ހދ.ހިރިމަރަދޫގައި އިމާރާތް ކުރަމުންދާ އާ މިސްކިތް ނޮވެމްބަރު މަހަށް ނިމޭނެ ކަމަށާއި، އިތުރު 5 މިސްކިތެއްގެ މަސައްކަތް އަންނަ އަހަރަށް ނިމޭނެ ކަމަށް އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް އަލީ ސަޢީދު ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ މީގެ ދެތިން ދުވަސްކުރިން ސޯޝަލްމީޑިއާ ޕްލެޓްފޯމް، ފޭސްބުކްގައި ހިއްސާކުރެއްވި ޕޯސްޓުތަކެއްގައެވެ.
މިނިސްޓަރު ވިދާޅުވީ ދައުލަތުގެ ބަޖެޓުން ޖުމްލަ 8 މިލިއަން ރުފިޔާ ޚަރަދުކޮށްގެން ހދ.ހިރިމަރަދޫގައި އިމާރާތް ކުރަމުންދާ އާ މިސްކިތުގެ މަސައްކަތްތައް އަންނަ ނޮވެމްބަރު މަހަށް ނިމޭނެ ކަމަށެވެ.
ވޭވްލެންތް ޕްރައިވެޓް ލިމިޓެޑާ ހަވާލުކޮށްގެން އިމާރާތް ކުރަމުންދާ މި މިސްކިތަކީ 300 މީހުންގެ ޖާގައިގެ މިސްކިތެކެވެ.
މިނިސްޓަރު ވިދާޅުވެފައިވާ ގޮތުގައި، ފ.ނިލަންދޫގައި ބިނާކުރާ މިސްކިތް އަންނަ އަހަރު ކުރީކޮޅު ނިމޭނެއެވެ. އަދި ބ. ކެންދުއާއި، ތ.ކަނޑޫދުއާއި، ޅ.ކުރެންދުއާއި، ލ.ގަމު ތުނޑީގައި ބިނާކުރަމުންދާ މިސްކިތްތައް އަންނަ އަހަރު ނިމޭނެ ކަމަށް މިނިސްޓަރު ވިދާޅުވިއެވެ.
އިސްލާމީ ކަންތައްތަކާ ބެހޭ ވުޒާރާގެ ބެލުމުގެ ދަށުން މިހާރު 22 މިސްކިތެއްގެ މަސައްކަތް ކުރިއަށްދާ ކަމަށް އެ ވުޒާރާއިން މިއަދު ވަނީ ބުނެފައެވެ.
މީގެ ތެރެއިން ބައެއް މިސްކިތްތަކުގެ މަސައްކަތް އަންނަ އަހަރުގެ ތެރޭގައި ނިންމޭ ވަރަށް މަސައްކަތް ކުރިއަށްދާއިރު، މިސްކިތްތަކުގެ މަސައްކަތުގެ ދުވެލި އަވަސް ކުރުމަށް ގިނަ މަސައްކަތްތަކެއް ކުރަމުންދާ ކަމަށް އިސްލާމީ ކަންތައްތަކާ ބެހޭ ވުޒާރާއިން ވަނީ ބުނެފައެވެ.