ސްޓެލްކޯގެ 51 މުވައްޒަފުންނާއެކު ލީޑަރޝިޕް އެންހޭންސްމަންޓް ޓްރެއިނިންގ ޕްރޮގްރާމްގެ 7 ވަނަ ބެޗު ފަށައިފިއެވެ.
މިކަން ފާހަގަކުރައްވައި ސްޓެލްކޯގެ މެނޭޖިންގ ޑިރެކްޓަރު ޙުސައިން ފަހުމީ އެކްސްގައި ކުރެއްވި ޕޯސްޓެއްގައި ވިދާޅުވީ މި ޕްރޮގްރާމަކީ ސްޓެލްކޯގެ ޓީމު ބާރުވެރިކުރުމަށް ކުރަމުންދާ މަސައްކަތުގައި އެޅުނު ވަރަށް މުހިންމު ފިޔަވަޅެއް ކަމަށެވެ. އަދި ލީޑަރޝިޕްގެ ހުނަރުތައް އިތުރުކުރުމަށްޓަކައި ކުންފުނީގެ 51 މުވައްޒަފުން އެއްތަނަކަށް ޖަމާވުމަކީ ވަރަށް ބޮޑު ހިތްވަރެއް ކަމަށެވެ.
މި ޕްރޮގްރާމުގެ ސަބަބުން މުވައްޒަފުންނަށާއި މުޅި ސްޓެލްކޯއަށް ވެސް ކާމިޔާބު މުސްތަގުބަލަކަށް މަގުފަހިވެގެންދާނެ ކަމަށް ފަހުމީ ވިދާޅުވިއެވެ.
މުޅި ކުންފުނީގެ ލީޑަރޝިޕް ކެޕޭސިޓީ މަތިކުރުމުގެ ފުޅާ މަސައްކަތުގެ ތެރެއިން ކުރިއަށްގެންދާ މި ޕްރޮގްރާމުގައި މިހާތަނަށް 368 އަށްވުރެ ގިނަ މުވައްޒަފުން ކާމިޔާބުކަމާއެކު ތަމްރީނުކުރެވިފައިވާ ކަމަށް ވެސް ފަހުމީ ވިދާޅުވިއެވެ. އަދި ކުރިއަށް އޮތް 12 މަސް ދުވަހުގެ ތެރޭގައި ކޮންމެ މުވައްޒަފަކަށްވެސް މި ފުރުސަތު ފޯރުކޮށްދިނުމަށް މަސައްކަތް ކުރައްވަމުން ގެންދަވާ ކަމަށް ފަހުމީ ވިދާޅުވިއެވެ.
ކުންފުނީގެ ލަނޑުދަނޑިތައް ހާސިލުކުރުމަށާއި، ކުންފުނި ކުރިއަށްގެންދިއުމަށްޓަކައި ހުރިހާ ލެވެލެއްގައިވެސް ހަރުދަނާ ލީޑަރޝިޕަކީ ވަރަށް މުހިންމު ކަމެއް ކަމަށް އަޅުގަނޑުމެން ދެކެން.
ފަހުމީ ވަނީ މި ޕްރޮގްރާމް ހިންގުމުގައި ދިވެހި އަސްކަރިއްޔާއަށް ދެއްވާ އެއްބާރުލުމާ އެހީތެރިކަމަށް ޝުކުރު އަދާކުރައްވައިފައެވެ.
ކޮމާންޑަރ އިން ޗީފް ރައީސް ޑރ. މުޙައްމަދު މުޢިއްޒާއި، މިނިސްޓަރ އޮފް ޑިފެންސް ޣައްސާން މައުމޫނާއި، ޗީފް އޮފް ޑިފެންސް ފޯސްއާއި އަދި މޯލްޑިވްސް ނޭޝަނަލް ޑިފެންސް ފޯސްގެ ލީޑަރޝިޕަށް އިޚްލާސްތެރިކަމާއެކު ޝުކުރު ދަންނަވަން.
ފަހުމީ ވިދާޅުވީ މި ތަމްރީނު ޕްރޮގްރާމުގެ ސަބަބުން ހަމައެކަނި މިކަމުގައި ޝާމިލުވާ ފަރާތްތަކަށް ފައިދާވުމުގެ އިތުރުން ސްޓެލްކޯއަށާއި މުޅި ގައުމަށް ވެސް ދާއިމީ އަސަރުތަކެއް ކުރާނެ ކަމަށެވެ.