ގަވާއިދާ ހިލާފަށް އުޅޭ ބިދޭސީން ހޯދުމަށް މާލެ ސަރަހައްދުގައި ހިންގަމުންދާ އޮޕަރޭޝަންތަކުގެ ތެރެއިން މޯލްޑިވްސް އިމިގްރޭޝަންގެ ބެލުމުގެ ދަށަށް އިތުރު 7 ބިދޭސީއަކު ގެންގޮސްފިއެވެ.
މޯލްޑިވްސް އިމިގްރޭޝަނުން މިއަދު ބުނެފައިވަނީ، “އިމިގްރޭޝަން ވޮޗް” އަށް ލިބުނު މައުލޫމާތުގެ އަލީގައި އިއްޔެ މާލޭގައި ހުރި ތިން ތަނެއް ބަލައި ފާސްކޮށް، ގަވާއިދާ ހިލާފަށް އުޅެމުންދިޔަ ފަސް ބިދޭސީން އިމިގްރޭޝަންގެ ބެލުމުގެ ދަށަށް ގެނެވިފައިވާ ކަމަށެވެ. ހަމައެހެންމެ އިއްޔެ މާލޭގައި ހިންގި އިންސްޕެކްޝަނެއްގައި ގަވާއިދާ ހިލާފަށް އުޅެމުންދިޔަ އިތުރު ތިން ބިދޭސީން އިމިގްރޭޝަންގެ ބެލުމުގެ ދަށަށް ގެނެވިފައިވާ ކަމަށްވެސް އެ ބަޔާނުގައި ފާހަގަކޮށްފައިވެއެވެ.
މިހާރު ހިނގަމުންދާ އޮޕަރޭޝަންތަކުގެ ތެރެއިން މިހާތަނަށް 4،000 އަށްވުރެ ގިނަ ބިދޭސީން ވަނީ ޑީޕޯޓްކޮށްފައެވެ. މި ސަރުކާރުން ދަނީ ރާއްޖޭގައި ގަވާއިދާ ހިލާފަށް އުޅޭ ބިދޭސީން ހުއްޓުވައި، އެ މީހުންނާ ދޭތެރޭ އަޅަންޖެހޭ ފިޔަވަޅުތައް އަޅަމުންނެވެ.
މި މަސައްކަތުގެ ތެރެއިން، މުޑުދާރުކޮށް ކާބޯތަކެތި ތައްޔާރުކުރަމުންދާ ބިދޭސީންގެ މަސައްކަތްތައް ހުއްޓުވައި، ގަވާއިދާ ހިލާފަށް ކުރަމުންދާ ވިޔަފާރިތައްވެސް ދަނީ ހުއްޓުވަމުންނެވެ. މި އޮޕަރޭޝަންތަކަކީ ރާއްޖޭގެ އިމިގްރޭޝަން ގާނޫނާއި ގަވާއިދުތައް ތަންފީޒުކުރުމަށް ކުރެވޭ މުހިންމު މަސައްކަތްތަކެއް ކަމުގައި ސަރުކާރުން ދެކެއެވެ.