖަމިއްޔާ، މޯލްޑިވިއަން މެޑިކަލް އެސޯސިއޭޝަން (އެމްއެމްއޭ) އިން ދުންފަތް އެކުލެވޭ އެކި ބާވަތްތަކާއި ވޭޕް ރާއްޖެ އެތެރެކުރުން މަނާކުރުމަށް ގޮވާލައިފިއެވެ.
އެމްއެމްއޭއިން ނެރުނު ބަޔާނެއްގައި ބުނެފައިވަނީ ދުންފަތަކީ 250 ވިހަ އާއި އެތައް ހާސް ކެމިކަލް މާއްދާ އެކުލެވޭ އެއްޗެއް ކަމަށާއި، އޭގެ ތެރެއިން 70 މާއްދާއަކީ ކެންސަރަށް މަގުފަހިވާ މާއްދާތަކެއްކަން ދިރާސާތަކުން ދައްކާ ކަމަށެވެ. އަދި ދުންފަތުގެ ނުސީދާ ދުމަށް ހުށަހެޅުމުން ކުޑަކުދިންނަށް ނޭވާ ހިއްލުމާއި، ފުއްޕާމޭގައި ޖަރާސީމު އަށަގަތުމާއި، ލޭގެ ކެންސަރު ޖެހުން ފަދަ ސިއްހީ މައްސަލަތައް ދިމާވާކަމަށް ވެސް ބަޔާނުގައި ފާހަގަކޮށްފައިވެއެވެ.
ބަޔާނުގައި ވޯލްޑް ހެލްތު އޯގަނައިޒޭޝަން (ޑަބްލިއުއެޗްއޯ) އާ ހަވާލާދީ ބުނެފައިވަނީ، ޕުއްޕާމެއަށް ޖެހޭ ކެންސަރު ބަލީގެ 85 އިންސައްތަ ސަބަބަކީ ދުންފަތުގެ ސީދާ ދުން ކަމަށާއި، އަހަރަކު 8 މިލިއަން މީހުން ދުންފަތުގެ އިސްތިއުމާލު ކުރުމުގެ ސަބަބުން އެކި ބަލިތަކުގައި މަރުވާ ކަމަށެވެ. މީގެ ތެރެއިން 1.3 މިލިއަން މީހުންނަކީ ދުންފަތުގެ ނުސީދާ ދުމުން ދުނިޔެ ދޫކުރަންޖެހޭ މީހުން ކަމަށްވެސް ބަޔާނުގައި ފާހަގަކޮށްފައިވެއެވެ.
އެމްއެމްއޭގެ ބަޔާނުގައި އިތުރަށް ބުނެފައިވަނީ ވޭޕާއި އީ ސިނގިރޭޓަކީ ގެއްލުން ކުޑަ އެއްޗެއް ކަމަށް ބުނާ ނަމަވެސް، އެ ބާވަތްތަކަކީ ސިއްހަތަށް ގެއްލުން ހުރި ބާވަތްތައް ކަމަށް އެތައް ދިރާސާއަކުން ސާބިތުވެފައިވާ ކަމަށެވެ. އަދި ވޭޕްގައި އެކުލެވޭ ތަފާތު ފްލޭވާތަކަކީ ޒުވާން ޖީލު މިކަމަށް ދެވި ހިފުމަށް ބޭނުންކުރާ އުކުޅެއްކަން ރާއްޖޭގެ ތަފާސް ހިސާބުތަކުން ވެސް ހާމަވެފައިވާ ކަމަށް ވެސް ފާހަގަކޮށްފައިވެއެވެ.
މި ސަބަބުތަކަށްޓަކައި، ރާއްޖޭގައި ދުންފަތުގެ ބާވަތްތަކާއި ވޭޕް މަނާކުރުމަށް ފިޔަވަޅު އަޅަން ކަމާބެހޭ އިދާރާތަކަށް އެމްއެމްއޭއިން ވަނީ އިލްތިމާސްކޮށްފައެވެ.
އެމްއެމްއޭގެ މި ގޮވާލުމުގެ ކުރިން، ރާއްޖެއަށް ވޭޕް އެތެރެ ކުރުން މަނާކޮށްދިނުމަށް އެދި ގައިންގަޔަށް ނާރާ ބަލިތަކާ ދެކޮޅަށް މަސައްކަތްކުރާ މޯލްޑިވްސް އެންސީޑީ އެލަޔަންސްއިން ވަނީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ އަރިހުގައި އެދިފައެވެ. މިކަމާ ގުޅޭގޮތުން ސަރުކާރުން އަޅާނެ ފިޔަވަޅުތަކާ ބެހޭ ގޮތުން އަދި ވަކި އެއްޗެއް ބުނެފައެއް ނުވެއެވެ.