ސެޓްލައިޓް ބޭނުންކޮށްގެން ރާއްޖޭގެ ކަނޑުގެ ސަރަހައްދު ބެލެހެއްޓޭނެ ނިޒާމެއް ވަރަށް އަވަހަށް ގާއިމުކުރެވޭނެ ކަމަށް ޑިފެންސް މިނިސްޓަރު މުހައްމަދު ގައްސާން މައުމޫން ވިދާޅުވެއްޖެ އެވެ. މި ވާހަކަ އޭނާ ވިދާޅުވީ ދައުލަތުގެ މީޑިއާ ޕީއެސްއެމްއިން ގެނެސްދިން ޕްރޮގްރާމެއްގައެވެ.
ގައްސާން ވިދާޅުވި ގޮތުގައި މި ނިޒާމު ގާއިމުކުރުމަށް ޑިފެންސް މިނިސްޓްރީއާއެކު މަސައްކަތް ކުރަމުންދަނީ މޯލްޑިވްސް ސްޕޭސް ރިސާޗް އޮގަނައިޒޭޝަނުންނެވެ. އަދި މި މަސައްކަތުގައި އެމެރިކާގެ ނާސާއާއެކުވެސް މަޝްވަރާކުރަމުންދާ ކަމަށް އޭނާ ވިދާޅުވިއެވެ.
“މި މަސައްކަތުގެ ތެރެއިން އަޅުގަނޑުމެން މި ބަލަނީ ދިވެހިރާއްޖޭގަ އަޅުގަނޑުމެންގެ މެރިޓައިމް ޑޮމައިން އެވެއާނެސް. ވާހަކައަކީ، އަޅުގަނޑުމެންގެ މުޅި ސަރަހައްދު ބެލުމުގެ މަސައްކަތް ވަރަށް ކައިރި މުސްތަގުބަލެއްގެ ތެރޭގަ ސެޓްލައިޓް މެދުވެރިކޮށް ބެލޭނެ ނިޒާމެއްވެސް ގާއިމުކުރަން،” ގައްސާން ވިދާޅުވިއެވެ.
މި މަސައްކަތަކީ ރާއްޖޭގެ ބައިނަލްއަގުވާމީ ޒިންމާ އަމިއްލައަށް އުފުލައި، އެހެން ގައުމުތަކަށްވެސް ރާއްޖޭގެ ސަރަހައްދަކީ ސުލްހަވެރި ތަނަކަށް ހެދުމަށް ރައީސް މުޙައްމަދު މުއިއްޒު އަދުނާން ބޭނުންފުޅުވާތީ ކުރެވޭ މަސައްކަތެއް ކަމަށް ޑިފެންސް މިނިސްޓަރު ވިދާޅުވިއެވެ.
ރާއްޖޭގެ ކަނޑުގެ ސަރަހައްދު ބައިނަލްއަގުވާމީ ދުނިޔެއަށް މުހިންމުވަނީ ރާއްޖޭގެ އުތުރުން އޮންނަ 8 ޑިގްރީ ޗެނަލް މެދުވެރިކޮށް މުދާ އުފުލާ ގިނަ ބޯޓުތައް ދަތުރުކުރާތީ ކަމަށާއި، އެ ވިޔަފާރިތަކަށް އަމާޒުކޮށް ކުށްވެރިން ރޭވުންތައް ރާވާ ކަމަށްވެސް ގައްސާން ފާހަގަކުރެއްވިއެވެ.
މިއަހަރު ކުރީކޮޅު ދައުލަތުން ބޮޑު ޚަރަދެއް ކޮށްގެން ތުރުކީން ގަތް ޑްރޯންތަކަކީވެސް މި އަމާޒަށް ވާސިލުވުމަށް ކުރި މަސައްކަތެއް ކަމަށާއި، އެ ޑްރޯންތަކުން ހަމަލާދޭން ޖެހިއްޖެ ހާލަތެއްގައި ހަމަލާ ދެވޭނެކަމަށްވެސް ޑިފެންސް މިނިސްޓަރު ވިދާޅުވިއެވެ. މިހާރުވެސް އެ ޑްރޯންތައް ބޭނުންކޮށްގެން ރާއްޖޭގެ ކަނޑުގެ ސަރަހައްދު ވަރަށް ފުރިހަމައަށް ބެލެހެއްޓޭ ކަމަށް އޭނާ ވިދާޅުވިއެވެ