ރާއްޖޭގައި އެންމެ ގިނައިން ދޫކުރާ 250 ބޭހެއްގެ އަގު އަންނަ މަހުން ފެށިގެން ކޮންޓްރޯލް ކުރާނެ ކަމަށް ނޭޝަނަލް ސޯޝަލް ޕްރޮޓެކްޝަން އޭޖެންސީ (އެންސްޕާ) އިން މިރޭ ބުނެފި އެވެ. މިއީ އާސަންދަ ނިޒާމަކީ ދެމެހެއްޓެނިވި ގޮތެއްގައި ފެންވަރު ރަނގަޅު ހިދުމަތް ފޯރުކޮށްދޭ ނިޒާމަކަށް ހެދުމަށްޓަކައި ކުރާ މަސައްކަތުގެ ތެރެއިން އަޅާ ފިޔަވަޅެކެވެ.
އެންސްޕާ އިން މިރޭ ނެރުނު އިއުލާނެއްގައި ބުނެފައިވާ ގޮތުގައި، މި ފިޔަވަޅުތަކުގެ ސަބަބުން ބޮޑު އަގުގައި ވިއްކަމުން އައި ބޭސްތަކުގެ އަގު ހެޔޮވެ، އާސަންދަ ސްކީމުގެ ދަށުން ބޭހަށް ކުރާ ހަރަދުން އަހަރަކު 220 މިލިއަން ރުފިޔާ ސަލާމަތް ކުރެވޭނެ އެވެ.
250 ބޭހުގެ އަގަށް ބަދަލު ގެންނާނީ އެކި ފިޔަވަހިތަކަކަށް ބަހާލައިގެންނެވެ. މިގޮތުން، މިހާރު އަގުތައް މުރާޖަޢާ ކޮށްފައިވާ 87 ބޭހެއްގެ އަގަށް އަންނަ ނޮވެމްބަރު 1 އިން ފެށިގެން ބަދަލު ގެނައުމާ އެކު 126 ބޭހެއްގެ އަގަށް ނޮވެމްބަރު 24 އިން ފެށިގެން ބަދަލު ގެންނަން ވަނީ ނިންމައިފަ އެވެ. އަގު މުރާޖަޢާ ކުރާ ބޭހުގެ ތަފްސީލުތައް އާސަންދައިގެ ވެބްސައިޓުގައި އާންމުކުރާނެ ކަމަށް ވެސް އެންސްޕާ އިން ބުންޏެވެ.
އަގު ކޮންޓްރޯލްކުރާ ހުރިހާ ބޭހެއް ވެސް އެސްޓީއޯގެ ބޭސްފިހާރަތަކުން ލިބޭނެ ކަމަށާއި، މި ބަދަލާ ގުޅިގެން އާސަންދަ ސްކީމު މެދުވެރިކޮށް ރައްޔިތުންނަށް ހިލޭ ބޭސް ލިބިދިނުމުގެ އިންތިޒާމަށް އެއްވެސް ބަދަލެއް ނާންނާނެ ކަމަށް އެންސްޕާ އިން ބުންޏެވެ.
ބޭހުގެ އަގަށް ބަދަލު ގެންނާނީ އެކި ފިޔަވަހިތަކަކަށް ބަހާލައިގެންނެ
އާސަންދަ ސްކީމުގައި ރަޖިސްޓަރީ ކޮށްފައިވާ އަމިއްލަ ފާމަސީތަކުގެ ތެރެއިން މި ބޭސްތައް ވިއްކުމަށް ރަޖިސްޓަރީ ކޮށްފައިވާ ފާމަސީތައް މެދުވެރިކޮށް، އިތުރު އަގަކާ ނުލައި ބޭސް ލިބޭނެ އިންތިޒާމު ވަނީ ހަމަޖައްސައިފަ އެވެ.
ބޭހުގެ އަގު ކޮންޓްރޯލް ކުރުމަކީ ސީދާ ރައީސް ޑރ. މުހައްމަދު މުއިއްޒުގެ ބެއްލެވުމުގެ ދަށުން އެންސްޕާ އިން ކުރަމުން އަންނަ ކަމެކެވެ. މިދިޔަ ސެޕްޓެމްބަރު މަހު އެ މަނިކުފާނު ވަނީ ރާއްޖޭގައި އާދަޔާ ހިލާފު ބޮޑު ފައިދާއެއް ލައިގެން ބޭސް ވިއްކުމުގެ މައްސަލަ ހައްލުކުރުމަށް ގާނޫނުގައި ކަނޑައަޅާފައިވާ ކަންކަން ތަންފީޒު ނުވެ އޮތް އޮތުން ނިމުމަކަށް ގެނެސް، ބޭހުގެ އަގު ކޮންޓްރޯލް ކުރުމަށް އަޅަންޖެހޭ ފިޔަވަޅުތައް އެޅުމަށް ކަމާބެހޭ އިދާރާތަކަށް އަންގަވައިފަ އެވެ.
ރައީސް ޑރ މުއިއްޒު ވިދާޅުވެފައިވަނީ ރާއްޖޭގެ ބާޒާރުގައި ބޭސް ވިއްކާ އަގުތައް ހުރީ 200 ޕަސެންޓާއި 2،000 ޕަސެންޓާ ދެމެދުގެ ފައިދާއެއް ނަގާ މިންވަރުގައި ކަމަށެވެ. އެހެންކަމުން، މިފަދަ ބޮޑު ފައިދާއެއް ނެގުން ހުއްޓުވުމަށް އަޅަންޖެހޭ ފިޔަވަޅުތައް އެޅުމަށް ކަމާ ގުޅުންން ހުރި ހުރިހާ މުއައްސަސާތަކަށް އަންގާފައިވާ ކަމަށް ރައީސް ކުރިން ވިދާޅުވި އެވެ.
ބޭހުގެ އަގަށް ބަދަލު ގެންނާނީ އެކި ފިޔަވަހިތަކަކަށް ބަހާލައިގެންނެ
މީގެ ކުރިން ހެލްތު މިނިސްޓްރީން ހެދި ގަވާއިދެއްގައި އޮންނަނީ ބޭސް ވިއްކާއިރު ފައިދާގެ ގޮތުގައި އެންމެ ގިނަވެގެން ނެގޭނީ 100 ޕަސެންޓް ކަމަށެވެ. ނަމަވެސް، މި ގަވާއިދު އެކަށީގެންވާ ގޮތެއްގައި ތަންފީޒު ނުކުރެވި އޮތުމުގެ ސަބަބުން ބޭހުގެ އަގުތައް މަތިވެފައިވާކަން ފާހަގަކުރެވެ އެވެ.
ދުނިޔޭގެ ސިއްހަތު ޖަމްއިއްޔާއިން ކުރިން ބުނެފައިވާ ގޮތުގައި ދެކުނު އޭޝިއާގެ ގައުމުތަކާ އަޅާބަލާއިރު ރާއްޖެއިން ބޭހަށް ކުރާ ހަރަދު 70 ޕަސެންޓް އިތުރެވެ. މިއީ މި ސަރަޙައްދުން ބޭހަށް އެންމެ ބޮޑު ހޭދައެއް ކުރާ އެއް ގައުމެއްގެ ގޮތުގައި ރާއްޖެ ފާހަގަކުރެވޭ ސަބަބެވެ.
އެންސްޕާ އިން ވަނީ އާސަންދަ ސްކީމު މެދުވެރިކޮށް ހިދުމަތް ހޯދުމަށް ފަހު ރަސީދު ހޯދުމަށް ވެސް އިލްތިމާސްކޮށްފަ އެވެ. އަދި ބޭސް ވިއްކަން ޖެހޭ އަގުގެ ލިސްޓާ ހިލާފަށް ބޭސް ދޫކުރާ ނަމަ އެކަން އެންސްޕާގެ "ޝިކާވަތި" ޗެޓްލައިން 7951400 އަށް ރިޕޯޓު ކުރުމަށް ވެސް ވަނީ އެދިފަ އެވެ.