ގްރީންހައުސް ގޭސް މަދުކުރުމުގައި ކަނޑު ދަތުރުފަތުރުގެ ދާއިރާއިން ކުރެވެން ހުރި ކަންކަން ދެނެގަނެ، އަމަލީ ގޮތުން ކުރެވެން ހުރި ހުރިހާ ކަމެއް ކުރައްވާނެ ކަމަށް މިނިސްޓަރ އޮފް ޓްރާންސްޕޯޓް އެންޑް ސިވިލް އޭވިއޭޝަން މުޙައްމަދު އަމީން މިއަދު ވިދާޅުވެއްޖެއެވެ.
މިނިސްޓަރު މިހެން ވިދާޅުވީ މި އަހަރުގެ ކަނޑު ދަތުރުފަތުރުގެ ދުވަހާ ގުޅިގެން ދެއްވި ޚިޠާބެއްގައެވެ.
އިންޓަނޭޝަނަލް މެރިޓައިމް އޯގަނައިޒޭޝަން (އައިއެމްއޯ) އިން މިއަހަރުގެ ކަނޑުދަތުރުފަތުރުގެ ދުވަހަށް ކަނޑައަޅާފައިވާ ޚާއްސަ ޝިއާރަކީ “މުސްތަގުބަލަށް ދަތުރުކުރުން: ފުރަތަމަ ރައްކާތެރިކަން” މި ޝިއާރެވެ.
މިނިސްޓަރު ވިދާޅުވީ އައިއެމްއޯ އިން 76 އަހަރުގެ ތަޖުރިބާއާއެކު ކަނޑު ދަތުރުފަތުރުގެ މަސައްކަތްތަކުގައި ރައްކާތެރިކަމަށް އިސްކަންދިނުމަކީ އެންމެ އިސްކަންދޭ އަސާސް ކަމަށެވެ. އަދި އާ ޓެކްނޮލޮޖީތަކާއިއެކު ޒަމާނަށް ފެތޭގޮތަށް ގަވާއިދުތައް ބަދަލުކުރަމުންދަނީ ކަނޑު ދަތުރުފަތުރު ކުރުމުގައި އިންސާނުންނާއި އުޅަނދުފަހަރުގެ ސަލާމަތާއި ރައްކާތެރިކަމަށް އިސްކަންދީ ބާރުއަޅައި އެކަމަށް މީހުން އަހުލުވެރިކުރުމަށް ކަމަށެވެ.
ދިވެހިރާއްޖޭގައި ވެސް މިދާއިރާގެ ކަންތައްތައް ކުރިއަށް ގެންދާނީ ސަލާމަތާއި ރައްކާތެރިކަން ކުރިއަށް ނެރެގެން ކަމަށާއި ރައްޔިތުންނަށް ފަސޭހަކަމާއިއެކު ދަތުރުފަތުރުގެ އެންމެހައި ކަންތައްތައް ކުރެވޭނެ ގޮތްގޮތަށް މަގުތައް ކޮށައި އާރާސްތުކޮށްގެން ކަމަށް މިނިސްޓަރު ވިދާޅުވިއެވެ.
މިނިސްޓަރު ވިދާޅުވީ ކަނޑުމަތީގެ ދާއިރާގައި ޓެކްނޮލޮޖީގެ އިންގިލާބެއް އައިސްފައިވާ ކަމަށާއި އެގޮތުން ޑިޖިޓަލައިޒޭޝަންއާއި އޮޓޮމޭޝަންގެ ރޮނގުން ބޮޑެތި ބަދަލުތަކެއް ދާއިރާއަށް އައިސްފައިވާ ކަމަށެވެ. އަދި މިކަމުގެ ސަބަބުން އާއްމު ސަލާމަތާއި ރައްކާތެރިކަން ވަރުގަދަކުރުމަށާއި މީހުންގެ ހޭލުންތެރިކަން އިތުރުކުރުމަށް ފުރުސަތުތަކެއް ފަހިވެފައިވާކަން ވެސް މިނިސްޓަރު ފާހަގަކުރެއްވިއެވެ.
މީގެއިތުރުން މިނިސްޓަރު ވިދާޅުވީ ތިމާވެށި ރައްކާތެރިކުރުމަށް މަސައްކަތްކުރުމަކީ އަދުގެ ސަރުކާރުން ވަރަށް ބޮޑު އިސްކަމެއް ދެއްވަވާ ކަމެއް ކަމަށެވެ. މިގޮތުން ގްރީންހައުސް ގޭސް މަދުކުރުމުގައި ކަނޑުދަތުރުފަތުރުގެ ދާއިރާއިން ކުރެވެން ހުރި ކަންކަން ދެނެގަނެ، އަމަލީ ގޮތުން ކުރެވެން ހުރި ހުރިހާ ކަމެއް ކުރައްވާނެ ކަމަށް މިނިސްޓަރު ވިދާޅުވިއެވެ.
ދުނިޔޭގެ ވިޔަފާރީގެ %90 ހިމެނޭ މުދާ އެއްތަނުން އަނެއްތަނަށް ގެންދެވެނީ ކަނޑުމަގުންކަން ފާހަގަކުރައްވައި މިނިސްޓަރު ވިދާޅުވީ މިކަމުގައި ރައްކާތެރިކަން އިތުރުކުރުމަކީ ދެމެހެއްޓެނިވި އިގުތިސާދީ ކުރިއެރުމަށް ވަރަށް މުހިއްމުކަމެއް ކަމަށެވެ. ދެމެހެއްޓެނިވި ތަރައްގީއަކީ އދ. ގެ ވަރަށް ގިނަ ލަނޑުދަނޑިތައް ހާސިލްކުރުމަށް މަގުފަހިކޮށްދޭ އަމާޒެއް ކަމަށާއި، ސާފުހަކަތަ، އިގުތިސާދީ އަދި އީޖާދީ ކުރިއެރުންތައް، މޫސުމަށް އަންނަ ބަދަލުތަކަށް ހައްލު ހޯދުމާއި ކަނޑުގެ ރީތިކަން ހިމާޔަތްކުރުން ވެސް އދ. ގެ ލަނޑުދަނޑިތަކުގެ ތެރޭގައި ހިމެނޭކަން މިނިސްޓަރު ފާހަގަކުރެއްވިއެވެ.
މިނިސްޓަރު ވިދާޅުވީ ދިވެހިރާއްޖޭގެ އެއްމެހައި އިގުތިސާދީ މަސައްކަތްތައް ގުޅިފައިވަނީ ކަނޑާ ކަމަށެވެ. އެހެންކަމުން ދިވެހިރާއްޖޭގައި ކަނޑުދަތުރުފަތުރުގެ ރައްކާތެރިކަން ދެމެހެއްޓެނިވި ގޮތެއްގައި ކުރިއަށް ގެންދިޔުމުގެ މުހިންމުކަން ފުރިހަމައަށް ގަބޫލުކުރާ ބަޔަކަށް ދިވެހިން ވާންޖެހޭ ކަމަށް މިނިސްޓަރު ވިދާޅުވިއެވެ.