ބަންގްލަދޭޝްއިން އިންޑިއާ މެދުވެރިކޮށް އަންނައުނު އެކްސްޕޯޓް ކުރުން ހުއްޓާލައި، ދިވެހިރާއްޖެ މެދުވެރިކޮށް އެ ތަކެތި އެކްސްޕޯޓް ކުރަން ނިންމައިފިއެވެ. މި ނިންމުމަކީ ދުނިޔޭގައި ދެވަނައަށް އަންނައުނު އުފައްދާ ގައުމުގެ ހައިސިއްޔަތުން ބަންގްލަދޭޝްއިން ނިންމި ވަރަށް މުހިންމު ނިންމުމެކެވެ.
ބަންގްލަދޭޝްގެ ކުންފުނިތަކުން މިފަދަ ނިންމުމެއް ނިންމީ އިންޑިއާގެ އެއަރޕޯޓުތަކާއި ބަނދަރުތައް މެދުވެރިކޮށް އެކްސްޕޯޓް ކުރުމުން ލިބޭ އާމްދަނީއަށް އަސަރު ކުރަން ފެށުމާ ގުޅިގެންނެވެ. މެޑިޓެރޭނިއަން ޝިޕިން ކޮމްޕެނީ (އެމްއެސްސީ) އެޖެންސީ ޕްރައިވެޓް ލިމިޓެޑްގެ މެނޭޖިން ޑިރެކްޓަރު ދީޕަކް ޓިވާރީ ވިދާޅުވި ގޮތުގައި، މި ބަދަލުގެ ސަބަބުން އިންޑިއާގެ އެއަރޕޯޓުތަކާއި ބަނދަރުތަކަށް ކުރިން މި ކާގޯތައް ބެލެހެއްޓުމުން ލިބުނު އާމްދަނީ ގެއްލޭނެއެވެ.
ދުނިޔޭގެ އެންމެ ބޮޑު އެއް ކޮންޓެއިނަރު ޝިޕިން ކުންފުންޏެއް ކަމުގައިވާ އެމްއެސްސީއިން ނިންމާފައިވަނީ އަންނައުނު ކަނޑުމަގުން ރާއްޖެ ގެނައުމަށް ފަހު، އެއަރ ކާގޯ މެދުވެރިކޮށް ދުނިޔޭގެ އެކި ކަންކޮޅުތަކަށް އެކްސްޕޯޓް ކުރުމަށެވެ. މީގެ ތެރޭގައި ޒާރާ އަދި އެޗް އެންޑް އެމް ފަދަ މަޝްހޫރު ބްރޭންޑްތަކުގެ އަންނައުނު ހިމެނެއެވެ.
މި ބަދަލުގެ ސަބަބުން އިންޑިއާ އާއި ބަންގްލަދޭޝްއާ ދެމެދު އޮތް ވިޔަފާރީގެ ގުޅުން ހީނަރުވެ، އިންޑިއާގެ އެހީގައި ބަންގްލަދޭޝްގައި ކުރިއަށްދާ މަޝްރޫޢުތައް މަޑުޖެހިގެންދާނެ ކަމަށް ރިޕޯޓުތަކުން ދައްކައެވެ. އަދި އިންޑިއާގެ ބަނދަރުތަކުންނާއި ޓްރާންސިޓް ފީން ލިބޭ އާމްދަނީ މަދުވުމަކީ ވެސް ވަރަށް ގާތް ކަމެއް ކަމަށް ބެލެވެއެވެ.
މި މައްސަލަ ހައްލުކުރުމަށް އަށް އިންޑިއާއިން ބަންގްލަދޭޝްއާ ވާހަކަދައްކަން ފަށާފައިވާ ކަމަށް ރިޕޯޓުތަކުން ދައްކައެވެ. އެހެންނަމަވެސް، މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން ސީ ޓު އެއަރ ކާގޯ ޓްރާންސްޝިޕްމަންޓްގެ ހިދުމަތް ފޯރުކޮށްދޭތީ، ކަނޑުމަގުން މުދާ ރާއްޖެ ގެނައުމަށްފަހު އެއަރ ކާގޯ މެދުވެރިކޮށް ދުނިޔޭގެ އެކި މަންޒިލްތަކަށް ގެންދިއުމުގެ ފުރުސަތު ލިބިގެންދާނެއެވެ.
މި ބަދަލަކީ ބަންގްލަދޭޝްގެ އެކްސްޕޯޓް ވިޔަފާރިއަށާއި، އިންޑިއާގެ އިގުތިސާދަށް އަދި ދިވެހިރާއްޖޭގެ ޓްރާންސިޓް ވިޔަފާރިއަށް ބޮޑު އަސަރެއް ކުރާނެ ބަދަލެއް ކަމަށް ބެލެވެއެވެ.