އެކުވެރި ދައުލަތްތަކުގެ އާންމު މަޖިލީހުގެ 79 ވަނަ ސެޝަންގައި ބައިވެރިވެވަޑައިގަތުމަށް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު އެމެރިކާއަށް ކުރެއްވި ރަސްމީ ދަތުރުފުޅަށް ދިވެހި ސަރުކާރުން ހޭދަކުރި ޚަރަދުގެ ތަފުސީލު ރައީސް އޮޮފީހުން މިއަދު އާންމުކޮށްފިއެވެ.
އދ. ގެ އާންމު މަޖިލީހުގެ 79 ވަނަ ސެޝަންގައި ބައިވެރިވެވަޑައިގަތުމަށްޓަކައި، ރައީސް ޑރ. މުޢިއްޒު އެމެރިކާގެ ނިއުޔޯކަށް ފުރާވަޑައިގެނެންނެވީ މިދިޔަ ސެޕްޓެމްބަރު މަހުގެ 20 ވަނަ ދުވަހުއެވެ. އެނބުރި ރާއްޖެއަށް ވަޑައިގެންނެވީ އެ މަހުގެ 29 ގައެވެ.
މިއީ ރައީސް ޑރ. މުޢިއްޒު އދ. ގެ އާންމު މަޖިލީހުގައި ބައިވެރިވަޑައިގެންނެވި ފުރަތަމަ ފަހަރެވެ.
މި ދަތުރުފުޅުގައި ރައީސްގެ އަރިހުގައި، ސަރުކާރުގެ މަތީ ފަންތީގެ ވަފުދެއް ވެސް ބައިވެރިވެވަޑައިގެންނެވިއެވެ.
ރައީސް އޮފީހުން ބުނީ މި ދަތުރުފުޅަށް ދިވެހި ސަރުކާރުން ހޭދަކުރީ 2,455,583.01 ރުފިޔާ ކަމަށެވެ.
ރައީސް އޮފީހުން ހާމަކުރި މައުލޫމާތުތަކަށް ބަލާއިރު، މިދިޔަ ރިޔާސީ ދައުރުގައި އދ. ގެ އެންމެ އިސްވެރިންގެ ބައްދަލުވުމުގައި ބައިވެރިވެވަޑައިގަތުމަށް އޭރުގެ ރައީސުލްޖުމްހޫރިއްޔާ ނިއުޔޯކަށް ވަޑައިގެންނެވީ ދެ ފަހަރުއެވެ. އެއީ 2019 އާއި 2021 ގައެވެ.
އޭގެތެރެއިން ފުރަތަމަ ދަތުރުފުޅަށް 4,171,832.42 ރުފިޔާ އަދި ދެވަނަ ދަތުރުފުޅަށް 5,349,505.88 ރުފިޔާ ސަރުކާރުން ހޭދަކޮށްފައިވެއެވެ.
އެހެންކަމުން މިފަހަރުގެ ދަތުރުފުޅަށް ސަރުކާރުން ކުރި ޚަރަދު ވަނީ ކުރީ ދެފަހަރާ އަޅާބަލާއިރު ވަރަށް ބޮޑަށް ކުޑަކުރެވިފައެވެ.