ރާއްޖޭގެ މަސްވެރިންނަށް މިހާތަނަށް ނުދެވިހުރި ފައިސާގެ ޖުމުލަ އަދަދު، އެ ފަރާތްތަކަށް ރައްދުކުރުމަށްޓަކައި މިހާރު ވަނީ މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ (މިފްކޯ) އާ ޙަވާލުކުރެވިފައިކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިއަދު ވިދާޅުވެއްޖެއެވެ.
ރައީސް ޑރ މުޢިއްޒު މިކަން ހާމަކުރެއްވީ އެކްސްގައި ކުރެއްވި ޕޯސްޓެއްގައެވެ. މި ޕޯސްޓުގައި ރައީސް ޑރ މުއިއްޒު ވިދާޅުވެފައިވަނީ، މި ސަރުކާރުގެ މެނިފެސްޓޯގައި ވައުދުވެވަޑައިގެންފައިވާ ފަދައިން، 48 ގަޑިއިރުގެ ތެރޭގައި ދެމެހެއްޓެނިވި ގޮތެއްގައި ފައިސާ ދެވޭނެ ނިޒާމެއް ގާއިމު ކުރުމުގެ މަސައްކަތް މިހާރު ދަނީ ކުރެވެމުންނެވެ.
ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުން މަސްވެރިންނަށް ދޭން ޖެހޭ 250 މިލިއަނަށް ވަނަށް ވުރެ ގިނަ ރުފިޔާ ހުއްޓެވެ. މި ސަރުކާރުން ވަނީ އެ ފައިސާއާ އެކުގައި މިހާތަނަށް އައިއިރު، މަސްވެރިންނަށް 1.1 ބިލިއަނަށް ވުރެ ގިނަ ރުފިޔާ ދީފައެވެ.
މިފްކޯއިން ބުނާ ގޮތުގައި ޖުމްލަ 331 ދޯންޏަކުން ކިރި މަހަށް 9.1 މިލިއަން ރުފިޔާ ދޭން ޖެހިފައިވާއިރު، މި މުއްދަތުގައި ފެލިވަރު، ކޫއްޑޫ އަދި އައްޑޫއަށް ކިރާފައިވަނީ 882.32 މެޓްރިކް ޓަނުގެ މަހެވެ. މިފްކޯއިން އިތުރަށް ބުނާ ގޮތުގައި ލިބޭ މަދު މަސްކޮޅުން ކުންފުންޏަށް ލިބޭ އާމްދަނީ މިވަނީ ވަރަށް ބޮޑަށް ދަށްވެފައެވެ. އެހެންނަމަވެސް މި ފައިސާ ދިނުމަށް މިފްކޯއިން ދަނީ މަސައްކަތް ކުރަމުންނެވެ.