ގއ.ކޫއްޑުއަށް ކުރަމުން އައި ދަތުރުތައް ކެންސަލްކުރީ ރަންވޭ ވަރަށްބޮޑަށް ހަލާކުވެފައިވާތީ ކަމަށާއި، ފަސިންޖަރުންގެ ރައްކާތެރިކަން މާ މުހިންމު ކަމަށް މޯލްޑިވިއަންއިން ބުނެފިއެވެ.
"ހުވަދޫ" އަށް މައުލޫމާތު ދެމުން މޯލްޑިވިއަންއިން މިއަދު ބުނީ ކޫއްޑުއަށް ކުރަމުން އައި ދަތުރުތައް ހުއްޓާލަން ނިންމީ އެ އެއާޕޯޓުގެ ރަންވޭ ވަރަށް ބޮޑަށް ހަލާކުވެފައިވާތީ ކަމަށާއި، އެކަމުގެ ސަބަބުން މޯލްޑިވިއަންގެ ދެ ބޯޓެއް ގުރައުންޑް ކުރަންޖެހިފައިވާ ކަމަށެވެ.
މޯލްޑިވިއަންއިން ބުނީ މިފަދަ ހާލަތެއްގައި ދަތުރުކުރާނަމަ، ބޯޓާއި، ފަސިންޖަރުންގެ ސަލާމަތަށް ނުރައްކަލެއް ކުރިމަތިވެދާނެ ކަމަށާއި، ފަސިންޖަރުންގެ ރައްކާތެރިކަން މާ މުހިންމު ކަމަށެވެ.
ކޫއްޑޫ އެއާޕޯޓުގެ ރަންވޭއާއި، އޭޕްރަން ހަލާކުވެފައިވާތީ ވެރި ފަރާތާ އެ ވާހަކަ ދައްކާތާ ދުވަސްވެފައިވާއިރު، އޭވިއޭޝަން އޮތޯރިޓީގެ ސަމާލުކަމަށް އެކަން ގެނެސްފައިވާ ކަމަށް ވެސް މޯލްޑިވިއަންއިން ބުންޏެވެ.
މޯލްޑިވިއަންއިން ބުނީ މި މައްސަލަތައް ހައްލު ކުރާހާ އަވަހަށް އަލުން ދަތުރުތައް ފަށާނެ ކަމަށެވެ.