ފަލަސްޠީނަށް ނަސްރަށް އެދި އިސްލާމީ ހުދޫދުގެތެރޭގައި ތިބެ
އަޑުއުފުލައި، އިންސާނީ ގޮތުން އެހީތެރިވާންޖެހޭ ކަމަށް އިސްލާމިކް މިނިސްޓަރު ޑރ. މުޙައްމަދު ޝަހީމް ޢަލީ ސަޢީދު މިއަދު ވިދާޅުވެއްޖެއެވެ.
އެމަނިކުފާނު މިފަދައިން ވިދާޅުވީ އިޒްރޭލުން ފަލަޞްތީނަށް ދެމުންގެންދާ ނިރުބަވެރި ހަމަލާތަކާއި، ހިންގަމުންދާ ލާއިންސާނީ އަމަލުތަކާ ގުޅިގެން ސޯޝަލްމީޑިއާ ޕްލެޓްފޯމް، އެކްސްގައި ކުރެއްވި ޕޯސްޓެއްގައެވެ.
މިނިސްޓަރު ޑރ. ޝަހީމް ވިދާޅުވީ ފަލަޞްތީނު މިނިވަންކުރުމަށް އެ ގައުމުގެ ރައްޔިތުން ކުރަމުންދާ މަސައްކަތުގައި ބައިވެރިވުމުގެ ގޮތުން، އިސްލާމީ ހުދޫދުގެ ތެރޭގައި ތިބެ އަޑު އުފުލައި ވަކާލާތުކުރުމަކީ މުސްލިމުން ކުރަންޖެހޭނެ ކަމެއް ކަމަށެވެ.
ހަމައެފަދައިން ފަލަޞްތީނުގެ ރައްޔިތުންނަށް އިންސާނީ ގޮތުން އެހީތެރިވުމާއި ހެޔޮ ދުއުކުރުމަކީ ކުރަންޖެހޭނެ ކަމެއްކަން ވެސް މިނިސްޓަރުގެ ޕޯސްޓުގައި ފާހަގަކުރައްވާފައިވެއެވެ.
މިނިސްޓަރު ވިދާޅުވީ ހަނގުރާމަ ހުއްޓުވައި މެދުއިރުމައްޗަށް ސުލްހަ ގެނައުމަކީ އެތަށް ބައެއްގެ ފުރާނަ ސަލާމަތްވުމުގެ އުންމީދު ކަމަށެވެ. އެކަމަށްޓަކައި ބައިނަލްއަގުވާމީ މުޖުތަމައުއިން މަސައްކަތްކުރަންޖެހޭކަން ވެސް މިނިސްޓަރު ފާހަގަކުރެއްވިއެވެ.