- މާލޭގެ މަޖީދީ މަގުގައި އަނިޔާތަކާއެކު އޮތް ދިވެހި ފިރިހެނަކު ރޭ ދަންވަރު ފެނިގެން، އިންދިރާ ގާންދީ މެމޯރިއަލް ހޮސްޕިޓަލް (އައިޖީއެމްއެޗް) އަށް ގެންގޮސް އޭނާއަށް ފަރުވާ ދީފިއެވެ.
ފުލުހުންގެ މަޢުލޫމާތު ދެއްވާ ފަރާތުން މަޢުލޫމާތު ދެއްވި ގޮތުގައި، މަޖީދީ މަގުގައި ހުންނަ “ސޮރީ ބޯއިސް” ފިހާރަ ކުރިމަތީގައި އަނިޔާތަކެއް ލިބިފައި އޮތް ފިރިހެނަކު އޮތް ކަމަށް ރޭ 1:25 ހާއިރު ފުލުހުންނަށް ރިޕޯޓްކޮށްފައިވެއެވެ. މި މަޢުލޫމާތާ ގުޅިގެން ފުލުހުން ވަނީ ވަގުތުން އެ ސަރަހައްދަށް ގޮސް، އަނިޔާވެފައިވާ ފިރިހެނާ އައިޖީއެމްއެޗަށް ގެންގޮސްފައެވެ.
ފުލުހުން އިތުރަށް މަޢުލޫމާތު ދެއްވި ގޮތުގައި، އައިޖީއެމްއެޗްގައި ފަރުވާ ދިނުމަށްފަހު، މިއަދު ހެނދުނު 6:19 ހާއިރު އެ ފިރިހެނާ ވަނީ ހޮސްޕިޓަލުން ދޫކޮށްލާފައެވެ. ނަމަވެސް، އޭނާއަށް ލިބިފައިވާ އަނިޔާތަކުގެ ތަފްސީލު މި ވަގުތު ސާފުވެފައެއް ނުވެއެވެ.
މި ހާދިސާއާ ގުޅޭ ގޮތުން މީސް މީޑިއާގައި ދައުރުވަމުންދާ ވީޑިއޯއެއްގެ ކެޕްޝަންގައި ބުނެފައިވަނީ، އެ ފިރިހެނާއަށް އަނިޔާވެފައި ވަނީ މާރާމާރީއެއްގެ ތެރެއިން ކަމަށެވެ. ނަމަވެސް، މި މަޢުލޫމާތު ރަސްމީ ފަރާތަކުން އަދި ކަށަވަރުކޮށްދީފައެއް ނުވެއެވެ.
ފުލުހުން ދަނީ މި މައްސަލަ އިތުރަށް ތަހުގީގު ކުރަމުންނެވެ.