ދުބާއީގެ މަޝްހޫރު ވިޔަފާރިވެރިއެއް ކަމުގައިވާ ޖަމާލް އަލް ނަދަކް އޭނާގެ އަނބިމީހާ ސައުދީ އަލް ނަދަކްއަށް 50 މިލިއަން އެމެރިކާ ޑޮލަރު (ގާތްގަނޑަކަށް 770 މިލިއަން ދިވެހި ރުފިޔާ) އަށް އަމިއްލަ ޖަޒީރާއެއް ގަނެދީފިއެވެ. މި ހަދިޔާގެ މައިގަނޑު މަޤްޞަދަކީ އޭނާގެ އަނބިމީހާއަށް އެއްވެސް ފަރާތެއްގެ ނުރުހުމެއް ނެތި، މަޖުބޫރުކަމަކާ ނުލައި ފުރިހަމަ މިނިވަންކަމާއެކު، ބިކިނީ ލައިގެން އަރާމުކޮށްލެވޭނެ މާޙައުލެއް ޤާއިމުކޮށްދިނުމެވެ.
މި ޚަބަރު ފެތުރުނީ ސޯޝަލް މީޑިއާގައި ސައުދީ ހިއްސާކުރި ވީޑިއޯއަކާ ގުޅިގެންނެވެ. އެ ވީޑިއޯގައި 26 އަހަރުގެ ސައުދީ ވަނީ އޭނާގެ ކުރީގެ އާދައިގެ ދިރިއުޅުމުގެ ތަފްޞީލުތަކާއި، އަލަށް ލިބުނު އަމިއްލަ ރަށަށް ޗާޓަރު ބޯޓެއްގައި ދިޔަ މަންޒަރު ދައްކުވައިދީފައެވެ. އަދި އެ ރަށުގެ ޤުދުރަތީ މުއްސަނދިކަމާއި، ގަސްގަހާގެހި، އަދި ޚާއްޞަކޮށް ތައްޔާރުކޮށްފައިވާ ގެއެއްގެ މަންޒަރުތައްވެސް ހިމަނާފައިވެއެވެ.
ސައުދީ އާއި ޖަމާލް ފުރަތަމަ ބައްދަލުވީ ދުބާއީގައި ތަޢުލީމު ޙާޞިލުކުރަމުންދަނިކޮށެވެ. އަދި އޭގެ ތިން އަހަރު ފަހުން އެ ދެމީހުން ވަނީ ކައިވެނިކޮށްފައެވެ. ނަމަވެސް، ސައުދީ އެ ރަށުގެ ވަކި ލޮކޭޝަން އާންމުކޮށް ހާމަކޮށްފައެއް ނުވެއެވެ. އޭނާ ހަމައެކަނި ބުނެފައިވަނީ އެ ރަށަކީ އޭޝިއާގެ ބައެއް ކަމަށެވެ.
މި ހަދިޔާއާ ގުޅިގެން ގިނަ ފާޑުކިޔުންތަކާ ކުރިމަތިލާންޖެހުނު ނަމަވެސް، ސައުދީ ވަނީ އޭނާގެ “ޕްރައިވަސީއަށްޓަކައި ފިރިމީހާ ދިން ހަދިޔާ”އާމެދު ފަޚުރުވެރިވާ ކަމަށް ބުނެފައެވެ.
މި ހާދިސާއިން އަލިއަޅުވާލަނީ އަމިއްލަ މިނިވަންކަމާއި ޕްރައިވެސީއަށް އިންސާނުން ދޭ އަގާއި، މުއްސަނދިންނަށް ލިބިފައިވާ އިޚްތިޔާރުތަކާއި، އެމީހުންގެ ދިރިއުޅުމުގެ ފެންވަރުގެ މައްޗަށެވެ. އަދި ހަމައެހެންމެ، މުޖުތަމަޢުގެ އާދަކާދަތަކާއި އުޞޫލުތަކަށް އިޙްތިރާމްކުރުމުގެ މުހިންމުކަމާއި، ހުރިހާ ފަރުދުންނަށް ވެސް އެކަށީގެންވާ މިންވަރެއްގެ ޕްރައިވެސީއާއި މިނިވަންކަން ލިބިދިނުމުގެ މުހިންމުކަމުގެ މައްޗަށެވެ.