ފަހަކަށް އައިސް ގިނަ ބައެއްގެ އަދި ޚާއްސަކޮށް ބެލެނިވެރިންގެ އެންމެ ބޮޑު އެއް ކަންބޮޑުވުމަކަށްވެފައިވަނީ ދުންފަތާއި، ވޭޕް ބޭނުންކުރުމުގެ ވަބާއިން ކުރިމަތިވެފައިވާ ނުރައްކަލުގެ ސަބަބުން ޒުވާން ޖީލު ހަލާކުވަމުންދާ ދިއުމެވެ. އެގޮތުން މި ވަބާއިން ގައުމު ސަލާމަތްކޮށްދިނުމަށް ސަރުކާރުން ހަރުދަނާ ފިޔަވަޅުތަކެއް އަޅައިދިނުމަށް އެދި ގިނަ އަދަދެއްގެ ބެލެނިވެރިންގެ ސޮޔާއެކު އެޑިއުކޭޝަން މިނިސްޓްރީއަށް ޕެޓިޝަނެއް ވެސް ހުށަހެޅިއެވެ.
ކިޔެވުމާއި، ކުޅިވަރާއި މުނިފޫހިފިލުވުމުގެ މާހައުލުތަކުން އެއް ކުއްޖަކު އަނެއް ކުއްޖަކަށް ވޭޕާއި، ސިނގިރޭޓު ތައާރަފުކޮށް އަދި އެ ބޭނުންކުރުމަށް ނުފޫޒު ފޯރުވުމުގެ ސަބަބުން އިޚުތިޔާރާ ނުލައި ވެސް ދަރިވަރުން ވޭޕާއި އީ-ސިނގިރޭޓުގެ ނުރައްކަލަށް ހުށަހެޅިފައިވާކަން ޕެޓިޝަނުގައި ފާހަގަކޮށްފައިވެއެވެ. އަދި އީ-ސިނގިރޭޓުގެ ޒަރިއްޔާއިން ކުދިންނަށް ޑްރަގްގެ ބާވަތްތައް ތައާރަފުވެ، އެ ތަކެތި ބޭނުންކުރަން ފެށުމުގެ ނުރައްކަލަށް ކުދިން ހުށަހެޅިފައިވާކަމުގެ ކަންބޮޑުވުން ވެސް ވަނީ ފާޅުކޮށްފައެވެ.
އެޑިއުކޭޝަން މިނިސްޓްރީން ހާމަކުރި ގޮތުގައި ވޭޕް މަނާކޮށްދިނުމަށް އެދި 215 ސްކޫލެއްގެ ޕީޓީއޭއިން އެ މިނިސްޓްރީގައި އެދިފައިވެއެވެ.
ވޭޕް ކުރުމަކީ ސިއްހަތަށް ވަރަށް ގެލުންހުރި ކަމެއް.
ބެލެނިވެރިންގެ މި ކަންބޮޑުވުންތައް އަޑުއައްސަވައި ރައީސް ޑރ. މުޙައްމަދު މުޢިއްޒު މިއަދު ވަނީ ވޭޕުގެ ނުރައްކަލުން ގައުމު ސަލާމަތްކުރުމަށް އަޅުއްވަން ނިންމެވި ފިޔަވަޅުތައް އިއުލާނުކުރައްވައިފައެވެ.
ރައީސްގެ ނިންމެވުންތައް:
- ވޭޕްކުރުމަށް ބޭނުންކުރާ ތަކެއްޗާއި، އެ ތަކެތީގެ ވަކިވަކި ބައިތައް ރާއްޖެއަށް އެތެރުކުރުން އަންނަ މަހުގެ 15 ވަނަ ދުވަހުން ފެށިގެން މަނާ ކުރުމަށް ކުރަންޖެހޭ އެންމެހާ ކަންކަން ކުރުމަށް ކަމާބެހޭ ފަރާތްތަކަށް އެންގެވުން.
- ވޭޕްކުރުމަށް ބޭނުންކުރާ ތަކެތި ބޭނުންކުރުމާއި، ގެންގުޅުމާއި، އުފެއްދުމާއި، ވިއްކުމާއި، ރާއްޖޭގައި އިޝްތިހާރު ކުރުމާއި ހިލޭ ބެހުން އަންނަ ޑިސެމްބަރު 15 ވަނަ ދުވަހުން ފެށިގެން މަނާކުރުމަށް ކުރަންޖެހޭ އެންމެހާ ކަންކަން ކުރުމަށް ކަމާބެހޭ ފަރާތްތަކަށް އެންގެވުން.
ރައީސްގެ މި ނިންމެވުންތަކަށް މަރުހަބާ ދަންނަވައި ގިނަ ބަޔަކު އަންނަނީ އެ ނިންމެވުންތަކަށް ގުޅިގެން ތައުރީފުކޮށް، ޝުކުރު އަދާކުރަމުންނެވެ.
އެގޮތުން ކުރީގެ ޔޫތު މިނިސްޓަރު އަޙްމަދު މަހުލޫފް އެކްސްގައި ކުރެއްވި ޕޯސްޓެއްގައި ވިދާޅުވީ މަސްތުވުމާއި ދުންފަތުގެ އިސްތިއުމާލުކުރުމުގެ ވަބާގައި ޖެހިފައިވާ އެތައް ޒުވާނުންނެއް އަދި އެތައް ކުޑަކުދިންނެއް މިއަދު ރާއްޖޭގައި ތިބިކަމީ ހަގީގަތް ކަމަށެވެ. ޚާއްސަކޮށް ވޭޕުކުރާ ކުޑަކުދިން އިންތިހާއަށް އިތުރުވާކަން، ސުކޫލުތަކުން ހޯދާ ވޭޕުގެ އަދަދުތަކުން ޔަގީންވާކަމަށް ވެސް މަހުލޫފް ވިދާޅުވިއެވެ.
https://x.com/AhmedMahloof/status/1845822507368185887?t=tSMEFMvZBDgjU0eu6Jo65Q&s=19
ވޭޕު ކުރުން ހުއްޓުވުމުގެ މަގުސަދުގައި، ވޭޕުކުރަން ބޭނުންކުރާ ސާމާނާއި އޭގެ ވަކިވަކި ބައިތައް އެތެރެކުރުން ހުއްޓުވުމަށް ރައީސުލްޖުމްހޫރިއްޔާ ޑރ. މުޢިއްޒު ނިންމެވި ނިންމުމަކީ ރަނގަޅު ކަމެއްކަމަށްދެކި މަރުހަބާކިޔަން. މަހުލޫފްގެ ޕޯސްޓުގައި ވިދާޅުވެފައިވެއެވެ.
މީގެއިތުރުން މުޙައްމަދު ސިނާން ކިޔާ މީހަކު ކުރި ޕޯސްޓެއްގައި ވަނީ މިއީ ފަހުގެ ތާރީޚެއްގައި މި ދިވެހިރާއްޖޭގައި ޒުވާނުންނާއި ކުޑަކުދިން އަވާއެއްގައި ޖެހި ހަލާކުވާން ދޫކޮށްނުލައި، އެކަމަށް އެޅުނު އެފަދަ ހަމައެކަނި ފިޔަވަޅު ކަމަށެވެ. އަދި ކުރިއަށް އޮތްތަނުގައި މަގުމަތީގައިއާއި، އާންމު ތަންތަނުގައި ދުންފަތުގު އިސްތިއުމާލު ކުރުން މަނާ ކުރުން މުހިއްމުކަން ވެސް އޭނާ ފާހަގަކުރިއެވެ.
އެހެން މީހަކު ބުނެފައިވަނީ މިއީ އުނދަގޫ ނިންމެވުމެއް ކަމަށާއި، ނަމަވެސް ރައީސް ޑރ. މުޢިއްޒުގެ މި ނިންމެވުމަކީ މި ޖީލުގެ މި ވަބާގައި ޖެހިފައި ތިބި ކިޔަވާ ކުދިންނަށާއި، ޖުމްލަކޮށް ހުރިހާ ރައްޔިތުންނަށް ދުޅަހެޔޮ ފާގަތި މުސްތަގުބަލެއް މަގުފަހިކޮށްދެއްވުމަށްޓަކައި އަދި ހަރުދަނާ ކުށްމަދު ޖީލެއް ބިނާކުރުމަށް ނިންމެވި ނިންމެވުމެއްކަން ޔަގީން ކަމަށެވެ.
އެމަނިކުފާނުގެ ހިތްޕުޅުގައި ރައްޔިތުންނާއި ދޭތެރޭ އޮތް ލޯތްބާއި އޯގާތެރިކަން މިކަމުންވެސް ދޭހަވެގެން ދަނީ. މިއީ ސެލިއުޓު ކުރަންޖެހޭ ނިންމެވުމެއް. ޝުކުރިއްޔާ ރައީސް ޑރ. މުޢިއްޒު. އެކްސްގައި ކުރި ޕޯސްޓެއްގައި އޭނާ ލިޔެފައިވެއެވެ.
https://x.com/Humandust___/status/1845839010209702186?t=SBONMgRUq-kPzMA7xoZ2bA&s=19
ޒުވާން މަސްވެރިޔާގެ ނަމުން މަޝްހޫރުވެފައިވާ ސާޖިން ބުނީ މަސްތުވާތަކެއްޗަށް ޒުވާން ޖީލު ވައްދަން މިހާރު އެންމެ ބޮޑަށް ބޭނުންކުރާ ވޭޕް ރާއްޖެ އެތެރެ ކުރުން ހުއްޓާލައި މަސްތުވާތަކެތީގެ ވިޔަފާރިއާއި ދެކޮޅަށް ރައީސް ޑރ. މުޢިއްޒު ނުކުމެވަޑައިގަތުމަކީ ގައުމު ހަމަމަގަށް އަޅުވަން އެމަނިކުފާނު ކުރައްވާ މަސައްކަތުގެ އިޚުލާސްތެރިކަން ހާމަވާ ކަމެއް ކަމަށެވެ.
ރައީސްގެ ނިންމެވުމަށް ޝުކުރު ދަންނަވަމުން އިސްމާޢިލް ޒާހިރު ކިޔާ މީހަކު ބުނީ ދިވެހި ތުއްތު ދަރިންގެ މުސްތަގުބަލަށް، ޚާއްސަކޮށް އެ ކުދިންގެ ސިއްހަތަށްޓަކައި ރައީސް ނިންމެވި ހަރުދަނާ ޖެހިލުން ކުޑަ ނިންމުމަށް އައްސަރިބަހާ ސާބަސް ދަންނަވާ ކަމަށެވެ.
މީގެއިތުރުން ވެސް ގިނަ ބަޔަކު ވަނީ ރައީސްގެ ނިންމެވުމަށް ތައުރީފުކޮށްފައެވެ. މަޝްހޫރު ނޫސްވެރިޔާ އަޙްމަދު ސާއިލް ޢަލީ ވެސް ފާހަގަކުރެއްވި ގޮތުގައި ރައީސް އެ ނިންމެވީ ވަރަށް ހިތްވަރުގަދަ ނިންމެވުމެކެވެ.