މިއަދު ފަތިހު ހުޅުމާލޭގައި ޓްރާންސްފޯމަރެއްގެ ތެރެއަށް ވަދެ ވައްކަން ކުރަން އުޅުނު މައްސަލައެއް ފެންމަތިވެ، އެ މައްސަލައިގައި ރިސްފާން ކިޔާ ޒުވާނަކު ހައްޔަރުކޮށްފިއެވެ.
ފުލުހުން މައުލޫމާތު ދީފައިވާ ގޮތުގައި، މިއަދު ފަތިހު 5:30 ހާއިރު ހުޅުމާލޭގެ ފޭސް 2 ގައި ހުންނަ ހިޔާ 13 ކައިރީގައި ހުރި ޓްރާންސްފޯމަރެއްގެ ތެރެއަށް މީހަކު ވަދެ ވައްކަން ކުރަން އުޅޭ ކަމުގެ މައުލޫމާތު ލިބުމާ ގުޅިގެން ފުލުހުން ވަނީ އެ ސަރަހައްދަށް ގޮސްފައެވެ.
މި މައްސަލައިގައި ހައްޔަރުކޮށްފައި ވަނީ ނ. މާޅެންދޫ/ ފެހި އައްސޭރި، އަހުމަދު ރިފްޝާން (32 އަހަރު) އެވެ. އަދި އޭނާ ވަނީ ތަހުގީގަށް ބަންދު ކޮށްފަ އެވެ.
މިއީ ފަހަކަށް އައިސް ޓްރާންސްފޯމަރަކުން ވައްކަން ކުރަން އުޅުނު ފުރަތަމަ ހާދިސާ ނޫން ކަމެވެ. މިދިޔަ މާޗު މަހު ވެސް މިފަދަ ހާދިސާއެއް ހިނގައި، އެ ހާދިސާގައި ވައްކަން ކުރަން އުޅުނު މީހަކު ވަނީ ކަރަންޓުގައި ޖެހި މަރުވެފައެވެ.
ޓްރާންސްފޯމަރު ތަކަކީ ވަރަށް ނުރައްކާތެރި މިންވަރަކަށް ކަރަންޓު ދައުރުވާ އާލާތްތަކެއް ކަމަށްވާތީ، މިފަދަ ތަންތަނަށް ވަނުމަކީ ފުރާނައަށް ނުރައްކާ ވެދާނެ ކަމެއްކަން ފާހަގަ ކުރެވެއެވެ. އަދި މިފަދަ އަމަލުތަކަކީ ގާނޫނީ ގޮތުން ކުށެއް ކަމުގައި ވާތީ، ރައްޔިތުން މިފަދަ އަމަލު ތަކުން ދުރުހެލިވުމަށް އިލްތިމާސް ކުރެވެއެވެ.
ފުލުހުން ބުނީ މި މައްސަލައިގައި ބަލަން ޖެހޭ ކަންތައްތައް ބަލައި، މައްސަލަ ތަހުގީގު ކުރަމުންދާ ކަމަށެވެ.