ލ. ގަމުގައި އޮންނަ މަޝްހޫރު ޕަރީފެންގަނޑު ބަލަން ތިބުމަށް ޕްލެޓްފޯމެއް ހެދުމަށް ސަރުކާރުން ނިންމައި، އެކަމަށް ބޭނުންވާ ފައިސާ ދޫކޮށްފިއެވެ.
މި މަޝްރޫޢުއަށް ބޭނުންވާ ފައިސާ ހަވާލުކޮށްފައިވަނީ އެރަށުގެ ޖަމްއިއްޔާއެއް ކަމަށްވާ މޯލްޑިވްސް ހެރިޓޭޖް ސޮސައިޓީއާއެވެ.
އެންވަޔަރަންމަންޓް މިނިސްޓަރު އިބްރާހިމް ތޯރިގް މިހާރު ލ. އަތޮޅަށް ކުރައްވަމުން ގެންދަވާ ދަތުރުފުޅެއްގައި އިއްޔެ ލ. ފޮނަދޫގައި ބޭއްވި ރަސްމިއްޔާތެއްގައި މި ގްރާންޓް ހަވާލުކުރެއްވިއެވެ. މިނިސްޓަރު ވިދާޅުވި ގޮތުގައި މި ގްރާންޓަކީ ގްލޯބަލް އެންވަޔަރަންމަންޓް ފެސިލިޓީ (ޖީއީއެފް)ގެ ދަށުން ދޫކުރެވޭ އެހީއެކެވެ.
ޕަރީފެންގަނޑުގެ އިތުރުން ލ. އަތޮޅުގެ މާބައިދޫގައި ހިމާޔަތްކޮށްފައިވާ ކޯރު ސަރަހައްދާއި ހިތަދޫ ކުޅި ސަރަހައްދު ތަރައްޤީކުރުމަށް ވެސް ގްރާންޓް ހަވާލުކޮށްފައިވެއެވެ. މި ގްރާންޓްތަކުގެ ދަށުން ކޮންމެ ރަށަކަށް ދެ މިލިއަން ރުފިޔާގެ ހިލޭ އެހީ ދީފައިވާ ކަމަށް އެންވަޔަރަންމަންޓް މިނިސްޓްރީން މަޢުލޫމާތު ދީފައިވެއެވެ.
މިނިސްޓްރީން އިތުރަށް ބުނެފައިވަނީ މި ފައިސާ ބޭނުންކުރާނީ ހިމާޔަތްކޮށްފައިވާ ސަރަހައްދުތަކަށް ތައްޔާރުކޮށްފައިވާ މެނޭޖްމަންޓް ޕްލޭން ތަންފީޒުކުރުމަށް ކަމަށެވެ. ލ. ގަމުގެ “ބޮޑަ ފެންގަނޑަ” ނުވަތަ ޕަރީފެންގަނޑަކީ އެ ރަށަށް ޒިޔާރަތްކުރާ މީހުންގެ މެދުގައި ވަރަށް މަޤްބޫލު ތަނެކެވެ.
މި މަޝްރޫޢުތަކުގެ ސަބަބުން ލ. އަތޮޅުގެ ޤުދުރަތީ ވަސީލަތްތައް ހިމާޔަތްކުރެވި، ފަތުރުވެރިކަން ކުރިއެރުވުމަށް މަގުފަހިވެގެންދާނެ ކަމަށް އުއްމީދު ކުރެވެއެވެ.