މަސްތުވާތަކެތީގެ ވަބާއިން ސަލާމަތްވުމަށް ނެޝަނަލް ޑްރަގް އޭޖެންސީ (އެންޑީއޭ) ގެ ސެންޓަރުތަކުން ފަރުވާ ހޯދަމުންދާ މީހުންގެ އަދަދު 1500 އަށް އަރައިފިއެވެ. މި މަޢުލޫމާތު ހާމަކުރެއްވީ މިއަދު ބޭއްވުނު ނޫސްވެރިންގެ ބައްދަލުވުމެއްގައި އެންޑީއޭގެ ސީއީއޯ މުޙައްމަދު ރާޝިދެވެ.
ރާޝިދު ވިދާޅުވި ގޮތުގައި، ކުރީގައި އެ އޭޖެންސީގެ ފަރުވާގެ ޚިދުމަތްތައް ދުވަސްތަކަކަށް އޮތީ ވަޅުޖެހިފައެވެ. ޚާއްޞަކޮށް މީހުންނަށް ދޭންޖެހޭ ފަރުވާގެ ތެރެއިން މުހިންމު ބައިތަކެއް އޮތީ ނުގެންދެވިއެވެ. ނަމަވެސް މި ސަރުކާރުން ވެރިކަމާ ހަވާލުވި ފަހުން ގިނަ މަސައްކަތްތަކެއް ކުރެވި، މިހާރު ފަރުވާގެ ކަންކަން ވަރަށް ފުޅާކޮށް ކުރިއަށް ގެންދެވޭ ކަމަށް އޭނާ ފާހަގަކުރެއްވިއެވެ.
“މި ވަގުތު އަޅުގަނޑުމެންގެ ފަރުވާގެ ތެރޭގައި ތަފާތު 10 ސެންޓަރެއްގައި 1500 ކުދިން ފަރުވާ އެބަ ނަގަމުންދޭ. އޭގެ ތެރޭގައި ރެސިޑެންޝިއަލް ޕްރޮގްރާމްގެ ގޮތުގައި ސެންޓަރުގައި ތިބެގެން ފަރުވާ ނަގާ ކުދިންނާއި މުޖުތަމަޢުގެ ތެރޭގައި ތިބެގތިބެގެން ފަރުވާ ނަގާ ކުދިންނާއި އަދި ބޭސް ދެވިގެން ފަރުވާ ދެވޭ ކުދިން ހިމެނޭ،” ރާޝިދު ވިދާޅުވިއެވެ.
އެންޑީއޭއިން މިހާރު ފޯރުކޮށްދެމުންދާ ފަރުވާގެ ތެރޭގައި ޖިސްމާނީ، ރޫޙާނީ އަދި ނަފްސާނީ ފަރުވާ ހިމެނޭކަން ރާޝިދު ފާހަގަކުރެއްވިއެވެ. މި ފަރުވާތައް ފޯރުކޮށްދިނުމަށް އެންޑީއޭއިން ގިނަ މަސައްކަތްތަކެއް ކުރަމުންދާކަން އޭނާ ވިދާޅުވިއެވެ.
މަސްތުވާތަކެތީގެ ވަބާއަކީ ރާއްޖޭގައި ދުވަހެއް ދުވަހަކަށް އިތުރުވަމުންދާ މައްސަލައެއްކަން ފާހަގަކުރެވެއެވެ. މި މައްސަލައާ ގުޅިގެން ސަރުކާރުން އަޅަމުންދާ ފިޔަވަޅުތަކުގެ ތެރެއިން އެންޑީއޭގެ ފަރުވާގެ ޕްރޮގްރާމްތައް ފުޅާކުރުމަކީ މުހިންމު ފިޔަވަޅެއް ކަމުގައި ބެލެވެއެވެ.