މިނިވަން މުއައްސަސާތަކުގެ ވެރިން އައްޔަނު ކުރަން އިސްލާހު ހުށައެޅީ މިނިވަން މުއައްސަސާ ތަކުން ކަމަށް އެޗްއާރުސީއެމްގެ މެންބަރު އިސްމާއިލް ހަބީބް ވިދާޅުވެއްޖެއެވެ.
އިސްމާއީލް ހަބީބް މިހެން ވިދާޅުވީ މިރޭ އެކްސްގައި ކުރެއްވި ޕޯސްޓެއްގައެވެ. އެގޮތުން ހަބީބް ވިދާޅުވީ އިލެކްޝަންސް ކޮމިޝަން (އީސީ،) އާއި އެންޓި ކޮރަޕްޝަން ކޮމިޝަނ( އޭސީސީ)ގެ ރައީސާއި ނާއިބު ރައީސް، ޢައްޔަނު ކުރައްވާގޮތަށް މިހާރު މަޖިލީހަށް ހުށަހަޅުއްވާފައިވާ އިސްލާޙަކީ މިނިވަން މުއައްސަސާތަކުން 2023 ގައި ރައީސުލްޖުމްހޫރިއްޔާގެ އަރިހަށާއި، އެޓަރނީ ޖެނެރަލް ގެ އިތުރުން ރައްޔިތުންގެ މަޖިލީހުގެ މިނިވަން މުއައްސަސާތަކާ ބެހޭ ކޮމިޓީއަށް، އޭސީސީ، އީސީ، އެޗްއާރުސީއެމް އަދި ސީއެއްސީގެ މެންބަރުން ހުށަހެޅި ޕޭޕަރުގައި ހިމެނިފައިވާ ކަމެއް ކަމަށެވެ.
އަދި އެއީ ދުނިޔޭގެ ކުރިއަރާފައިވާ އެމެރިކާ ފަދަ ޤައުމުތަކުންވެސް އެކަން ކުރަމުން އަންނަގޮތް ކަމަށްވެސް ހަބީބް ވަނީ ވިދާޅުވެފައެވެ. ހަބީބްގަ އެކްސްގައި މިފަދައިން ވިދާޅުވެފައިވާއިރު، އެ އިސްލާހުތަކާއި ގުޅުގެން އިދިކޮޅުން ވަނީ ފާޑުކިއުން އަމާޒު ކޮށްފައެވެ. އަދި މި ކަމާ ގުޅުގެން މިރޭ ރައީސް އެކްސްގަ ކުރެއްވި ޕޯސްޓެއްގައި ވިދާޅުވީ މިނިވަން މުއައްސަސާ ތަކުގެ ތެރެއަށް އެމަނިކުފާނު ނުފޫޒު ނުފޯރުވާނެ ކަމަށާއި، އެއީ އެއްވެސް އިރެއްގައި ކުރައްވާނެ ކަމެއް ނޫން ކަމަށެވެ.
އަދި ދައުލަތުގެ އެއްވެސް ބާރެއްގެ، ނުވަތަ މިނިވަން މުއައްސަސާއެއްގެ، ނުވަތަ އިންތިޚާބު ކުރެވޭ އެއްވެސް ބައެއްގެ ބާރުތަކުގެ ތެރެއަށް ނުފޫޒު ފޯރުވުމަކީ މިއަދާ ހަމަޔަށްވެސް ކުރިކަމެއްނޫން ކަމަށާއި، އަދި ކުރިޔަށް އޮތް ތާނގައިވެސް ކުރާނޭކަމެއްނޫން ކަމަށެވެ.
އޭގެ ބަދަލުގައި، އެފަދަ ފަރާތްތަކުން ޢަދުލުވެރިކަމާއި، އިންސާފާއި، ހަމަހަމަކަމާއެކު، ވަކި މީހަކަށް ބެލުމެއްނެތި، ހަލުއި ދުވެލީގައި މަސައްކަތްކުރަމުން ދޭތޯ ކަށަވަރުކުރުމާއި އެ މަގަށް ކަންކަން ބައްޓަން ކުރުމަށް ކުރަންޖެހޭ އެންމެހާ ކަންކަން ކުރުމަށް، ޤާނޫނާއި ޤަވާޢިދަށް ގެންނަންޖެހޭ އިސްލާހެއްވާނަމަ އެ އިސްލާޙެއް ގެންނަން ސަރުކާރުން ހުށަހަޅަމުން ގެންދާނެ ކަމަށްވެސް ވިދާޅުވުއެވެ.