މޯލްޑިވްސް އިމިގްރޭޝަނުން އިއްޔެ ހިންގި ހާއްސަ އޮޕަރޭޝަނެއްގައި ހުޅުމާލޭގެ ދެ އެކޮމޮޑޭޝަން ބްލޮކެއް ބަލައި ފާސްކޮށް، އަށް ބިދޭސީއަކު އެ އިދާރާގެ ބެލުމުގެ ދަށަށް ގެންގޮސްފިއެވެ.
އިމިގްރޭޝަނުން މިރޭ ނެރުނު ބަޔާނެއްގައި ބުނެފައިވަނީ، ގަވާއިދާ ހިލާފަށް އުޅޭ ބިދޭސީން ހޯދުމަށް ކުރަމުންދާ މަސައްކަތުގެ ތެރެއިން މި އޮޕަރޭޝަން ހިންގާފައިވާ ކަމަށެވެ. މި އޮޕަރޭޝަންގައި އަލަށް އިމިގްރމިގްރޭޝަނަށް ވަންނަ އޮފިސަރުންނަށް ދޭ ހާއްސަ ތަމްރީނުގެ ދަށުން "އިމިގްރޭޝަން އޮފިސަރ ޓްރެއިނީސް" ވެސް ބައިވެރިވެފައިވާ ކަމަށް އެ ބަޔާނުގައި ފާހަގަކޮށްފައިވެއެވެ.
އިމިގްރޭޝަނުން އިއްޔެ އާންމުކުރި ތަފާސްހިސާބުތަކުން ދައްކާ ގޮތުގައި، ވޭތުވެދިޔަ 10 މަސްދުވަހުގެ ތެރޭގައި މި ސަރުކާރުން ވަނީ ގަވާއިދާ ހިލާފަށް އުޅުނު 4،054 ބިދޭސީން ޑީޕޯޓްކޮށްފައެވެ. މީގެ ތެރޭގައި ހިމެނެނީ:
- ނޮވެމްބަރު 17 އިން 30 އަށް: 90 ބިދޭސީން
- ޑިސެމްބަރު: 202 ބިދޭސީން
- ޖަނަވަރީ: 237 ބިދޭސީން
- ފެބްރުވަރީ: 309 ބިދޭސީން
- މާރިޗު: 332 ބިދޭސީން
- އޭޕްރިލް: 240 ބިދޭސީން
- މެއި: 377 ބިދޭސީން
- ޖޫން: 690 ބިދޭސީން
- ޖުލައި: 461 ބިދޭސީން
- އޮގަސްޓް: 453 ބިދޭސީން
- ސެޕްޓެމްބަރު 17 ގެ ނިޔަލަށް: 663 ބިދޭސީން
މި އަދަދުތަކުން ދައްކާ ގޮތުގައި، ފާއިތުވި މަސްތަކާ އަޅާބަލާއިރު ސެޕްޓެމްބަރު މަހު ޑީޕޯޓް ކުރެވުނު ބިދޭސީންގެ އަދަދު ވަރަށް ބޮޑުތަން އިތުރު ވެފައިވާކަން ފާހަގަ ކުރެވެއެވެ. މިއީ އިމިގްރޭޝަނުން ގަވާއިދާ ހިލާފަށް އުޅޭ ބިދޭސީން ހޯދުމަށް ކުރަމުންދާ މަސައްކަތްތައް އިތުރަށް ހަރުދަނާ ކޮށްފައިވާ ކަމުގެ ހެއްކެއް ކަމުގައި ބެލެވެއެވެ.