ފުވައްމުލައް ސިޓީގެ އުމްރާނީ ތަރައްގީގެ މަސައްކަތްތައް ފަރުމާކުރުމާއި، ލަފާދިނުމުގެ އެއްބަސްވުމެއްގައި ސޮއިކޮށްފިއެވެ.
ފުވައްމުލައް ސިޓީ ކައުންސިލުން މިއަދު ބުނީ އެ ސިޓީގެ ތަރައްގީގެ ގިނަ މަސައްކަތްތައް ހަލުވިކަމާއެކު އެ ކައުންސިލުން އެކި ފަރާތްތަކާއި ގުޅިގެން ކުރަމުންދާއިރު ތަރައްގީގެ މަސައްކަތްތަކަކީ ރޭވުންތެރިކަމާއިއެކު ކުރެވޭ މަސައްކަތްތަކެއްކަން ކަށަވަރު ކުރުމަކީ މުހިންމު ކަމެއް ކަމަށެވެ. އަދި އެ ސިޓީގެ ތަރައްގީ ޕްލޭންގެ މައިގަނޑު ފަސް އަމާޒުގެ ތެރެއިން އެއް އަމާޒަކީ “ޕްލޭން ކުރެވިފައިވާ ދިރިއުޅެން ފަހި ސިޓީ” އަކަށް ފުވައްމުލައް ހެދުން ކަމަށެވެ.
އެ އަމާޒަށް ވާސިލުވުމަށް ކުރެވޭ މަސައްކަތުގެ ތެރެއިންް މި ހަފުތާގެ އާދީއްތަ ދުވަހު އުމްރާނީ ތަރައްގީއާއި ގުޅުންހުރި އެކި މަސައްކަތްތައް ފަރުމާކޮށް އެއާ ގުޅުންހުރި ކަންކަމުގައި ލަފާދިނުމުގެ އެއްބަސްވުމެއްގައި ޝެރެޓް ސްޓޫޑިއޯއާއެކު ސޮއިކޮށްފައިވާ ކަމަށް ފުވައްމުލައް ސިޓީ ކައުންސިލުން ބުންޏެވެ.
މި އެއްބަސްވުމުގެ ދަށުން ބިނާވެށިޕްލޭން އެކުލަވާލުމާއި، ސިޓީ ސެންޓަރުގެ މާސްޓަރ ޕްލޭން ފަރުމާކުރުމާއި، ކިޅި ސަރަހައްދުގެ މާސްޓަރ ޕްލޭން ފަރުމާކުރުމާއި، ތޫނޑު ސަރަހައްދުގެ މާސްޓަރ ޕްލޭން ފަރުމާކުރުމާއި، ޕްލޭންކުރުމާއި ތަރައްގީ ކުރުމުގައި އަމަލުކުރަންޖެހޭ އުސޫލުތައް ފަރުމާކުރުމާއި، ޖިއޮގްރަފިކް އިންފޮމޭޝަން ސިސްޓަމް ގާއިމުކުރުން ހިމެނެއެވެ.
މި އެއްބަސްވުމުގެ ދަށުން އެ ސިޓީގެ ބިންތައް އެންމެ އެކަށީގެންވާ ގޮތުގައި ބޭނުންކުރުމަށް މަގުފަހިވެގެންދާނެ ކަމަށާއި، އެ ސިޓީއަށް ލިބިފައިވާ ގުދުރަތީ ވަސީލަތްތައް އެންމެ ފައިދާހުރި ގޮތުގައި ބޭނުންކުރުމަށާއި، ތިމާވެށި ރައްކާތެރިކުރުމަށް ޚާއްސަ ފިޔަވަޅުތަކެއް އެޅިގެންދާނެ ކަމަށް ފުވައްމުލައް ސިޓީ ކައުންސިލުން ބުންޏެވެ.
މީގެއިތުރުން ތަރައްގީގެ މަޝްރޫއުތައް ހިންގުމުގައި ހަރުދަނާ އުސޫލުތައް ގެންގުޅެވި، މަޝްރޫއުތައް ހަލުވިކަމާއެކު ކުރިއަށް ގެންދިއުމަށް މަގުފަހިވެގެންދާނެ ކަމަށް ވެސް އެ ކައުންސިލުން ވަނީ ބުނެފައެވެ.
މި އެއްބަސްވުމުގެ މުއްދަތަކީ މަސައްކަތުގެ އެއްބަސްވުމުގައި ސޮއިކުރި ތާރީޚުން ފެށިގެން 12 މަސް ދުވަހެވެ.