ރާއްޖޭގައި ގައިންގަޔަށް ނާރާ ބަލިތައް އިތުރުވަމުންދާ މައްސަލަ ޙައްލުކުރުމަށް، ރާއްޖޭގެ ފަސްޓް ލޭޑީގެ ހައިސިއްޔަތުން މަސައްކަތް ކުރައްވާނެކަމުގައި ރައީސުލްޖުމްހޫރިއްޔާގެ އަނބިކަނބަލުން ސާޖިދާ މުޙައްމަދު، ވިދާޅުވެއްޖެއެވެ.
މެޑަމް ސާޖިދާ މިފަދައިން ވިދާޅުވެފައިވަނީ ބުދަ ދުވަހު ބޭއްވުނު މެރކް ފައުންޑޭޝަން އެފްރިކާ އޭޝިއާ ލުމިނަރީ ކޮންފަރެންސްގެ 11 ވަނަ އަހަރީ ބައްދަލު ބައްދަލުވުމުގެ ތެރެއިން ބޭއްވުނު މެރކް ފައުންޑޭޝަން ފަސްޓް ލޭޑީސް އިނީޝިއޭޓިވް ކޮމިޓީގެ ބައްދަލުވުމުގައި ވާހަކަފުޅު ދައްކަވަމުންނެވެ.
މި ބައްދަލުވުމުގައި ވާހަކަފުޅު ދައްކަވަމުން މެޑަމް ސާޖިދާ ފާހަގަކުރެއްވި ގޮތުގައި، ގައިންގަޔަށް ނާރާ ބަލިތަކުގެ ސަބަބުން ރާއްޖޭގައި މަރުވާ މީހުންގެ ނިސްބަތް ވަނީ ކަންބޮޑުވާ މިންވަރަށް މަތިވެފައެވެ. އަދި މިއީ ޞިއްޙީ ދާއިރާއަށް ކުރިމަތިވެފައިވާ ބޮޑު ގޮންޖެހުމެއްކަމަށް އެކަމަނާ ވިދާޅުވިއެވެ.
މި ގޮންޖެހުންތަކުން އަރައިގަތުމަށްޓަކައި ޞިއްޙީ ދާއިރާގެ ޤާބިލުކަން އިތުރުކޮށް، މުޖުތަމަޢުގެ ހޭލުންތެރިކަން އިތުރުކުރުމަށް މުހިންމު މަސައްކަތްތަކެއް ކުރަންޖެހިފައިވާކަން މެޑަމް ސާޖިދާ ފާހަގަކުރެއްވިއެވެ. އޭގެ ތެރޭގައި ރާއްޖޭގައި މިހާރުވެސް ބައެއް ބަލިތަކުގެ ސްޕެޝަލިސްޓުންގެ ދަތިކަން ކުރިމަތިވެފައިވާކަން ފާހަގަކުރައްވައި، ޚާއްޞަކޮށް އޮންކޮލޮޖީ ނުވަތަ ކެންސަރުފަދަ ބަލިތަކުގެ ސްޕެޝަލިސްޓުން މަދުކަން އެކަމަނާ ފާހަގަކުރެއްވިއެވެ.
މީގެ އިތުރުން، މިފަދަ ފަރަގުތައް ނައްތާލުމަށް ބޭރުގެ އެހީތެރިކަން ބޭނުންވާކަމަށާއި، ދަރިމައިވުމުގެ މައްސަލައިގައި ދިމާވާ ގޮންޖެހުންތަކާއި، ޚާއްޞަކޮށް މިކަމުގައި ދެމަފިރިންނަށް ކުރިމަތިވާ އިޖުތިމާޢީ އަދި ނަފްސާނީ ދަތިތަކަށްވެސް މެޑަމް ސާޖިދާ ވަނީ އަލިއަޅުއްވާލައްވާފައެވެ.
ރާއްޖޭގެ ރައީސުލްޖުމްހޫރިއްޔާގެ އަނބިކަނބަލުންގެ ޙައިސިއްޔަތުން، ގައިން ގަޔަށް ނާރާ ބަލިތައް މަދުކުރުމަށް މަސައްކަތްޕުޅުކުރައްވާނެކަމަށް މެޑަމް ސާޖިދާ ވިދާޅުވިއެވެ. އަދި މެރކް ފައުންޑޭޝަންގެ ކެމްޕޭންތަކަށް ތަޢުރީފު ކުރައްވައި، ކޮންފަރެންސްގައި ފަސްޓް ލޭޑީންގެ މެދުގައި އޮތް އެއްބައިވަންތަކަމާއި އެކުވެރިކަމަށް ތަޢުރީފުކުރައްވައި، މި ތަޖުރިބާތަކުގެ އަލީގައި ރާއްޖޭގެ ޞިއްޙީ ދާއިރާ ހަރުދަނާ ކުރެއްވުމަށް މަސައްކަތް ކުރައްވާނެކަން ވަނީ ފާހަގަ ކުރައްވާފައެވެ.
މި ބައްދަލުވުމަކީ އެފްރިކާ އަދި އޭޝިއާ ސަރަޙައްދުގެ ޤައުމުތަކުގެ ފަސްޓް ލޭޑީން އެއްތަނަކަށް އެއްކޮށް، ޞިއްޙީ ދާއިރާގައި ހުރި ގޮންޖެހުންތަކާއި އޭގެ ޙައްލުތަކާ ބެހޭގޮތުން މަޝްވަރާކުރުމަށް ބޭއްވޭ މުހިންމު ބައްދަލުވުމެކެވެ. މި ބައްދަލުވުމުގައި ބައިވެރިވެވަޑައިގަތުމަކީ ރާއްޖޭގެ ޞިއްޙީ ދާއިރާ ކުރިއެރުވުމަށް މުހިންމު ފުރުޞަތެއްކަމަށް މެޑަމް ސާޖިދާ ވިދާޅުވިއެވެ.
ގައިންގަޔަށް ނާރާ ބަލިތަކަކީ ދުނިޔޭގެ ގިނަ ޤައުމުތަކުގައި އިތުރުވަމުންދާ މައްސަލައެކެވެ. މީގެ ތެރޭގައި ހިމެނެނީ ހަކުރު ބަލި، ލޭމައްޗަށްދިއުން، ހިތުގެ ބަލިތައް އަދި ކެންސަރު ފަދަ ބަލިތަކެވެ. މި ބަލިތަކަކީ ގިނަ ފަހަރަށް ދިރިއުޅުމުގެ ވައްޓަފާޅިއާ ގުޅުންހުރި ބަލިތަކެއް ކަމުން، މި ބަލިތައް ކޮންޓްރޯލް ކުރުމަށް ސަރުކާރުންނާއި އަމިއްލަ ފަރުދުން ގިނަގުނަ މަސައްކަތްތަކެއް ކުރަން ޖެހެއެވެ.