ދުންފަތާއި ދުމުގެ ސަބަބުން ވަރަށް ނުރައްކާތެރި އެތައްކަމެއް ދިމާވެއެވެ. އެކިބަލިތަކަށް މީހާ ހުށަހެޅިގެންދާއިރު މިއީ ކިހާ ނުރައްކާތެރިކަމެއްކަން އެ ބޭނުންކުރާ މީހުންނަކަށް ނޭނގެއެވެ. ދުންފަތުގެ އިސްތިއުމާލު ކުރުމަކީ ހަށިގަނޑާއި މުޅި ނަފްސަށް ދެވޭ ވޭނެކެވެ. އަދި ބުރަ މަސަކަތްކޮށްގެން ލިބޭ ފައިސާ އަންދާލުންވެސްމެވެ.
ދުންފަތުގައި ނިކޮޓިން އެކުލެވިގެންވާ އިރު، މިއީ ސިއްޙީ މައްސަލަތައް ކުރިމަތިކުރުވާ އެޑިކްޓިވް މާއްދާއެކެވެ. ދުންފަތުގެ އިސްތިއުމާލު ކުރުމަކީ ހަށިގަނޑުގެ ގިނަ ގުނަވަންތަކަށާއި ނިޒާމުތަކަށް ކެންސަރު ޖެހުމުގެ ފުރުސަތު ބޮޑުކޮށްދޭ ކަމެއްވެސް މެއެވެ.
ދުންފަތުގެ އިސްތިއުމާލު ކުރުމުގައި ތަފާތު ބާވަތްތައް ހުންނައިރު، އޭގައި ރައްކާތެރި ބާވަތެއް ނެތެވެ. ނިކޮޓިންގެ ބާވަތްތަކަކީ ޒުވާނުންނަށާއި މާބަނޑު އަންހެނުންނަށާއި އުފަންނުވާ ތުއްތު ކުދިންނަށް ނުރައްކާތެރި ބާވަތްތަކެކެވެ. ޒުވާން އުމުރުގައި ނިކޮޓިން އަށް އެކްސްޕޯޒްވުމަކީ ސިކުނޑީގެ ކުރިއެރުމަށް ދިގު މުއްދަތަކަށް އަސަރުކުރުވާ ކަމެއްވެސް މެއެވެ.
ސިގްރޭޓް
ދުންފަތުގެ އިސްތިއުމާލުކުރާ މީހުން ރާއްޖޭގައި ނިސްބަތުން ގިނައެވެ. ފިރިހެނުންނާ އަންހެނުން މި ކަމުގައި ޝާމިލްވެއެވެ. ދުންފަތާއި ދުމުން އުފައްދާ ސިނގިރޭޓު އަދި ބިޑިއަކީ ޒަމާނުއްސުރެ ރާއްޖޭގައި އެންމެ އާންމު އެއް ބާވަތެވެ. ނަމަވެސް ފަހަކަށް އައިސް ވޭޕާއި އެކި ކަހަލަ އިލެކްޓްރޯނިކް ސިނގިރޭޓް މިވަނީ "ސަޅި" ކަމެއްގެ ގޮތުގައި ޒުވާނުންގެ ތެރޭގައި އާންމުވެފައެވެ.
ސިގްރޭޓް
ދުމާއި ދުންފަތުން ލިބޭ ގެއްލުން ބޮޑުވެފައިވާތީ މިކަމަށް އަވަސް ހައްލެއް ހޯދުމަށް މިހާރު ސަރުކާރުން އަމާޒު ހިފާފައިވާ މަސައްކަތަކީ ދުންފަތުގެ އިސްތިއުމާލު ކުރާމީހުންގެ އަދަދު މަދުކުރެވޭނެ ބާރެއްކަމުގަވާނެއެވެ. ދުންފަތުގައި 7000 އަށްވުރެ ގިނަ ކެމިކަލްތައް އެކުލެވިގެންވެއެވެ. އޭގެ ތެރެއިން 70 އަށްވުރެ ގިނަ ކެމިކަލްތަކަކަކީ ކެންސަރު ޖެހުމަށް މަގުފަހިވާ ބާވަތްތަކެވެ.
ސިނގިރޭޓާއި ވޭޕުން ނަގާ ޑިއުޓީ ބޮޑުކުރަން އިމްޕޯޓް އެކްސްޕޯޓުގެ ގާނޫނަށް އިސްލާހު ގެނައުމާއެކު ރާއްޖޭގައި ސިނގިރޭޓު ވިއްކާ އަގު ވަނީ އުފުލިފައެވެ. ސިގްރޭޓްގް އަގަށް އައި ބަދަލާއެކު ވަކިން ސިގްރޭޓެއްގެ އަގުވަނީ 7 ރުފިޔާ އާއި 10 އަށް ޖެހިފައެވެ. އެހެންކަމުން ސިގްރޭޓް ފޮއްޓެއްގެ އަގު 300 އާއި ގާތްކުރާއިރު މިއީ ސިގްރޭޓް ހުއްޓާލަން އެންމެ ރަނގަޅު ވަގުތެވެ.