މުދާ ކްލިއަރކުރުންފަދަ މޯލްޑިވްސް ކަސްޓަމްސް ސަރވިސްއިން ކުރަމުންދާ މުހިންމު މަސައްކަތްތައް އަވަސްކުރުމަށް އެ އިދާރާއިން މިހާރު ފަށާފައިވާ ސިމްޕޯޒިއަމް މުހިންމު ދައުރެއް އަދާކުރާނެކަމަށް މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް)ގެ މެނޭޖިން ޑިރެކްޓަރ އިބްރާހިމް ޝަރީފް މުޙައްމަދު ވިދާޅުވެއްޖެއެވެ.
ޝަރީފް މިހެން ވިދާޅުވީ، ކަސްޓަމްސް ސަރވިސްގެ ކުރިއަށް އޮތް 5 އަހަރުގެ ސްޓްރެޓީޖިކް ޕްލޭން އެކުލަވާލުމާ ބެހޭ ސިމްޕޯޒިއަމް ފެށުމަށް ބޭއްވި ރަސްމިއްޔާތު ޝަރަފުވެރިކޮށްދެއްވާ ވާހަކަދައްކަވަމުންނެވެ. މި ސިމްޕޯޒިއަމްގައި ކަސްޓަމްސްއާއެކު އެހެން މުއައްސަސާތަކުން ގުޅިގެންކުރާ މަސައްކަތްތައް އަވަސްކުރެވޭނެ ގޮތްތަކާ ބެހޭގޮތުން މަޝްވަރާކުރާނެއެވެ.
އެމްއޭސީއެލްގެ މެނޭޖިން ޑިރެކްޓަރ ވިދާޅުވީ، މުދާ ކްލިއަރ ކުރުމާއި ރާއްޖޭގެ ބޯޑަރުގެ ސަލާމަތް ކަސްޓަމްސްއިން ބަލަހައްޓަމުންދާއިރު އެ އިދާރާއިން އެކަންކުރަނީ ގިނަ މުއައްސަސާތަކެއްގެ އެހީތެރިކަމާއެކު ގުޅިގެންެން ކަމަށެވެ. އެހެންކަމުން މަސައްކަތްތައް އަވަސްކުރަން ގުޅިގެން މަޝްވަރާކޮށް ޕްލޭންތައް އެކުލަވާލުން މުހިންމުކަން ޝަރީފް ފާހަގަކުރެއްވިއެވެ.
“ކަސްޓަމްސްއަކީ ބޯޑަރުގައި އެއްޗެހި ލަސްވިޔަ ނުދީ ދޫކުރާ ބައެއް. ކަސްޓަމްސްއިން މުދާ ކްލިއަރ ކުރުމުގެ މަސައްކަތްކުރާއިރު، އެ މުއައްސަސާއާއެކީ މަސައްކަތްކުރާ އަނެއް މުއައްސަސާއިންވެސް އެބަޖެހޭ ކަސްޓަމްސްއާ އެއް ހަމަކުރަން. އޭރުން މަސައްކަތް އަވަސްވާނީ.” ޝަރީފް ވިދާޅުވިއެވެ.
ސުޕްރިޓެންޑެންޓް އޮފް ކަސްޓަމްސް ސަރވިސް މިންނާ ރަޝީދު ވިދާޅުވީ މި ސިމްޕޯޒިއަމްގައި ކުރެވޭ މަޝްވަރާތައް ކަސްޓަމްސްގެ ސްޓްރެޓީޖިކް ޕކް ޕްލޭންގައި ހިމެނޭނެ ކަމަށެވެ. އަދި 2025 އިން 2029 އަށް ހަދާ ސްޓްރެޓީޖިކް ޕްލޭނަށް ރަނގަޅު ޚިޔާލުތަކެއް ބައިވެރިންގެ ފަރާތުން ލިބޭނެކަމަށް އުންމީދުކުރައްވާ ކަމަށްވެސް ވިދާޅުވިއެވެ.
ކަސްޓަމްސްގެ ސިމްޕޯޒިއަމްގައި އެމްއެންޑީއެފާއި ދިވެހި ފުލުހުންގެ ޚިދުމަތްފަދަ މުއައްސަސާތައް ބައިވެރިވެއެވެ. މި ސިމްޕޯޒިއަމް ކުރިއަށްދާނީ 3 ދުވަހުގެ މުއްދަތަކަށެވެ.