ސަލްމާން މިސްކިތުގެ އިމާމަކަށް އައްޔަނު ކޮށްފައިވާ އިސްލާމިކް މިނިސްޓްރީގެ ޑެޕިއުޓީ މިނިސްޓަރު އަބްދުލްޖަލީލް އިސްމާއިލާ ގުޅޭ ފޯޖަރީގެ މައްސަލައެއް ފުލުހުން ބަލަން ފަށައިފިއެވެ.
ފުލުހުން ބުނީ، މި މަހުގެ 19 ވަނަ ދުވަހު ޖަލީލާ ގުޅޭ ފޯޖަރީގެ މައްސަލައެއް ރިޕޯޓްކޮށްފައިވެއެވެ. މި މައްސަލަ މިހާރު ދަނީ ތަޙްޤީޤު ކުރެވެމުން ކަމަށްވެސް ފުލުހުން ވަނީ ހާމަކޮށްފައެވެ..
މީގެ އިތުރުން، މި މަހުގެ 23 ވަނަ ދުވަހު ފިހާރައެއްގެ ތެރޭގައި ދެ ފަރާތެއްގެ މެދުގައި ހިނގި ހަމަނުޖެހުމުގެ މައްސަލައެއް ވެސް ރިޕޯޓްކޮށްފައިވާ ކަމަށް ފުލުހުން ވިދާޅުވިއެވެ. މި މައްސަލަ ވެސް މިހާރު ދަނީ ތަޙްޤީޤު ކުރެވެމުންނެވެ. މި ހަމަނުޖެހުމުގައި ޖަލީލް ބައިވެރިވި ކަމަށް ބެލެވޭ ވީޑިއޯއެއް ސޯޝަލް މީޑިއާގައި ފެތުރިފައިވެއެވެ.
މި މައްސަލަތަކާ ގުޅިގެން އިސްލާމިކް މިނިސްޓްރީން އަދި އެއްވެސް ބަޔާނެއް ނެރެފައެއް ނުވެއެވެ. އަދި އަބްދުލްޖަލީލް އިސްމާއިލްގެ ފަރާތުން ވެސް މި މައްސަލައާ ގުޅޭ ގޮތުން އެއްވެސް ބަހެއް ދައްކާފައެއް ނުވެއެވެ.