150 މެގަވޯޓުގެ ކަރަންޓް އުފައްދައިދޭނެ، މައި އިންޖީނުގެ ދިރާސާ ކުރުމަށް ޗައިނާ ކުންފުންޏަކާއި ހަވާލުކޮށްފިއެވެ.
އިއްޔެ ސްޓެލްކޯ އާއިއެކު ސޮއިކުރި އެމްއޯޔޫގެދަށުން މިދިރާސާތައް ކުރާނީ ޗައިނާގެ އެންމެ ބޮޑު 10 ކުންފުނީގެ ތެރޭގައި ހިމެނޭ ޓީބީއީއޭ ގްރޫޕް ކޮމްޕެނީ ލިމިޓެޑް އިންނެވެ.
މިއީ މާލެ، ވިލިމާލެ، ގުޅިފަޅު، ތިލަފުށީ ހިމެނޭ ގޮތަށް ޒަމާނީ ފެންވަރަށް ތެލާ ގޭހުން ހިންގޭ މައި އިންޖީނުގެއެވެ.
މިއިންޖީނުގެއަކީ 150 މެގަވޮޓްގެ ހަކަތަ އުފައްދާ، ތެލާއި ގޭހުންވެސް ހިންގާ އިންޖީނުގެއެވެ. އިންޖީނުގެ ހުންނާނީ ގުޅިފަޅުގައެވެ. ރަށްތައް ގުޅައިލެވޭނީ އަޅައިލެވޭ ގްރިޑަކުންނެވެ، އެއިރުން މާލެ ހުޅުމާލެ ހިމެނޭ ސަރަޙައްދުވެސް މިގްރިޑާއި ގުޅިގެންދާނެއެވެ.
އެކަމުގެ ސަބަބުން ގްރޭޓަރ މާލެ ސަރަޙައްދަށް ދެވޭ ކަރަންޓުގެ ފެންވަރު ރަނގަޅުވެ ދެމެހެއްޓެނިވި ގޮތެއްގައި ކަރަންޓްގެ ޚިދުމަތް ލިބެމުންދާނެއެވެ.
ސްޓެލްކޯގެ މެނޭޖިންގ ޑިރެކްޓަރ ޙުސައިން ފަހުމީ ވިދާޅުވީ ގްރޭޓަރ މާލެ ސަރަޙައްދުގައި މަސައްކަތްކުރާ ތަންތަނާއި މީހުން ދިރިއުޅޭ ތަންތަން ބޮޑުތަނުން އިތުރުވަމުން އަންނައިރު ބޭނުންވާ ކަރަންޓުގެ ޚިދުމަތް ދިނުމަށް މިފަދަ އިންޖީނުގެއަކަށް ވަރަށް ކުރިންސުރެ ބޭނުންވެފައިވާ ކަމަށެވެ.
ވީމާ ކުރިމަތިވަމުން އަންނަ ކަރަންޓުގެ މައްސަލަތަކަށް މިއިންއިންޖީނުގޭގެ ސަބަބުން ޙައްލު ލިބިގެންދާނެ ކަމަށެވެ.
ގްރޭޓަރ މާލެ ސަރަޙައްދު ހިމެނޭ ގޮތަށް ރާއްޖޭގެ ހުރިހާ ސަރަޙައްދެއްގައި ދެވޭ ކަރަންޓުގެ ޚިދުމަތުގެ ފެންވަރު ރަނގަޅުކުރުމަށާއި ޚާއްޞަކޮށް ސްޓެލްކޯއިން ދެވޭ ޚިދުމަތުގެ ފެންވަރު މަތިކުރަން ރައީސް ޑރ. މުޙައްމަދު މުޢިއްޒު ދެއްވާ ސަމާލުކަން ފާހަގަކުރައްވައި ފަހުމީ ވަނީ އެމަނިކުފާނަށް ތަޢްރީފްކުރައްވައި ޝުކުރު އަދާކުރައްވައިފައެވެ.