ދިވެހިރާއްޖޭގައި ވޭޕް މަނާކުރަން ރައީސް ޑރ. މުޙައްމަދު މުޢިއްޒު ނިންމެވި ނިންމެވުން ރައްޔިތުން ބަލައިގަންނަނީ ޝުކުރުވެރިކަމާއެކު ކަމަށް ނައިބު ރައީސް އަލްއުސްތާޒު ޙުސައިން މުޙައްމަދު މިރޭ ލަޠީފް ވިދާޅުވެއްޖެއެވެ.
ރައީސް މުޢިއްޒު މިއަދު އެކްސްގައި ކުރެއްވި ޕޯސްޓެއްގައި ވަނީ ވޭޕުގެ ނުރައްކަލުން ގައުމު ސަލާމަތްކުރުމަށް އަޅުއްވަން ނިންމެވި ފިޔަވަޅުތައް އިއުލާނުކުރައްވައިފައެވެ.
ެއެމަނިކުފާނު ވިދާޅުވީ ވޭޕްކުރުމަށް ބޭނުންކުރާ ތަކެއްޗާއި، އެ ތަކެތީގެ ވަކިވަކި ބައިތައް ރާއްޖެއަށް އެތެރުކުރުން އަންނަ މަހުގެ 15 ވަނަ ދުވަހުން ފެށިގެން މަނާ ކުރުމަށް ކުރަންޖެހޭ އެންމެހާ ކަންކަން ކުރުމަށް ކަމާބެހޭ ފަރާތްތަކަށް އަންގަވާފައިވާ ކަމަށެވެ. އަދި ވޭޕްކުރުމަށް ބޭނުންކުރާ ތަކެތި ބޭނުންކުރުމާއި، ގެންގުޅުމާއި، އުފެއްދުމާއި، ވިއްކުމާއި، ރާއްޖޭގައި އިޝްތިހާރު ކުރުމާއި ހިލޭ ބެހުން އަންނަ ޑިސެމްބަރު 15 ވަނަ ދުވަހުން ފެށިގެން މަނާކުރުމަށް ކުރަންޖެހޭ އެންމެހާ ކަންކަން ކުރުމަށް ކަމާބެހޭ ފަރާތްތަކަށް އަންގަވާފައިވާ ކަމަށް ވެސް ރައީސް ވިދާޅުވިއެވެ.
މި ނިންމެވުންތަކާ ގުޅިގެން ނައިބު ރައީސް ވިދާޅުވީ މިއީ ގައުމުގެ ޒުވާން ޖީލުގެ މުސްތަގުބަލުގެ ދުޅަހެޔޮކަމާއި ގުޅިފައިވާ ހަރުދަނާ މުހިންމު ނިންމެވުމެއް ކަމަށެވެ. އަދި ރައީސްގެ މި ނިންމެވުން ދިވެހި ރައްޔިތުން ބަލައިގަންނަނީ ޝުކުރުވެރި ކަމާއެކުކަން ފާހަގަކުރައްވަމުން ނައިބު ރައީސް ވަނީ ޝުކުރު އަދާކުރައްވާފައެވެ.
ރައީސްގެ ނިންމެވުމާ ގުޅިގެން ހޯމް މިނިސްޓަރު ޢަލީ އިޙުސާން ވިދާޅުވީ ދިވެހި ދަރިން މަސްތުގެ މަގަށް ފަސޭހަކަމާއެކު އަނބުރާލާ ކަމެއްގެ ގޮތުގައި އޮތް ”ވޭޕްކުރުން” މަނާކުރުމަށް ނިންމެވި ނިންމެވުމަކީ މި ގައުމު ތާއަބަދަށް ޝުކުރުވެރިވާނެ ކަމެއް ކަމަށެވެ.
މީގެއިތުރުން އިސްލާމިކް މިނިސްޓަރު ޑރ. މުޙައްމަދު ޝަހީމް ޢަލީ ސަޢީދު ވިދާޅުވީ ވޭޕް މަނާކުރުމާމެދު ރައީސް ނިންމެވި ނިންމެވުމަކީ އަދާއި މާދަމާގެ ޖީލުތަކަށްޓަކައި ނިންމެވި ހިތްވަރުގަދަ ނިންމެވުމެއް ކަމަށެވެ.