ކަނޑު ދަތުރުފަތުރު ކުރުމުގެ ކަންކަމުގައި އަންހެނުންގެ ދައުރު ފުޅާކުރުމަށް ކެމްޕޭނެއް ކުރިއަށް ގެންދިއުމަށް ޓްރާންސްޕޯޓް މިނިސްޓްރީން ނިންމައިފިއެވެ.
މިއަހަރުގެ ކަނޑު ދަތުރުފަތުރުގެ ދުވަހާ ގުޅިގެން މިނިސްޓަރ އޮފް ޓްރާންސްޕޯޓް އެންޑް ސިވިލް އޭވިއޭޝަން މުޙައްމަދު އަމީން ދެއްވި ޚިޠާބުގައި ވިދާޅުވީ ދަތުރުފަތުރުގެ ދާއިރާއަށް ޒުވާނުން ނުކުތުމުގެ މުހިއްމުކަން ވަރަށް ބޮޑު ކަމަށާއި މީގެތެރޭގައި އަންހެނުން މި ދާއިރާއަށް ނުކުތުމަކީ އަންހެނުން ބާރުވެރިކުރުމަށް މުހިއްމު ކަމެއް ކަމަށެވެ.
މިންތީގެ ހަމަހަމަކަން ގާއިމުކުރުމަށް ބާރުއަޅަމުންދާ މިފަދަ ޒަމާނެއްގައި ކަނޑުދަތުރުފަތުރު ކުރުމުގެ އެންމެހައި ކަންކަމުގައި އަންހެނުންގެ ދައުރު ފުޅާކޮށް މިކަމަށް މަގުފަހިކުރުމަށްޓަކައި އެ މިނިސްޓްރީއިން ވަރަށް ބޮޑު އިސްކަމެއްދޭ ކަމަށް ވެސް މިނިސްޓަރު ވިދާޅުވިއެވެ.
މިނިސްޓަރު ވިދާޅުވީ އެގޮތުން ކެމްޕޭނެއް ކުރިއަށް ގެންދިއުމަށް ނިންމާފައިވާ ކަމަށެވެ.
ނަމަވެސް މި ކެމްޕޭން ފަށާނެ އިރެއް ހާމައެއް ނުކުރައްވައެވެ.
ކޮންމެ އަހަރެއްގެ ވެސް ސެޕްޓެމްބަރު މަހުގެ ފަހު ބުރާސްފަތި ދުވަހަކީ ބައިނަލްއަގުވާމީ ކަނޑުދަތުރުފަތުރުގެ ދުވަހެވެ.
އިންޓަނޭޝަނަލް މެރިޓައިމް އޯގަނައިޒޭޝަން (އައިއެމްއޯ) އިން މިއަހަރުގެ ކަނޑު ދަތުރުފަތުރުގެ ދުވަހަށް ކަނޑައަޅާފައިވާ ޚާއްސަ ޝިއާރަކީ “މުސްތަގުބަލަށް ދަތުރުކުރުން: ފުރަތަމަ ރައްކާތެރިކަން” މި ޝިއާރެވެ.