އިޒްރޭލުން ގެންދަނީ އީރާނަށް ހަމަލާދީ، ޣައްޒާއާއި ލުބުނާނަށް ދެމުންގެންދާ ހަމަލާތައް ވަރުގަދަކުރުމަށް ތައްޔާރުވަމުން ކަމަށް މީޑިއާތަކުން ރިޕޯޓުކޮށްފިއެވެ.
ރިޕޯޓުތައް ބުނާ ގޮތުގައި، އިޒްރޭލުން އީރާނަށް ހަމަލާދޭން ތައްޔާރުވަމުންގެންދަނީ، އިޒްރޭލުން ދިން ހަމަލާއެއްގައި އީރާނާއި ލުބުނާން އަދި ފަލަސްތީނުގެ އިސް އޮފިޝަލުން އަވަހާރަކޮށްލުމުގެ ބަދަލު ހިފުމުގެ ގޮތުން އީރާނުން އިޒްރޭލަށް ބެލިސްޓިކް މިސައިލުން ހަމަލާ ދިނުމާއި ގުޅިގެންނެވެ.
ރިޕޯޓުތައް ބުނާ ގޮތުގައި އީރާނަށް ދިނުމަށް ތައްޔާރުވަމުންދާ ހަމަލާގައި، އިޒްރޭލާ ގުޅިފައިވާ ގައުމުތަކުން ބައިވެރިވާނެ ކަމަށް އިޒްރޭލުން އުންމީދުކުރެއެވެ. މިކަން ހާމަވެފައި މިވަނީ، އެސަރަހައްދުގައި ހަރަކާތްތެރިވާ އެމެރިކާގެ އަސްކަރިއްޔާގެ ވެރިޔާ ޖެނެރަލް މައިކަލް ކުރިލާ މިއަދު އިޒްރޭލަށް ގޮސް އެ އޮޕަރޭޝަނާ ބެހޭގޮތުން މަޝްވަރާ ކުރުމަށް ހަމަޖެހިފައިވާ ދަނޑިވަޅެއްގައެވެ.
އަދި އިޒްރޭލުން ޣައްޒާއަށް ދެމުންގެންދާ ހަމަލާތަކަށް އަހަރެއްހާ ދުވަސްވެފައިވާއިރު، އިސްރޭލުން މިހާރު ގެންދަނީ ނެޓްޒާރިމް ކޮރިޑޯގެ ވަށައިގެން ވަރުގަދަ ހަމަލާތަކެއް ދިނުމަށް ރާވަމުންކަމަށްވެސް ރިޕޯޓުތައް ބުނެއެވެ.
އޭގެ އިތުރުން ލުބުނާނަށް އަރައިގަނެ ޔަހޫދީ އަސްކަރިއްޔާއިން ދެމުންގެންދާ ހަމަލާތައް އިތުރަށް ފުޅާކުރުމަށް ތައްޔާރުވެފައިވާ ކަމަށްވެސް ރިޕޯޓުތައް ބުނެއެވެ. އިސްރާއީލުން މިދިޔަ އަހަރުން ފެށިގެން ލުބުނާނަށް ދެމުންގެންދާ ހަމަލާތަކުގައި މިހާތަނަށް 2,000 އަށްވުރެ ގިނަ މީހުން ވަނީ ޝަހީދުވެފައެވެ.