ރާއްޖޭގައި ސިންތަޓިކް ޑްރަގްސް ބޭނުންކުރުން ބޮޑު މައްސަލައަކަށް ވެފައިވާ ކަމަށް ނެޝަނަލް ޑްރަގް އޭޖެންސީ (އެންޑީއޭ) އިން ހާމަކޮށްފިއެވެ.
މިއަދު ބޭއްވި ނޫސްވެރިންގެ ބައްދަލުވުމެއްގައި އެންޑީއޭގެ ސީއީއޯ މުހައްމަދު ރާޝިދު ވިދާޅުވީ ފަހަކަށް އައިސް ރާއްޖޭގައި ސިންތަޓިކް މަސްތުވާތަކެތި ބޭނ ބޭނުންކުރާ މީހުންގެ އަދަދު އިތުރުވެފައިވާ ކަމަށެވެ. އަދި މިކަމާ ގުޅިގެން ފަރުވާ ހޯދަން އަންނަ ކުދިންނަކީ ނަފްސާނީ ބަލިމަޑުކަމެއްގެ ތެރެއަށް ވެއްޓިފައިވާ ކުދިންތަކެއް ކަމަށް އޭނާ ފާހަގަކުރެއްވިއެވެ.
“ޑްރަގް އިންޑިއުސްޑް ސައިކޯސިސް ނުވަތަވަތަ އެ ބޭނުންކުރާ މަސްތުވާތަކެތީގެ ސަބަބުން އަންނަ ނަފްސާނީ ބަލިމަޑުކަމެއް. އަކަންކަން މިއަދު ވަރަށް ގިނަ އެޑިކްޓުންގެ ފަރާތުން އެބަ ފާހަގަކުރެވޭ.” ރާޝިދު ވިދާޅުވިއެވެ.
މި ކަމަކީ ވަރަށް ކަންބޮޑުވާންޖެހޭ ކަމެއް ކަމަށާއި، މަސްތުވާތަކެތީގެ ފަރުވާ ދިނުމުގައި މިއީ ވަރަށް ބޮޑު ގޮންޖެހުމަކަށް ވެފައިވާ ކަމަށްވެސް އޭނާ ވިދާޅުވިއެވެ.
ސިންތަޓިކް ޑްރަގްސްއަކީ ކެމިކަލް ބޭސްޑް އަދި ލެބޯޓްރީތަކުގައި ހަދާ ޑްރަގްތަކެކެވެ. ރާއްޖޭގައި ފަހަކަށް އައިސް ޕޯސްޓު މެދުވެރިކޮށް ޑްރަގްސް ގެނައުން އިތުރުވެފައިވާ އިރު، އޭގެން އެންމެ ގިނައިން އަތުލައިގަންނަނީ ސިންތެޓިކް ޑްރަގްސްކަން ފާހަގަކޮށްލެވެއެވެ. މީގެ ތެރޭގައި މެތަންފެޓަމައިން، (މެތު) ފަދަ މަސްތުވާތަކެތި ހިމެނެއެވެ.
ފަހަކަށް އައިސް މާލޭގެ މަގުތަކުން މަސްތުވާތަކެތި ބޭނުން ކުރާ އެޑިކްޓުން ފެންނައިރު މީގެ ކުރިއާ ތަފާތުކޮށް ސިފައަށް ވެސް ބޮޑެތި ބަދަލުތަކެއް އައިސްފައި ތިބޭކަމީ މިކަމުގެ ވަރަށް ބޮޑު ހެއްކެކެވެ، ސަބަބަކީ މެތަންފެޓަމައިން އަކީ މީހާގެ ސިފަ އުމުރަށްވުރެ އަވަހަށް މުސްކުޅިކަމަށް ބަދަލުކޮށްލާ، ކުޑަދުވަސްކޮޅެއްގެ ތެރޭގައި ދަތްތައް ހަލާކުވެ، ގައިގެ ހަންގަޑު ރޫޖެހި ހިކި އަނަރޫފަވެ މީހާ ފާޑެއްގެ ހުތުރު ސިފައަކަށް ބަދަލުކޮށްލާ ކަމެކެވެ، މީގެ ހައެއްކަ ވަރަކަށް އަހަރުކުރިން ރާއްޖޭގެ މަގުތަކުން ނުފެންނަ މަންޒަރުތައް މިހާރު ފެނުމުން ގައުމުގެ ހާލަތު ގޮސްފައިވާ ނުރައްކާތެރި ހިސާބު ވަޒަންކުރެވެއެވެ.