އިޒްރޭލުން އީރާނަށް އަމާޒުކޮށް ދިން އަސްކަރީ ހަމަލާތަކަކީ އީރާނުގެ އިސްތިގުލާލާއި ބައިައިނަލްއަގުވާމީ ގާނޫނުތަކާ ހިލާފު ހަމަލާތަކެއް ކަމަށް ބުނެ ދިވެހި ސަރުކާރުން އެކަން ހަރުކަށި އިބާރާތުން ކުށްވެރި ކޮށްފިއެވެ.
ހާރިޖީ ވުޒާރާއިން ނެރުނު ބަޔާނެއްގައި ބުނެފައި ވަނީ، މި ހަމަލާތަކަކީ މެދުއިރުމަތީގެ ސަރަޙައްދުގައި ހަމަނުޖެހުން އިތުރުވެ، ނުރައްކާތެރި ހަނގުރާމައެއް ފެށިދާނެ ކަމެއް ކަމަށެވެ. އަދި މި ސަރަޙައްދުގައި ސުލްޙަ ޤާއިމުކުރުމަކީ މުހިންމު ކަމެއް ކަމަށާއި، ރައްކާތެރިކަން ކަށަވަރު ކުރަން ޖެހޭ ކަމަށް ވެސް ބަޔާނުގައި ފާހަގަކޮށްފައިވެއެވެ.
މި ހަމަލާތަކަކީ އޮކްޓޯބަރު 1 ވަނަ ދުވަހު އީރާނުން އިޒްރޭލުގެ އަސްކަރީ އަމާޒުތަކަށް ދިން ހަމަލާތަކުގެ ބަދަލު ހިފުމުގެ ގޮތުން ދީފައިވާ ހަމަލާތަކެއް ކަމަށް ބެލެވެއެވެ. އިޒްރޭލުން ބުނެފައިވަނީ ތިން ރާޅަކަށް ދިން ހަމަލާތަކަށް ފަހު، ބަދަލު ހިފުމުގެ ގޮތުން ދޭން ނިންމާފައިވާ ހަމަލާތައް ނިމުމަކަށް އައިސްފައިވާ ކަމަށެވެ.
ދިވެހި ސަރުކާރުން ވަނީ ހަމަނުޖެހުންތައް ވަގުތުން ހުއްޓާލުމަށާއި، ސަރަޙައްދުގެ ދެމެހެއްޓެނިވި ޞުލްޙަ މަސަލަސްކަން ގާއިމުކުރުމަށް މަޝްވަރާތައް އިތުރުކުރުމަށް ކުރަމުންދާ މަސައްކަތްތަކަށް އެއްބާރުލުން ދިނުމަށް ބައިނަލްއަގުވާމީ މުޖުތަމަޢަށް ގޮވާލާފައެވެ. މިކަމާ ގުޅިގެން މެދުއިރުމަތީގައި އިތުރު ހަމަނުޖެހުންތަކެއް ހިނގައިދާނެ ކަމުގެ ބިރު އޮތް ކަމަށް ވެސް ދިވެހި ސަރުކާރުން ފާހަގަ ކޮށްފައި ވެއެވެ.