ޕްރޮސެކިއުޓަރ ޖެނެރަލް (ޕީޖީ) އޮފީހުން ކޯޓަށް ހުށަހަޅާފައިވާ ދައުވާތަކާއި ބަންދުގައި ތިބި މީހުންގެ ބަންދު މުރާޖައާކުރަން ހުޅުވައިލި ފުރުސަތުގައި 500 އަށްވުރެ ގިނަ ޝަކުވާ ހުށަހަޅާފައިވާ ކަމަށް އެ އޮފީހުން މިއަދު ބުނެފިއެވެ.
މިހާރު ކޯޓަށް ހުށަހެޅިފައިވާ ދައުވާތަކާއި، ހައްޔަރުކޮށްފައި ނުވަތަ ބަންދުކޮށްފައި ތިބި މީހުންގެ ބަންދު މުރާޖައާ ކުރުމަށް އެދި ހުށަހެޅުމުގެ ފުރުސަތު ހުޅުވައިލީ 1 އޮކްޓޫބަރުން ފެށިގެން 20 ދުވަހުގެ މުއްދަތަށެވެ.
ޕީޖީ އޮފީހުން ބުނީ އެ މުއްދަތުގައި 539 ޝަކުވާ ހުށަހަޅާފައިވާ ކަމަށެވެ.
އެ ޝަކުވާތައް މުރާޖައާކުރުމުގެ މަސައްކަތް ކޮމިޓީން ކުރަމުންދާ ކަމަށް ވެސް ޕީޖީ އޮފީހުން ބުންޏެވެ.