ރައީސުލްޖުމްހޫރިއްޔާ ޑރ. މުހައްމަދު މުއިއްޒާއި އެމަނިކުފާނުގެ އަނބިކަނބަލުން ސާޖިދާ މުހައްމަދު އިންޑިއާއަށް ކުރަމުން ގެންދަވާ ފުރަމާނަ ދަތުރުފުޅުގެ ތެރެއިން ތާޖް މަހަލްއަށް ވަޑައިގެން އެތަން ބައްލަވާލައްވައިފިއެވެ.
އިންޑިއާ ސަރުކާރުގެ ފަރާތުން ރައީސް މުޢިއްޒު އަދި އަނބިކަނބަލުންނަށް ތާޖް މަހަލްގެ ޕްރައިވެޓް ޓުއާއެއް ހަމަޖައްސައިދެއްވިއެވެ. މި ޓުއާގައި އެ ދެ ކަނބަލުންނަށް ތާޖް މަހަލްގެ އެތެރެ ބެއްލެވުމުގެ ފުރުޞަތު ލިބިވަޑައިގަތެވެ. މީގެ އިތުރުން، ތާޖް މަހަލާ އިންވެގެން ދެފަރާތުގައި ހުރި ފޯޓުތައްވެސް ދައްކާލެވުނެވެ.
ރައީސް ޑރ މުޢިއްޒު ވަނީ ތާޖް މަހަލްގެ ވިޒިޓަރސް ބުކްގައި ސޮއިކުރައްވާފައެވެ. އަދި އެ ދެ ކަނބަލުންނަށް ހަނދާނީ ހަދިޔާއެއްގެ ގޮތުގައި ތާޖް މަހަލްގެ ރެޕްލިކާއެއް އަރުވާފައިވެއެވެ.
މި ދަތުރުފުޅުގައި ރައީސް ޑރ މުޢިއްޒު ވަނީ އިންޑިއާގެ އިސްވެރިންނާއެކު މުހިންމު ބައްދަލުވުންތަކެއް ބާއްވަވާފައެވެ. މި ގޮތުން އިންޑިއާގެ ބޮޑުވަޒީރު ނަރެންދްރަ މޯދީ، ރައީސް ދްރައުޕަދީ މުރުމު، ނައިބު ރައީސް ޖަގްދީޕް ދަންކަރު، އަދި ޚާރިޖީ ވަޒީރު ޑރ. އެސް. އެސް. ޖައިޝަންކަރާ ބައްދަލުކުރެއްވިއެވެ.
މި ބައްދަލުވުންތަކުގެ ނަތީޖާއެއްގެ ގޮތުން، ދިވެހިރާއްޖެއާއި އިންޑިއާއާ ދެމެދު ގުޅުމާއި އެއްބާރުލުން އިތުރަށް ހަރުދަނާކުރުމަށް މުހިންމު އެއްބަސްވުންތަކެއްގައި ސޮއިކުރެވުނެވެ. އަދި އިންޑިއާގެ އެހީގައި ހިންގުނު އެތައް މަޝްރޫޢުތަކެއް ދިވެހި ސަރުކާރާ ރަސްމީކޮށް ޙަވާލުކުރެވުނެވެ.
ރައީސް ޑރ މުޢިއްޒުގެ މި ދަތުރުފުޅަކީ އިންޑިއާގެ ރައީސް މުރުމުގެ ދަޢުވަތަކަށް ކުރައްވާ ދަތުރުފުޅެކެވެ. މި ދަތުރުފުޅުން ދެ ޤައުމުގެ ދެމެދުގައި އޮތް ގުޅުން އިތުރަށް ބަދަހިވެގެންދާނެ ކަމަށް ބެލެވެއެވެ.