ވޭޕް އަދި އީ-ސިނގިރޭޓް ދިވެހިރާއްޖެއަށް އެތެރެ ކުރުމާއި، ވިޔަފާރި ކުރުމާއި އަދި އެ ތަކެތި ގެންގުޅުން މަނާކުރުމަށް ގޮވާލާ ގައުމީ 21 ކުޅިވަރު ޖަމިއްޔާ އަކުން އިއްޔެ ނޫސްބަޔާނެއް ނެރެ ގޮވާލައިފިއެވެ.
މި ޖަމިއްޔާތަކުން ނެރުނު ބަޔާނުގައި ބުނެފައިވަނީ، ވޭޕް އަދި އީ-ސިނގިރޭޓްގެ ސަބަބުން ސިއްޙަތަށް ކުރިމަތިވާ ނޭދެވޭ އަސަރުތަކާއި، އޭގެ ބިރުވެރިކަމާއި، އޭގެ ނުރައްކާތެރިކަމުގެ ވާހަކަ އަކީ މެޑިކަލް ޑޮކްޓަރުންނާއި، ތަޢުލީމީ ދާއިރާގެ ފަންނީ އަދި މި ނޫންވެސް އެހެން ފަރާތްތަކުން މެދުކެނޑުމެއްނެތި ދިވެހިންނަށް ފޯރުކޮށްދެއްވަމުންގެންދާ އިރުޝާދުތަކެއް ކަމަށެވެ. ނަމަވެސް، ދުވަހެއް ދުވަހަކަށް މި ތަކެތީގެ ބޭނުންކުރުން އިތުރުވެ، މީގެ ނޭދެވޭ އަސަރު ކުރިއަށް އޮތް ޖީލުތަކަށް ކޮށްފާނެކަމުގެ ބިރު ވަނީ އިންތިހާއަށް އުފެދިފައިވާ ކަމަށް ބަޔާނުގައި ފާހަގަކޮށްފައިވެއެވެ.
ޖަމިއްޔާތަކުން އިތުރަށް ފާހަގަކޮށްފައިވާ ގޮތުގައި، ދިވެހި ކުޅުންތެރިންނާއި، ތަމްރީނު ފަރާތްތަކުގެ މެދުގައި ވޭޕް އަދި އީ-ސިނގިރޭޓް ބޭނުންކުރުން އަންނަނީ ކަންބޮޑުވާ މިންވަރަކަށް އިތުރުވަމުންނެވެ. މިކަމުގެ ސަބަބުން ކުޅުންތެރިންގެ ފުުއްޕާމެއަށް ދިމާވާ ސިއްޙީ އެކިއެކި މައްސަލަތަކާއި، ނޭދެވޭ އަސަރުތަކުގެ ސަބަބުން ކުޅުންތެރިންގެ ޕަރފޯމަންސް ދަށްވެ، ކުރިއެރުމަށް ހުރަސްއެޅި، ދުޅަހެޔޮކަން ގެއްލި، ކުޅިވަރު ކުޅުމާ ދުރަށްދާކަން ފާހަގަކުރެވެން ވަނީ ފަށާފައެވެ.
ނޫސްބަޔާނުގައި އިތުރަށް ބުނެފައިވަނީ، މިއީ ދިވެހިރާއްޖޭގެ ކުޅިވަރާއި، ދުޅަހެޔަހެޔޮކަން ކުރިއެރުވުމަށް ސަރުކާރުންނާއި އެހެނިހެން ފަރާތްތަކުން ކުރާ މަސައްކަތަށް ހުރި ބޮޑު ގޮންޖެހުމެއް ކަމަށެވެ. އަދި މިއީ ބައިނަލްއަޤްވާމީ ކުޅިވަރުގެ މައިދާނުގައި ރާއްޖެއިން ހޯދަން ބޭނުންވާ ރަން ވަނަތައް ހާސިލުކުރުމަށް އެޅިފައިވާ ހުރަހެއް ކަމަށްވެސް ބަޔާނުގައި ބުނެފައިވެއެވެ.
ޖަމިއްޔާތަކުން ގޮވާލާާފައިވަނީ، ކުރިއަށް އޮތް ޖީލު މި ވަބާއިން ސަލާމަތް ކުރުމަށްޓަކައި ވޭޕް އަދި އީ-ސިނގިރޭޓް ދިވެހިރާއްޖެއަށް އެތެރެ ކުރުމާއި، ވިޔަފާރި ކުރުމާއި އަދި އެތަކެތި ގެންގުޅުން މަނާކުރުމަށެވެ. އަދި ދުނިޔޭގެ ބައެއް ގައުމުތަކާއި އަދި ހާއްސަކޮށް ރާއްޖޭގެ އަވައްޓެރި ބައެއް ޤައުމުތަކުގައި ވެސް ވޭޕް އަދި އީ-ސިނގިރޭޓް މަނާކޮށްފައިވާކަން ޖަމިއްޔާތަކުން ފާހަގަކޮށްފައިވެއެވެ.
ކުޅިވަރު ޖަމިއްޔާތަކުން ނެރުނު ނޫސްބަޔާން
މި ނޫސްބަޔާން ނެރުމުގައި ބައިވެރިވި 21 ގައުމީ ކުޅިވަރު ޖަމިއްޔާތަކުގެ ތެރޭގައި ފުޓްބޯޅަ، ވޮލީބޯޅަ، ބާސްކެޓްބޯޅަ، ޓެނިސް، ބެޑްމިންޓަން، އަދި ހޭންޑްބޯލް ފަދަ އެކި ކުޅިވަރުތަކުގެ ގައުމީ ޖަމިއްޔާތައް ހިމެނެއެވެ. މި ބަޔާނަކީ ދިވެހިރާއްޖޭގެ ކުޅިވަރު ދާއިރާގައި ހަރަކާތްތެރިވާ ގިނަ ޖަމިއްޔާތަކެއް އެއްވެ، އެއް އަޑަކުން ނެރެފައިވާ ބަޔާނެއް ކަމުން، މިކަމުގެ ސަބަބުން ސަރުކާރުގެ ސަމާލުކަން މިކަމަށް ލިބި، އަވަސް ފސް ފިޔަވަޅުތަކެއް އެޅިދާނެ ކަމަށް ބެލެވެއެވެ.
ވޭޕް އަދި އީ-ސިނގިރޭޓްގެ ބޭނުންކުރުން އިތުރުވަމުން ދިއުމަކީ ހަމައެކަނި ކުޅިވަރުގެ ދާއިރާއަށް ކުރިމަތިވެފައިވާ ގޮންޖެހުމެއް ނޫނެވެ. މިއީ މުޅި ޤައުމަށް ކުރިމަތިވެފައިވާ ބޮޑު ގޮންޖެހުމެކެވެ. ޚާއްޞަކޮށް ޒުވާނުންގެ މެދުގައި މި އާދަ އިތުރުވަމުން ދިއުމަކީ ބެލެނިވެރިންނާއި، ތަޢުލީމީ ދާއިރާގެ ފަރާތްތަކުން ކަންބޮޑުވުން ފާޅުކުރަމުންދާ ކަމެކެވެ. މި ބަޔާނާ ގުޅިގެން ސަރުކާރުގެ ކަމާބެހޭ އިދާރާތަކުން އަދި ރަސްމީ ބަޔާނެއް ނެރެފައެއް ނުވެއެވެ.
ވޭޕް އަދި އީ-ސިނގިރޭޓް މަނާކުރުމަކީ ސިއްހަތާއި ކުޅިވަރުގެ ދާއިރާއަށް އޮތް ބޮޑު ގޮންޖެހުމަކަށް ހައްލެއް ގެނެސްދޭނެ ކަމެއްކަމަށް މި ޖަމިއްޔާތަކުން ދެކޭއިރު، މިކަމާމެދު އާންމު ރައްޔިތުންގެ ހިޔާލު ހޯދުމަކީވެސް މުހިންމު ކަމެއް ކަމުގައި ފާހަގަ ކުރެވެއެވެ.