ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު އަވަހާރަކޮށްލާނެކަމަށް ބުނެ އިންޒާރުދިން މައްސަލާގެ ހަލުވި ތަހުގީގެއް ހިންގުމަށް މޯލްޑިވްސް ނެޝަނަލް ޕާޓީ (އެމްއެންޕީ) އިން މިއަދު ގޮވާލައިފިއެވެ.
އެމްއެންޕީއިން ނެރުނު ބަޔާނެއްގައި ބުނީ ރައީސުލްޖުމްހޫރިއްޔާ އަވަހާރަކޮށްލާނެކަމަށް ބުނެ، ސޯޝަލް މީޑިއާގައި މީހަކު ފާޅުގައި އިންޒާރުދިން މައްސަލަ ހަރުކަށި އިބާރާތުން ކުށްވެރިކުރާ ކަމަށެވެ.
ރައީސުލްޖުމްހޫރިއްޔާގެ ފުރާނަފުޅަށް ގެއްލުންވާނެފަދަ އަމަލެއް ހިންގާނެ ކަމަށް ވަރަށް ފާޅުގައި މީހަކު ބުނެފައިވާތީ އެ މައްސަަލައަކީ ސީރިއަސް މައްސަލައެއްގެ ގޮތުގައި ބަލައި، މި މައްސަލާގައި އެކަށީގެންވާ ހަލުވި ތަހުގީގެއް ހިންގުމަށް އެމްއެންޕީއިން ވަނީ ގާނޫނު ތަންފީޒުކުރާ ތަހުގީގީ އިދާރާތަކަށް ގޮވާލައިފައެވެ.
ރައީސުލްޖުމްހޫރިއްޔާގެ ސަލާމަތާއި ރައްކާތެރިކަން ކަށަވަރު ކުރުމުގެ ޒިންމާ އޮތް ދައުލަތުގެ އިދާރާތަކުން ރައީސުލްޖުމްހޫރިއްޔާގެ ސަލާމަތާއި ރައްކާތެރިކަން ކަށަވަރު ކުރުމުގެ މަސައްކަތްތައް އެންމެ އެކަށީގެންވާ ގޮތެއްގައި ކުރިއަށްގެންދާނެ ކަމާމެދު އެ ޕާޓީން ޝައްކު ނުކުރާ ކަމަށް ވެސް އެމްއެންޕީއިން ވަނީ ބުނެފައެވެ.
ރައީސުލްޖުމްހޫރިއްޔާ ޑރ.މުޢިއްޒު އަވަހާރަކޮށްލާނެ ކަމަށް ބުނެ، ސޯޝަލް މީޑިއާގައި މީހަކު ފާޅުގައި އިންޒާރުދިނީ ރޭގައެވެ. އިންޒާރު ދިނީ ”Ablor Myad Yosef” ގެ ނަމުގައި ސޯޝަލްމީޑިއާގައި ހަރަކާތްތެރިވާ މީހެކެވެ.
ރައީސުލްޖުމްހޫރިއްޔާ އަވަހާރަކޮށްލާނެ ކަމަށް ބުނެ އޭނާ އިންޒާރު ދިނީ ރައީސުލްޖުމްހޫރިއްޔާގެ ސޯޝަލްމީޑިއާ ޕޭޖުން ރޭ ގެނެސްދިން ލައިވްއަށް ކުރި ކޮމެންޓެއްގައެވެ. ޕޭޖުން އޭރު ލައިވްކުރަމުން ދިޔައީ އދ. ގެ އާންމު މަޖިލީހުގެ ހަވާސާގައި ބޭއްވި ބައްދަލުވުމުގައި ރައީސް ރޭ ދެއްވި ތަގުރީރެވެ.
މި މައްސަލާގައި މީޑިއާތަކަށް މައުލޫމާތު ދެމުން ފުލުހުން ބުނީ ރައީސުލްޖުމްހޫރިއްޔާއަށް މަރުގެ އިންޒާރު ދިން މައްސަލަ ސީރިއަސް މައްސަލައެއްގެ ގޮތުގައި ބަލަމުން އަންނަ ކަމަށެވެ.
މި މައްސަލާގައި މިހާތަނަށް މީހަކު ހައްޔަރުކޮށްފައިނުވާ ކަމަށް ވެސް ފުލުހުން ވަނީ ބުނެފައެވެ.