މާލޭގެ ގެއެއްގައި ކުއްލި ގޮތަކަށް ނިޔާވި ވިޔަފާރިވެރިޔާ ހާޝިމް މުހައްމަދުގެ ވިޔަފާރީގެ ލިޔެކިޔުންތައް ފޯޖުކޮށް އަމިއްލަ ނަމަށް ބަދަލުކުރި ކަމަށް ކުރެވޭ ތުހުމަތުތައް އިސްލާމިކް މިނިސްޓްރީގެ ޑެޕިއުޓީ މިނިސްޓަރު އަބްދުލް ޖަލީލް އިސްމާއިލް މިރޭ ދޮގުކުރައްވައިފިއެވެ.
އަބްދުލް ޖަލީލް ނެރުއްވި ބަޔާނެއްގައި ވިދާޅުވެފައިވަނީ، މަރުހޫމް ހާޝިމްގެ ވިޔަފާރިތައް އޭނާގެ ނަމަށް ބަދަލުކުރި ކަމަށް ބުނެ ހާޝިމްގެ އާއިލާއިން ދައްކަމުންދާ ވާހަކަތަކަކީ އެއްވެސް ހަގީގަތެއް އެކުލެވިގެންނުވާ ދޮގު ވާހަކަތަކެއް ކަމަށެވެ.
"ހާޝިމް މި ދުނިޔެ ދޫކުރުމަށްފަހު ހާޝިމްގެ އެއްވެސް ވިޔަފާރިއެއް ނުވަތަ މުދަލެއް އަޅުގަނޑު ނަމަށް ބަދަލުކޮށްފައި ނުވާނެއެވެ. އަދި އެއިން މުދަލެއް އަޅުގަނޑުގެ ނަމަށް ބަދަލުކުރަން ވެސް އެއްވެސް މަސައްކަތެއް ކޮށްފައެއްނުވާނެއެވެ،" ޖަލީލްގެ ބަޔާނުގައި ވިދާޅުވެފައިވެއެވެ.
މީގެ އިތުރުން، މިދިޔަ ހޯމަ ދުވަހު ހާޝިމްގެ އާއިލާއިން ކަމަށް ބުނާ ބަޔަކު އޭނާގެ ފިހާރައަކަށް ގަދަކަމުން ވަދެ، މުވައްޒަފުންނަށް ބިރުދައްކައި، ތަކެތި ފޭރިގަތް ކަމަށް ޖަލީލް ވަނީ ހާމަކުރައްވާފައެވެ. އަދި މިކަމަކީ އޭނާގެ ބޮލުގައި ދޮގު ތުހުމަތުތައް އަޅުވުމަށް ކުރި ކަމެއް ކަމަށް ވެސް ވިދާޅުވެފައިވެއެވެ.
މާފަންނުގެ ގެއެއްގައި ހއ. ހޯރަފުށި ޑީންސްވިލާ، ހާޝިމް (44) ނިޔާވެފައި އޮއްވާ ފެނުނީ 2022 ވަނަ އަހަރުގެ ޖެނުއަރީ 2 ވަނަ ދުވަހުއެވެ. މި މައްސަލައިގައި ފުލުހުން ވަނީ ތަހުގީގު ނިންމުމަށްފަހު މައްސަލަ ފައިލްކޮށްފައެވެ.
ޖަލީލް ވިދާޅުވެފައިވަނީ މި މައްސަލައާ ގުޅިގެން ފުލުހުންގެ ތަހުގީގަށާއި ޝަރުއީ ކޯޓުތަކަށް ވެސް ފުރިހަމަ އެއްބާރުލުން ދޭން ހުންނެވީ ތައްޔާރަށް ކަމަށެވެ. އަދި މި މައްސަލައިގެ ހަގީގަތް ދިވެހި ރައްޔިތުންނަށާއި މީޑިއާއަށް އަދި ފުލުހުންގެ ތަހުގީގަށް ހާމަވެގެންދާނެ ކަމުގެ ޔަގީންކަން އޮތް ކަމަށް ވެސް ވިދާޅުވެފައިވެއެވެ.