2022 ވަނަ އަހަރުން ފެށިގެން ކޮންމެ އަހަރަކު ޖަރުމަނުވިލާތުގެ ވެރިރަށް ބަރލިންގައި ބާއްވާ ބަރލިން ގްލޯބަލް ޑައިލޮގް ގައި ދިވެހިރާއްޖެއިން ޖަރުމަނުވިލާތަށް ކަނޑައަޅުއްވާފައި ހުންނަވާ ސަފީރު އަލްފާޟިލާ ޢާއިޝަތު ޝާން ޝާކިރު ބައިވެރިވެވަޑައިގަންނަވައިފިއެވެ.
އެ ޑައިލޮގް އަކީ ބަވަނަ ވަމުންދާ ދުނިޔެއަށް ދިމާވާ އިޤްތިސާދީ، ސިޔާސީ އަދި އިޖުތިމާއީ ގޮންޖެހުންތަކާ ގުޅޭގޮތުން ޤައުމުތަކުގެ އިސްވެރިންނާއި ކަމާބެހޭ ފަންނީ މާހިރުން ބައްދަލުކޮށް ދެމެހެއްޓެނިވި ހައްލު ހޯދުމަށް މަޝްވަރާކުރުމަށް ޖަރުމަނުވިލާތުގެ ނަންހިނގާ ‘ޔޫރަޕިއަން ސްކޫލް އޮފް މެނޭޖްމަންޓް އެންޑް ޓެކްނޮލޮޖީ (އީ.އެސް.އެމް.ޓީ)’ އިން އިންތިޒާމުކޮށްގެން ބާއްވާ ޑައިލޮގެކެވެ.
މިގޮތުން މި އަހަރުގެ ޑައިލޮގް ގައި އަލިއަޅުވާލާފައިވާ ކަންކަމުގެ ތެރޭގައި ވިޔަފާރީގެ ގޮތުން ޤައުމުތައް ގުޅި ލާމެހުން، އާރޓިފިޝަލް އިންޓެލިޖެންސް، އިއާދަކުރަނިވި ހަކަތަ އަށް ދުނިޔެ ބަދަލުވުން، އަދި ބައިނަލްއަޤްވާމީ މައިދާނުގައި ތަރައްޤީވަމުން އަންނަ ކުދި ޖަޒީރާ ޤައުމުތަކުގެ އިސް ދައުރު ފާހަގަކޮށްލެވެއެވެ.