ދިވެހިރާއްޖެ އިސްލާމްވި ދުވަހުގެ މުނާސަބަތުގައި މިއަދު ހެނދުނު ދަރުބާރުގޭގައި ބޭއްވުނު ރަސްމީ ޖަލްސާގައި ވާހަކަފުޅު ދައްކަވަމުން، ދިވެހި މުޖުތަމަޢަކީ ޤުރްއާނާއި ސުންނަތުން އިރުޝާދު ދޭ ފަދައިން ބައްޓަންވެފައިވާ ރަނގަޅު މުޖުތަމަޢަކަށް ބަދަލުކުރުމުގައި ހުރިހާ ފަރާތްތަކުން ބައިވެރިވެ، އެއްބާރުލުން ދިނުމަށް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު އެދިވަޑައިގެންފިއެވެ.
ރައީސް ޑރ މުއިއްޒުގެ ވާހަކަފުޅުގައި ދިވެހި ރައްޔިތުންނަށް ނިޔަތާއި ބަހާއި ޢަމަލުން އިސްލާމްދީނުގައި ސާބިތުވެ ތިބުމަށްވެސް އިލްތިމާސްކުރެއްވިއެވެ. އަދި ދިވެހިން އިސްލާމްދީން ބަލައިގަތުމުގައި ހިމެނޭ ދުނިޔެވީ ސަބަބެއްގެ ގޮތުގައި އިސްލާމްދީނުން ގެނެސްދޭ އަމާންކަމާއި ރައްކާތެރިކަން ފާހަގަކުރެއްވިއެވެ. މީގެ އިތުރުން، ދިވެހިރާއްޖެ އިސްލާމްވި ދުވަސްވަރަކީ މި ސަރަހައްދުގެ ބާރަކުން ރާއްޖެއަށް މެދުކެނޑުމެއްނެތި ހަމަލާދީ ގޯނާކުރަމުން އައި ދުވަސްވަރެއްކަންވެސް ފާހަގަކުރެއްވިއެވެ.
ރައީސް ޑރ މުއިއްޒު ވިދާޅުވީ، މި ދުވަހު ނަމޫނާ ލިބިގަންނަންވީ ރަސޫލުﷲ ޞައްލަﷲ ޢަލައިހިވަސައްލަމަ ދުނިޔެއަށް ގެނެސްދެއްވި މޫރިތި ރިވެތި އަޚްލާޤީ ސިފަފުޅުތަކުންކަމަށެވެ. އަދި ދޮގު ހެދުމާއި، ދޮގު ޚަބަރު ފެތުރުމާއި، އާޑަ ފުރައްސާރައިގެ ފިތުނަވެރި ޢަމަލުތަކުގައި ބައިވެރިނުވުމަށާއި، ރަނގަޅު ވާހަކައެއް ނޫނީ ނުބުނުމަށް ސުންނަތުން އިރުޝާދު ލިބޭކަންވެސް ފާހަގަކުރެއްވިއެވެ.
މި ޖަލްސާގައި ރައީސް ޑރ މުއިއްޒުގެ އަރިހުގައި އެމަނިކުފާނުގެ އަނބިކަނބަލުން މެޑަމް ސާޖިދާ މުޙައްމަދުގެ އިތުރުން ދައުލަތާއި ސަރުކާރުގެ އިސްވެރިންވެސް ބައިވެރިވެވަޑައިގެންނެވިއެވެ. އަދި މި ޖަލްސާގައި ޙާފިޡްކަމުގެ ސަނަދު ހާސިލުކުރި ޙާފިޡުންނަށް ރައީސުލްޖުމްހޫރިއްޔާ ދެއްވާ މެޑެއްޔާއި، އިނާމާއި، ހަނދާނީ ލިޔުން ދެއްވުންވެސް އޮތެވެ.
ދިވެހިރާއްޖެ އިސްލާމްވި ދުވަހުގެ ގޮތުގައި ފާހަގަކުރަނީ ރަބީޢުލްއާޚިރު މަހުގެ 2 ވަނަ ދުވަހެވެ.