ދިވެހި ފުލުހުންގެ ޚިދުމަތުގެ ސާޖަންޓެއް، ތުރުކީވިލާތުގައި ހިންގާ މާސްޓަރސް ޕްރޮގްރާމެއްގައި ބައިވެރިވުމަށް އިއްޔެ (ތާރީޚް) ތުރުކީއަށް ފުރައިފިއެވެ. މި ޕްރޮގްރާމުގައި ބައިވެރިވުމަށް ތުރުކީއަށް ދަތުރުކުރެއްވީ ފުލުހުންގެ ސާޖަންޓު އަބްދުއްސަމީޢު އަބްދުލްޙަމީދެވެ.
ސާޖަންޓް އަބްދުއްސަމީޢު ބައިވެރިވަނީ ތުރުކީގެ ޖޯންޑާމަރީ އެންޑް ކޯސްޓްގާޑް އެކަޑަމީގެ ސެކިއުރިޓީ އިންސްޓިޓިއުޓުން ހިންގާ، ތީސިސްއާއެކު ކުރިއަށްގެންދާ މާސްޓަރސް ޕްރޮގްރާމެއްގައެވެ. މި ޕްރޮގްރާމް ފެށުމަށް ހަމަޖެހިފައިވަނީ 2024 ނޮވެމްބަރު 1 ވަނަ ދުވަހުއެވެ.
މި ޕްރޮގްރާމުގެ ދަށުން، ފުރަތަމަ އަހަރު ސާޖަންޓް އަބްދުއްސަމީޢު ހޭދަކުރައްވާނީ ތުރުކީ ބަސް ދަސްކުރެއްވުމަށެވެ. އޭގެ ފަހުން، 2025 ވަނަ އަހަރުގެ އޮކްޓޫބަރު މަހުން ފެށިގެން މާސްޓަރސް ޕްރޮގްރާމުގެ ކިޔެވުން ފައްޓަވާނެއެވެ. މި ޕްރޮގްރާމުގައި ކްރިމިނަލް އިންވެސްޓިގޭޝަން، ސެކިއުރިޓީ މެނޭޖްމަންޓް، ޕަބްލިކް އެޑްމިނިސްޓްރޭޝަން، ޑިޒާސްޓަރ މެނޭޖްމަންޓް، މެރިޓައިމް ސޭފްޓީ އެންޑް ސެކިއުރިޓީ އަދި އިންޓަރނޭޝަނަލް ސެކިއުރިޓީ އެންޑް ޓެރަރިޒަމް ފަދަ ދާއިރާތަކުން ކިޔަވައިދޭނެއެވެ.
ސާޖަންޓް އަބްދުއްސަމީޢަކީ ފުލުހުންގެ އިނީޝަލް ޓްރެއިނިންގ ކޯހުގެ 29 ވަނަ ބެޗްގެ ކޮމިޝަނަރސް އެވޯޑް ލިބިފައިވާ ފުލުހެކެވެ.
ދާޚިލީ ސަލާމަތާއި ފަންނިންޔާތާ ބެހޭ ވަޒީރު ޢަލީ އިޙްސާން ވަނީ މީގެކުރިން ވިދާޅުވެފައިވަނީ، ފުލުހުންނަށް މަތީ ތައުލީމާއި ތަމްރީނުގެ ފުރުސަތުތައް ފަހިކޮށްދިނުމަކީ އެމަނިކުފާނުގެ ޒިންމާއެއް ކަމަށާއި އެކަން ފަހިކޮށްދީ އެކަމަށް ބާރު އެޅުއްވުމަކީ ފުލުހުންގެ ވަޒީރުގެ ހައިސިއްޔަތުން ވަރަށް އިސްކަންދޭނެ ކަމެއް ކަމަށެވެ. އަދި ފުލުހުންގެ ޚިދުމަތް ދިނުމަށް ޒަމާނީ އަދި މަތީ ތައުލީމާއި ތަމްރީނަކީ ވަރަށް މުހިންމު ކަމެއް ކަމަށްވެސް އެމަނިކުފާނު ވަނީ ވިދާޅުވެފައެވެ.