ނޭޕާލަށް މެދުކެނޑުމެއްނެތި ބޯކޮށް ވާރޭވެހުމުން ފެންބޮޑުވެ، ބިންގަނޑު ކަނޑައިގެން ދިއުމުގެ ސަބަބުން ކުރިމަތިވެފައިވާ ހާލަތާ ގުޅިގެން އެ ގައުމުގެ ބޮޑުވަޒީރު ކޭޕީ ޝަރްމާ އޮލީއަށް ރައީސް ޑރ. މުހައްމަދު މުއިއްޒު، ހަމްދަރުދީގެ މެސެޖެއް ފޮނުއްވައިފިއެވެ.
ރައީސް ޑރ. މުޙައްމަދު މުޢިއްޒު އެކްސްގައި ކުރެއްވި ޕޯސްޓެއްގައި ވިދާޅުވެފައިވަނީ، މެދުކެނޑުމެއްނެތި ބޯކޮށް ވާރޭވެހުމުން ފެންބޮޑުވެ، ބިންގަނޑު ކަނޑައިގެން ދިއުމުގެ ސަބަބުން އެގައުމުގެ އެތައް ރައްޔިތުންނެއްގެ ފުރާނަ ގެއްލުނު ޚަބަރު އެމަނިކުފާނު އެއްސެވީ ފުން ހިތާމައާއެކު ކަމަށެވެ.
މީގެއިތުރުން، މި ހާދިސާގެ ސަބަބުން އަނިޔާވި އެންމެހާ ރައްޔިތުންނަށް އަވަސް ޝިފާއެއް މިންވަރުކުރައްވާ، ގެއްލިގެން ހޯދާ ރައްޔިތުން ސަލާމަތުން ފެނުމަށް އުންމީދުކުރައްވާކަމަށް ރައީސް މުޢިއްޒު ވިދާޅުވިއެވެ. އަދި މިފަދަ ހިތާމައިގެ ދަނޑިވަޅުގައި ނޭޕަލާއެކު ރާއްޖެ ސާބިތުވެ އޮތްކަމަށް ރައީސްގެ މެސެޖްގައި ފާހަގަކުރައްވާފައިވެއެވެ.
މީޑިޔާ ރިޕޯޓްތަކުން ބުނާގޮތުގައި، ނޭޕާލްގައި ފެންބޮޑުވެ ބިންގަނޑު ކަނޑައިގެން ދިއުމުގެ ސަބަބުން މިހާތަނަށް 66 މީހުން މަރުވެފައިވާއިރު، 69 މީހަކު ގެއްލިފައިވާކަމަށް ވެއެވެ.
މި ހާދިސާއަކީ ނޭޕާލްގެ އެތައް ރައްޔިތުންނެއްގެ ދިރިއުޅުމަށް ބޮޑު އަސަރެއް ކޮށްފައިވާ ކާރިސާއެކެވެ. ރާއްޖޭގެ ރައީސް މި ހާދިސާއާ ގުޅިގެން ހަމްދަރުދީ ފާޅުކުރެއްވުމަކީ ދެ ގައުމުގެ ދެމެދުގައިވާ ރަހުމަތްތެރިކަމުގެ ގުޅުން ހާމަކޮށްދޭ ކަމެކެވެ.