އުރަމަތީގެ ކެންސަރަކީ ގިނަ މީހުން ދެކޭގޮތުގައި ހަމައެކަނި އަންހެނުންނަށް ޖެހޭ ބައްޔެކެވެ. ނަމަވެސް، މިއީ ފިރިހެނުންނަށްވެސް ޖެހޭ ބައްޔެކެވެ. ތަފާސް ހިސާބުތަކުން ދައްކާގޮތުގައި އުރަމަތީގެ ކެންސަރު ޖެހޭ ފިރިހެނުންގެ އަދަދު މަދުނަމަވެސް، މި ބަލީގެ ސަބަބުން މަރުވާ ފިރިހެނުންގެ އަދަދު ނިސްބަތުން ގިނަ ކަމަށް ތަފާސް ހިސާބުތަކުން ދައްކައެވެ.
މި ކަމުގެ މައިގަނޑު ސަބަބުތަކުގެ ތެރޭގައި ހިމެނެނީ:
- ފިރިހެނުންގެ މެދުގައި އުރަމަތީގެ ކެންސަރާ ގުޅޭގޮތުން ހޭލުންތެރިކަން ކުޑަވުން.
- ބަލި ދެނެގަތުމަށް ނަގާ މުއްދަތު ދިގުވުން އަދި ޑޮކްޓަރީ ފަރުވާ ހޯދުމަށް ލަސްވުން.
- ގިނަ މީހުން ގަބޫލު ކުރާ ގޮތުގައި އުރަމަތީގެ ކެންސަރަކީ ހަމައެކަނި އަންހެނުންނަށް ޖެހޭ ބައްޔެއް ކަމަށް ދެކުން.
ސިއްހަތާ ގުޅޭ ކަންކަމުގައި މައުލޫމާތު ހޯދަން ޖެހިލުން ނުވޭ……ފޮޓޯ:ފްލަޔަރ
ފިރިހެނުންނަށް ޖެހޭ އުރަމަތީގެ ކެންސަރުގެ ދެ ބާވަތް ހިމެނެއެވެ.
ފިރިހެނުންގެ އުރަމަތީގެ ކެންސަރު މަދުން ނަމަވެސް ދިމާވެދާނެ ކަމަށާއި އާންމުކޮށް ކެޓަގަރީ ކުރެވެނީ އަންހެނުންގެ އުރަމަތީގެ ކެންސަރާ އެއްގޮތަށެވެ. ފިރިހެނުންނަށް އުރަމަތީގެ ކެންސަރުގެ މައިގަނޑު ވައްތަރުތަކުގެ ތެރޭގައި ހިމެނެނީ؛
- އިންވޭސިވް ޑަކްޓަލް ކާސިނޯމާ (IDC): މިއީ ފިރިހެނުންގެ އުރަމަތީގެ ކެންސަރުގެ އެންމެ އާންމު ވައްތަރެވެ. މިއީ ކިރު ޑަކްޓްތަކުން ފެށިގެން ގޮސް ކައިރީގައި ހުންނަ ޓިޝޫތަކަށް ޖެހޭ ބާވަތެވެ. މާނައަކީ އުރަމައްޗަށް ކިރުގެނެސްދޭ ހޮޅިތަކަށް ޖެހޭ ކެންސަރެވެ. (ފިރިހެނުންގެ އުރަމަތީގެ ކިރު އުފައްދާ ގްލޭންޑްތައް އަންހެނުންނާ އެއްހަމައެއްގައި މަސައްކަތް ނުކުރިކަމުގައި ވިޔަސް ހަށިގަނޑުގެ މިހުރިހާ ބައިތަކެއް ފިރިހެނުންގެވެސް ލައްވާފައިވެއެވެ.)
- އިންވޭސިވް ލޮބިއުލަރ ކާސިނޯމާ (ILC): މި ބާވަތް ފެށެނީ ލޮބިއުލްސް (ކިރު އުފައްދާ ގްލޭންޑްސް) އިން ނަމަވެސް ފިރިހެނުންގެ ގައިގައި މަދުވަނީ ލޮބިއުލްސް މަދުވުމުން މިވައްތަރުގެ ކެންސަރު ޖެހުން ވަރަށްވެސް ބޮޑަށް ނާދިރު ކަމަކަށް ސިއްހީ މާހިރުން ފާހަގަކުރެއެވެ.
- ޑަކްޓަލް ކާސިނޯމާ އިން ސިޓޫ (DCIS): މިއީ ޑަކްޓްގެ ލައިނިންގ އިން އާދަޔާ ހިލާފު ސެލްތައް ފެނިފައި ނަމަވެސް ޑަކްޓްގެ ބޭރަށް ފެތުރިފައި ނުވާ ނޮން އިންވޭސިވް ކެންސަރެކެވެ.
- ޕެޖެޓްސް ޑިޒީޒް އޮފް ދަ ނިޕްލް: މި ބާވަތް ފެށެނީ މައިޑަކްޓްތަކުން ނަމަވެސް އޭގެ ފަހުން މައި ފަށަލައާއި އެރިއޯލާއަށް ފެތުރެއެވެ.
- އިންފްލެމެޓަރީ ބްރެސްޓް ކެންސަރ: މިއީ އުރަމަތީގެ ކެންސަރުގެ މަދުން ނޫނީ ނުފެންނަ ވައްތަރެއް ކަމުން އުރަމަތި ރަތްވެ، ދުޅަވެ، ހޫނުވާނެ ކަމަށް ސިއްހީމާހިރުް ބުނެފައިވެއެވެ.
- ލޮބިއުލަރ ކާސިނޯމާ އިން ސިޓޫ (އެލްސީއައިއެސް): ހަގީގީ ކެންސަރެއް ނޫން ނަމަވެސް، އެލްސީއައިއެސް އަކީ އުރަމަތީގެ ކެންސަރު ޖެހުމުގެ ނުރައްކާ އިތުރުވާކަން ދައްކުވައިދޭ ނިޝާނެކެވެ.
ސިއްހަތަށް ނުރައްކާ ވާކަހަލަ އެއްވެސް ކަމެއްގައި ޑޮކްޓަރުންނާ ހަމައަށް ދާން ފަސްކޮށް ލަދު ނުގަނޭ…..ފޮޓޯ:ފްލަޔަރ
މި ބާވަތްތައް ދެނެގަތުމަކީ އަވަހަށް ދެނެގަނެ ފަރުވާ ދިނުމުގައި އެހީތެރިވެދޭނެ ކަމެކެވެ. މިއީ ދުޅަަހެޔޮ ސިއްހަތެއްގައި ހުންނަ ކޮންމެމީހަކަށްވެސް ލިބިފައި ހުރުން އެންމެ ރަނގަޅު އިލްމެކެވެ. ތިމާއަށް ނުވަތަ ތިމާއަށް އެނގޭ މީހަކަށް އަލާމާތްތައް ފެންނަނަމަ ނުވަތަ ކަންބޮޑުވުންތަކެއް ހުރިނަމަ، ރަނގަޅަށް ޑައިގްނޯސްކޮށް ފަރުވާ ހޯދުމަށް ސިއްހީ ދާއިރާގެ ޕްރޮފެޝަނަލަކާ މަޝްވަރާކުރުން މުހިންމެވެ. އަދި އެކަން ކުރެވޭނީ މިފަދަ މަދުން ނޫނީ ނުދައްކާ ވާހަކަތައް ދައްކައި މަދު އިލްމުން އިލްމު ލިބިގެން ހުރުމުންނެވެ.
ފިރިހެނުންނަށް އުރަމަތީގެ ކެންސަރުގެ ނުރައްކާ ބޮޑުވަނީ އަންހެނުންނަށްވުރެ މެމަރީ ގްލޭންޑްސް މަދުވުމުގެ ސަބަބުންނެވެ. މިކަމުގެ ސަބަބުން ކެންސަރު އަވަހަށް މަސްގަނޑަށާއި ކަށްޓަށް އަދި އެހެނިހެން ގުނަވަންތަކަށް ފެތުރިގެންދެއެވެ.
ސިއްހަތާ ގުޅޭ ކަންކަމުގައި މައުލޫމާތު ހޯދަން ޖެހިލުން ނުވޭ……ފޮޓޯ:ފްލަޔަރ
ފިރިހެނުންނަށް ޖެހޭ އުރަމަތީގެ ކެންސަރުގެ އާންމު އަލާމާތްތައް:
- އުރަމަތިން ތަންކޮޅެއް ބޯވުން ނުވަތަ ރިހުމެއް އިހުސާސް ނުވި ނަމަވެސް ގަނޑުލައިފަ، ލަމްޕެއް ހުރުން
- އުރަމަތީގެ ހަންގަނޑު ރަތްވުން
- ހަންފޮޅުން ނުވަތަ ކުރަކިވުން
- އުރަމަތިން ފްލުއިޑް، ކޮންމެވެސް މިންވަރަކަަށް ވިޔަސް ދިޔަ ފޭބުން
- ވައްގަނޑު ރަތްވުން ނުވަތަ ހަންފޮޅުން
ފިރިހެނުންގެ ކިބައިން އުރަމަތީގެ ކެންސަރު ދެނެގަތުން ލަސްވަނީ ގިނަ ފިރިހެނުންނަކީ ޑޮކްޓަރީ ފަރުވާ ހޯދުމަށް ފަސްޖެހޭ ބައެއް ކަމަށްވާތީއެވެ. ހާއްސަކޮށް މެމޯގްރަފީ (އުރަމަތީގެ ސްކޭން) ހެދުމަކީ ދަތި ކަމަކަށް ވާތީ އެވެ. ލަދުވެތި ކަމެއްކަމުގެ ކުށްހީ ކުރެވޭތީއެވެ މިކަމުގެ ހައްލެއްގެ ގޮތުން ސޮނޯގްރަފީ އާއި ބައޮޕްސީ ހެދިދާނެއެވެ.
ފިރިހެނުންނަށްވެސް އުރަމަތީގެ ކެންސަރު ޖެހޭ……..ފޮޓޯ:ފްލަޔަރ
ސިއްހަތާ ގުޅޭ ކަންކަމުގައި ލަދުގަތުމަކީ ރަނގަޅުކަމެއް ނޫނެވެ. އެއީ ފުރާނައާ ގުޅިފައިވާ ކަމެކެވެ. ވީމާ، އިސްވެ ދެންނެވުނު ފަދަ އަލާމާތެއް ފެނިއްޖެނަމަ ނުވަތަ ޝައްކުވެއްޖެނަމަ ވީހާވެސް އަވަހަކަށް ސިއްހީ އެހީތެރިކަން ހޯދުމަކީ އެންމެ ރަނގަޅު ގޮތެވެ. އަވަހަށް ފަރުވާ ހޯދުމަކީ މި ބަލީގެ ނުރައްކަލުން ސަލާމަތްވުމަށް އޮތް އެންމެ ބޮޑު ފުރުސަތެވެ.
އުރަމަތީގެ ކެންސަރަކީ ފިރިހެނުންނަށްވެސް ޖެހޭ ބައްޔެއްކަން ގަބޫލުކުރަން ޖެހެއެވެ. މި ކަމާ ގުޅޭގޮތުން މުޖުތަމައުގެ ހޭލުންތެރިކަން އިތުރުކުރުމަކީ ވަރަށް މުހިންމު ކަމެކެވެ. ސިއްހީ ދާއިރާއިން މިކަމާ ގުޅޭ މައުލޫމާތު ފޯރުކޮށްދިނުމާއި، ސްކްރީނިންގ ޕްރޮގްރާމްތައް ހިންގުމަކީ މި ބަލި ކުރިން ދެނެގަތުމަށް އެޅިދާނެ މުހިންމު ފިޔަވަޅުތަކެކެވެ.
އުރަމަތީގެ ކެންސަރަކީ ހަމައެކަނި އަންހެނުންނަށް ޖެހޭ ބައްޔެއް ނޫނެވެ. ފިރިހެނުންނަށްވެސް މި ބަލި ޖެހިދާނެއެވެ. އެހެންކަމުން، ކޮންމެ ޖިންސެއްގެ މީހުންވެސް މިކަމާމެދު ސަމާލުވެ، އަމިއްލަ ހަށިގަނޑަށް އަޅާލައި، ޝައްކުވާ ކަމެއް ފާހަގަވެއްޖެނަމަ ލަސްނުކޮށް ޑޮކްޓަރެއްގެ ލަފާ ހޯދުމަކީ ވަރަށް މުހިންމު ކަމެކެވެ. ހަމައެއާއެކު، މުޖުތަމައުގެ ފަރާތުން މިފަދަ ބަލިތަކާ ކުރިމަތިލާ ފިރިހެނުންނަށް ބޭނުންވާ އެހީތެރިކަމާއި އެއްބާރުލުން ދިނުމަކީވެސް ކޮންމެހެން ކުރަންޖެހޭ ކަމެކެވެ.
(މައުލޫމާތު: ކެންސަރުގެ ހާއްސަ އޮންކޮލޮޖިސްޓުން، ޑރ ޝިރޯމާ ޑިސިލްވާ މައިނަރ ގެ މައުލޫމާތުތަކުގެ އަލީގައި)