ރައްޔިތުންގެ މަންފާ އަށްޓަކައި ރައީސް ޑރ. މުހައްމަދު މުއިއްޒު ކަނޑައަޅުއްވާ ސިޔާސަތުތައް ތަންފީޒުކުރުމަށް ބޭންކް އޮފް މޯލްޑިވްސް (ބީއެމްއެލް) އިން ދެއްވާ އެއްބާރުލެއްވުމަށް ދިވެހި ސަރުކާރުން މިއަދު ޝުކުރު އަދާކޮށްފިއެވެ.
ވަޒީރުންގެ މަޖިލީހުގެ ލަފާގެ މަތިން ރައީސުލްޖުމްހޫރިއްޔާ ނިންމަވާފައިވާ ނިންމެވުމެއް ތަންފީޒުކުރުމުގެ ގޮތުން، ބޭރު ގައުމުތަކުގައި ތައުލީމު ހާސިލު ކުރަމުންދާ ދަރިވަރުންނަށް ބީއެމްއެލްގެ ރުފިޔާ ޑެބިޓް ކާޑުތަކުން ޑޮލަރު ލިބޭ މިންވަރު ޖެނުއަރީ މަހުން ފެށިގެން 1200 ޑޮލަރަށް އިތުރު ކޮށްދިނުމަށް ބީއެމްއެލް އިން ނިންމާފައިވާ ކަމަށް ސަރުކާރުން ބުނެފައިވެއެވެ.
މި ނިންމުމަކީ ބޭރުގައި ކިޔަވާ ދަރިވަރުންނަށާއި އެ ދަރިވަރުންގެ އާއިލާތަކަށް ވަރަށް ބޮޑު ލުޔެއް ލިބިގގެންދާނެ ކަމެއްކަމަށް ސަރުކާރުން ފާހަގަކޮށްފައިވެއެވެ.
ދިވެހި ގައުމުގެ ތަރައްގީއާއި ރައްޔިތުންގެ ފުދުންތެރިކަން އިތުރުކުރުމުގައި ބީއެމްއެލްގެ ދައުރު ފުޅާކުރުމަށް ސަރުކާރުން އަބަދުވެސް އެހީތެރިވަމުންދާނެކަމުގެ ޔަގީންކަން ވެސް ސަރުކާރުން ދީފައިވެއެވެ.
މީގެއިތުރުން، ދައުލަތުގެ ހަރަދުތައް ކުޑަކޮށް، ދަރަނި ކުޑަކޮށް، ދައުލަތަށް ލިބޭ އާމްދަނީގެ މަންފާ ރައްޔިތުންނަށް އިތުރުކުރުމަށް ސަރުކާރުން އަޅަން ފަށާފައިވާ އިސްލާޖީ ފިޔަވަޅުތައް ހަރުދަނާކަމާއެކު ކުރިއަށް ގެންދިއުމަށް އިސްކަން ދޭނެ ކަމަށް ވެސް ސަރުކާރުން ބުނެފައި ވެއެވެ.