ކްރިއޭޓިވް އިކޮނޮމީ ފަންޑުގެ "ޕްރޮޖެކްޓް ބޭސްޑް ފައިނޭންސިންގ ސްކީމް" ގެ ތެރެއިން މާލީ އެހީތެރިކަން ހޯދުމަށް އެދި ފޯމު ހުށަހެޅުމުގެ ފުރުސަތު، ބިޒްނަސް ސެންޓަރ ކޯޕަރޭޝަން ލިމިޓެޑް (ބީސީސީ) އިން ހުޅުވާލައިފިއެވެ.
ދިވެހިރާއްޖޭގައި އީޖާދީ އަދި ފަންނުވެރި މަސައްކަތްތައް ކުރާ ފަރާތްތަކަށް މާލީ އެހީތެރިކަން ފޯރުކޮށްދިނުމަށް ޓަކައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ގެންގުޅުއްވާ ޚާއްސަ ސިޔާސަތުގެ ދަށުން 31 ޑިސެމްބަރު 2023 ގައި ވަޒީރުންގެ މަޖިލީހުން ނިންމަވައި، ބީސީސީއާ ހަވާލު ކުރެވިފައިވާ ކްރިއޭޓިވް އިކޮނޮމީ ފަންޑުގެ ދަށުން މިދިޔަ މަހުގެ 17 ގައި އެ ކުންފުނިން ވަނީ "ޕްރޮޖެކްޓް ބޭސްޑް ފައިނޭންސިންގ ސްކީމް" އިފުތިތާހުކޮށްފައެވެ.
ބީސީސީއިން ރޭގެ ވަގުތެއްގައި ސަރުކާރުގެ ގެޒެޓުގައި ޝާއިއުކުރި އިއުލާނެއްގައި ބުނީ މި ސްކީމްގެ ތެރެއިން ފުރުސަތު ހުޅުވާލެވޭ ދާއިރާތަކަކީ ފިލްމް އުފެއްދުން، މިއުޒިކް އުފެއްދުން، އާރޓް އެންޑް ކްރާފްޓް އަދި ކޮންޓެންޓް ކްރިއޭޝަން ކަމަށެވެ.
މި ސްކީމްގެ ތެރެއިން މާލީ އެހީތެރިކަމަށް ކުރިމަތިލާ ފަރާތްތަކުގެ ކިބައިގައި ހުންނަންޖެހޭ ޝަރުތުތަކުގެ ތެރޭގައި ދިވެހިރައްޔިތެއް ކަމުގައިވުމާއި، 18 އަހަރު ފުރިފައިވާ ފަރާތެއް ކަމުގައިވުމާއި، ރަޖިސްޓަރީކޮށްފައިވާ ވިޔަފާރިތަކުގެ ތެރެއިން އެންމެ ކުދި ނުވަތަ ކުދި ވިޔަފާރީގެ ގިންތީގައި ހިމެނޭ ސައްތަ އިންސައްތަ ދިވެހިން ހިއްސާވާ ވިޔަފާރިއެއް ކަމުގައިވުން ނުވަތަ ބީސީސީއިން ގާއިމުކޮށްފައިވާ އަމިއްލަ މަސައްކަތްކުރާ މީހުންގެ ދަފްތަރުގައި ރަޖިސްޓަރީވެފައިވާ ފަރާތެއް ކަމުގައިވުން ހިމެނެއެވެ.
ބީސީސީން ބުނީ މި ސްކީމްގެ ތެރެއިން ކަނޑައެޅިފައިވާ ހުރިހާ ދާއިރާތައް ހިމެނޭހެން މާލީ އެހީތެރިކަން ހޯދުމަށް އެދި ކޮންމެ ފަރާތަކަށް ވެސް ހުށަހެޅޭނީ އެއް ފޯމު ކަމަށެވެ. މި ދާއިރާތަކުން 50,000 އާއި 300,000 ދިވެހި ރުފިޔާއާ ދެމެދުގެ އަދަދަކަށް މާލީ އެހީތެރިކަން ފޯރުކޮށްދެވޭނެ ކަމަށާއި އެހީތެރިކަން ފޯރުކޮށްދެވޭ ފަރާތްތައް ބައިވެރިވުން ލާޒިމުކުރާ އިންކިއުބޭޝަންގެ ޚިދުމަތެއް އެ ކޯޕަރޭޝަނުން ފޯރުކޮށްދޭނެ ކަމަށް ބީސީސީއިން ބުންޏެވެ.
ބީސީސީއިން ބުނީ މި ޚިދުމަތް ދިނުމަށް، މާލީ އެހީތެރިކަން ފޯރުކޮށްދޭ އަދަދުގެ %5 އިންކިއުބޭޝަން ފީގެ ގޮތުގައި ނެގޭނެ ކަމަށެވެ. އަދި މާލީ އެހީތެރިކަމުގެ ގޮތުގައި މި ސްކީމްގެ ތެރެއިން ފޯރުކޮށްދޭ ފައިސާ އަނބުރާ ދައްކާނެ ގޮތުގެ ތާވަލު ހިސާބުކުރާނެ ގޮތް އެޕްލިކޭޝަނާއެކު ހިމަނަންޖެހޭ ޕޭމަންޓް ޕްލޭން ޓެމްޕްލޭޓުގައި ތަފްސީލުކޮށްފައިވާނެ ކަމަށެވެ.
މި ސްކީމްގެ ދަށުން މާލީ އެހީތެރިކަން ހޯދުމަށް ޝައުގުވެރިވެލައްވާ ފަރާތްތަކުން، އިއުލާނާއެކު ހިމަނާފައިވާ އޮންލައިން ޕޯޓަލް މެދުވެރިކޮށް ފޯމު ހުށަހެޅުމަށް ވަނީ އެދިފައެވެ.
މި ސްކީމްގެ ތެރެއިން މާލީ އެހީތެރިކަން ފޯރުކޮށްދިނުމަށް ބީސީސީއިން ކަނޑައަޅާފައިވާ މިންގަނޑުތައް، އިއުލާނާއެކު ހިމަނައިފައިވާ "ކްރިއޭޓިވް އިކޮނޮމީ ފަންޑުގެ ޕްރޮޖެކްޓް ބޭސްޑް ފައިނޭންސިން ސްކީމް ހިންގާނެ ގޮތުގެ އުސޫލު" ގައި ވަނީ ބަޔާން ކޮށްފައެވެ.
މި ކަމާގުޅޭ ގޮތުން އިތުރު މައުލޫމާތު ހޯދަން ބޭނުންވާނަމަ، އެ ކޯޕަރޭޝަންގެ ހޮޓްލައިން 3305555 އަށް ގުޅުއްވުމަށް ނުވަތަ cef@bcc.mv އަށް އީމެއިލް ކުރެއްވުމަށް ވަނީ އެދިފައެވެ.